Sophonie 1 - Ma Zhiklè

Herkeda a gedas na

¹ Ma man Ndo nzi pèc pècèk a gaɗa na Sophonie, kra Cushi, te verzi Guédalia, te verzi Amaria, te verzi Ezéchias, te va man Josias, kra Amon, bi te Juda.

² I woy a i zede skwi tèlèba a géɗ herkeda, Ndo nzi pèc pècèk a gaɗa.

³ I gedas ta, a ndohi ba, a skwi ndzham ba, a ɗia-kihi tʼhwaɗ giɗfèk ba, a klèf te woyam ba. I gi a ndohi ambaɓihiaʼa ta wush ta hai, a i zede ndo a géɗ herkeda, Ndo nzi pèc pècèk a gaɗa.

Juda klèng

⁴ I ceda ri a zhiklè a géɗ Juda, a géɗ ndohi te Jérusalem, a i zeda nzlembaɗ Baal a nzlembaɗ ndohi mvi skwi a zhiklèhi mbèh skwai a samaʼa;

⁵ ta tèlèba man ta gurɓèhai a géɗ gai, a ta tsi rai a bantihai, ta tèlèba man ta gurɓahai a ta mbèɗè a nzlembaɗ Ndo nzi pèc pècèk a nzlembaɗ Milcom cèw ba.

⁶ Ta tèlèba man ta ngwoda na deɓa a Ndo nzi pèc pècèk, a ta woy a ta tsi ri a nengaʼa ɓai.

⁷ Va-nza tètè a sam Ndo nzi pèc pècèk, te man pats Ndo nzi pèc pècèk a zhè ndul ndul ma. Ndo nzi pèc pècèk a ntil skwi man a zlèhaʼá, a baha ta ndohi a pa.

⁸ A pats man Ndo nzi pèc pècèk a zlèh skwai, i gi kita a géɗ wud bihai, a géɗ bihai, a géɗ ndohi tèlèba man ta fi maslaka kokwar ngiɗè a va, Ndo nzi pèc pècèk a gaɗa.

⁹ I da gi kita ndohi tèlèba man ta bèhè Baal, – a pats nasa – man ta ndha gi bi ta a skwi man ta co a wuɗai a metsar.

¹⁰ A pats nasa ta tsi lalau a ntamagi kokwar ‘klèf’, ta gi wobau te civèɗ kokwar mɓuaʼa, a nhèzlèwè mbiaʼa a zhè te za.

¹¹ Va-tsu lalau, kinè ndohi te nkulgo-dok, te man ndohi Canaan tèlèba klèng. Ta ze ta ma, ta tèlèba man ta humbaɗa sulai.

Pats ndzoan

¹² Te ndev nasa, i da wuzhè kokwar Jérusalem a skwi ntiv vogwa te rai, a i hèsh ndohi tèlèba, a i ga ta kita a tengaʼa man ta nza daɓaɓaʼa ara drab zom, tengaʼa man ta goɗ te ndav ta: Ndo nzi pèc pècèk a gi skwi man amba azɓai, a gi skwi ambaɓiaʼa azɓai, a nzai na.

¹³ Skwi mèshèlè tengaʼa, metsar a da hilèʼa; gi tengaʼa a gi a dikai; ta da rèm gai, am an ta nzi a pa azɓai; ta da gi gi lak, aman ta si iyam nyi wof nenga azɓai.

¹⁴ Pats Ndo nzi pèc pècèk, pats mbiaʼa, a zhè ndul ndul ma, a shkè tsam-tsam. Fu zlembaɗ! Pats Ndo nzi pèc pècèk nzhurtüktükaʼa, ko ngul ndo a da kuɗai.

¹⁵ Pats nasa, pats ndzoan, pats ngedèshè skwai, pats matakwan, pats nzhidè skwai, ruva, di a rkè azɓai, vani sam téɗéɗikaʼa, vaɗ.

¹⁶ Pats tolom, pats nguzli var, a géɗ kokwar nʼngala te pa, a géɗ gi ngurèʼa zlazlar sa.

¹⁷ I da pra ta zlau a va ndohai a ta dè ara mandazlihai, a géɗ man ta gu malai a sam Ndo nzi pèc pècèk. Pombaz tengaʼa mbada tʼhai ara skwi ambalai, zluèɗ va tengaʼa ara zai.

¹⁸ Ko suli ko guro tengaʼa a slaha a mbél ta azɓai, a pats ndzoan Ndo nzi pèc pècèk, aman herkeda tèlèba a gedas na te ri srak Zhiklè man a ndiaʼa ara vogwa. Nengaʼa a da zede ta ndohi a géɗ herkeda tèlèba a nasa nasa.