Ruth 3 - Ma Zhiklè

Boaz a nco Ruth a ngwoz na

¹ A Naomi, mam baki na, a ngaɗa na: Dem ga, sèi i da ngatsa ka gi ngaya, a ka wèl va.

² Boaz, man ka nza a va dalahi mizlinè nengaʼa, gwoli nga. A patsna a vad ta pèvè dau te hedak.

³ Gar haha pana va ngaya, faɗda mbar a va, feda maslaka ngaya a va, a ko do a hedak nengaʼa. Aman ka ngreda na va ngaya a Boaz ɓai, ha a nʼnda skwai, a nsa skwai klèng ma!

⁴ Te deɓaʼa man a woya a nzhun ma, do a sam man a manahi a pa. Co maslaka auda a sam sak na, a ka manahi a hwaɗaʼa, a nengaʼa a da ngra ka skwi man ka da giaʼa.

⁵ A nengaʼa a mʼmbeɗa na a ma: Skwi tèlèba man ka gaɗayè, i woy a i giaʼa.

⁶ A nengaʼa a mdo a hedak, a ngau ara man mam baki na a njè na.

⁷ Aman Boaz a ndau a nsau skwi ma, a ndav nengaʼa a gi langlangaʼa, a mdo, a mʼmanahai a sam dau mɓicaʼa. A Ruth a mshkè zhèhèɗ zhèhèɗèʼa, a nco maslaka auda a sam sak Boaz, a mʼmanahi a pa.

⁸ A géɗ vad, Boaz, a ngu gurts kata. Aman a zurdo, a nrka ngwoz a sam sak na.

⁹ A ngaɗa: Ka wa? A nengaʼa a mʼmbeɗa na a ma: I Ruth, ɓèl ngaya. Vay ma maslaka ngaya a gèɗ, te man ka ndo man ka slaha a ka cyè.

¹⁰ A Boaz a ngaɗa: Ndo nzi pèc pè-cèk da pshè ka ma, a dem ga, ka gu zlau ɓai! Mwoy-ndo man ka woyè a vna a haha – a ka hi a verzi golahi azbai, ko ntawassaʼa, ko mèshèlè – ambahay holholaʼa, a fena man ka hünkoda vna.

¹¹ Anai dem ga, ka ga zlau ɓai! Skwi man ka woya tèlèba, i woy a i ga ka. Ko wawa te ndev ndohi gi ga a suna, ka ngwoz nlübokwaʼa.

¹² Anai a vava, i slaha a i ce ka. Aman gwoli ga ngiɗè azhè, man a slaha a nce ka nshèlèkuraʼa.

¹³ Nze ngaya a haha a vad haha! A prèk, aman a woya a nce ka, da ce ka. Aman a woya a nce ka ɓai, iyè i da ce ka, ara man Ndo nzi pèc pècèk a zhè a nshèffè a vava. Sèi ka nzhunè ha prèk.

¹⁴ A nengaʼa a nzhuna a sam sak na, ha prèk. A Boaz a nslambaɗa, a prèk vad, sam beng-bengaʼa, te man a huro, ngwoz a mshkè a hedak haha, ndo da senaha ɓai!

¹⁵ A Boaz a ngaɗa: Wuzheda maslaka ngaya haha a hai! A nengaʼa a nwuzheda a hai, a Boaz a nliveda agoda dau a pa mokwa, a mfa na a gèɗ. A Boaz a ndo na a deɓa a ngwai.

¹⁶ Aman Ruth a mshkè ngwai a sam mam baki na, nengaʼa a ndzhoɗa: Ka be ɗa, dem ga? A Ruth a nʼngreda na skwi tèlèba man masli sa a ngu a sam na.

¹⁷ A ngaɗa: A mpay dau agoda mokwa haha, a ngaɗa: Ko do a sam mam baki ngaya adi ɓai!

¹⁸ A Naomi a ngaɗa na: Anai nza a haha genè, dem ga, ha pats man ka da tsenaʼa, ma a gu kè? Masli sa a nzi na azbai, ha a ntsama ma haha klèng, ko a patsna ba.