Romans 1 - Ma Zhiklè

Mbalai

¹ Paul, ɓèl Yèsu Kristi, man Bi Zhi-klè a bahayè a ndo sak na, a nciyè auda man i njè ma mbelaʼa;

² ma mbelaʼa man a mpasla nga ri nshèlèkuraʼa te ma ndohi nhadka ma nengaʼa te ɗèlèwèr Zhiklè nkezlaʼa.

³ Ma mbelaʼa sa a géɗ kra nengaʼa (man ta yu ara ndo, te verzi David;

⁴ nengaʼa kra Zhiklè man Mè-zhèɓ Zhiklè nkezlaʼa a mva na wuɗai, a nslambaɗkaɗ na te ndev ndohi mʼmetsaʼa).

⁵ A géɗ Yèsu Kristi, Bi nga, nga ngots pombai, nga ngots mizlinè ndo sak, aman a nzlembaɗ nengaʼa ndohi herkeda tèlèba ta cè a ndav, a ta fi gèɗèʼa.

⁶ Kinè te Rome ba, te va tengaʼa. Yèsu Kristi a baha kinè,

⁷ Zhiklè a woy kinè tèlèba, a baha kinè a ndohi nengaʼa nkezlaʼa: Pombai a nda kinè, a gumi te Zhiklè, Bab nga, a Bi Yèsu Kristi.

Paul a woya a ndè Rome

⁸ Nshèlèkuraʼa i gi susai a Zhiklè ga te Yèsu Kristi a géɗ kin tèlèba; aman herkeda tèlèba a ntsena labar ma ncè-a-ndav kinè.

⁹ Zhiklè, nengaʼa man i gi mizlinè nengaʼa a ndav ga tèlèba, a i njè ma mbelaʼa a géɗ kra nengaʼa, a suna, a gi malwuɗi a géɗ ga: i hér kinè pèc pècèk,

¹⁰ a i tsi ri a géɗ kinè, a i jhèɗè aman i ngècè civèɗ ndè a sam kinè, man Zhiklè a woyaʼa.

¹¹ Mpataka kinè a keɗyè, a i woy a i dè a i va kinè skwi man Mèzhèɓ Zhiklè a mvayè, a kin ngècè wuɗai!

¹² A woy i zhè a sam kinè, aman nga bidè va nga te ncè-a-ndav nga.

¹³ I woya aman kin suna, dalahimam ga: pats ngiɗè i huro i gaɗa i dè a sam kinè, aman i ngècè skwi ntul mizlinè ga a sam kinè ba, lèmèlèmè ara man a sam ndohi herkeda ngiɗè; aman i ngatsa ria di ɓai.

¹⁴ Mizlinè ga, aman i njè ta ndohi Grec, a ndohi man ta Grec ka ɓai; a ndohi maya, a ndohi man maya ta azɓai.

¹⁵ Gar haha, man i slaha, i woy a i njè kinè ma mbelaʼa te kokwar Rome ba.

Wuɗi ma mbelaʼa

¹⁶ Aman i gi hori ma mbelaʼa azɓai. Nengaʼa wuɗi Zhiklè, man a mbel ta ndohi tèlèba, man ta cè a ndav; nshèlèkuraʼa ndohi Juif, te deɓaʼa ndohi man Juif ka ɓai.

¹⁷ Aman te ma mbelaʼa skwi nzuraʼa a Zhiklè a ngredè auda, skwi nzuraʼa man kin ngècè te ncè-a-ndav, aman kin dè a ma ma te ncè-a-ndav, ara man ta Windo: Ndo man a ngots ngi-zuraʼa, te ncè-a-ndav a da nzi a nshèffè.

Mali ndo

¹⁸ Ndzoan Bi Zhiklè a ngredè auda te zhiklè a géɗ ndohai, a géɗ skwi ambaɓiaʼa, a skwi nzura ka ɓi tengaʼa tèlèba. A skwi tengaʼa man zura ka ɓai, ta gseda ma nzuraʼa a hai.

¹⁹ Skwi man ndohi ta slaha ta shinè te Bi Zhiklè, ar ta suna; Bi Zhiklè a nʼngreda ta ma.

²⁰ Skwi Zhiklè, man ndo a slaha a nrka a di ɓai, ara wuɗi nengaʼa a mèdèp, ara ngi nengaʼa, ndo a shinè daga ngakaɗ herkeda, te skwi man Zhiklè a ngau. Gar haha Bi Zhiklè a jèke ta azɓai.

²¹ Ta suna, Bi Zhiklè a zhè, aman ta slébèrdè nengaʼa ara Zhiklè azɓai, ta ga na susi azɓai. Gar haha te skwi man ta hérèʼa ta zlak ta, a ndav tengaʼa, man a sun maya ɓai, nʼndha a ruva.

²² Ta fi va, ta hérèʼa, nga ndohi maya, a ta ndeda va ta a ndohi nrzlaʼa,

²³ a ta ngwoda nʼnjèl Bi Zhiklè man a ngwèdè azɓai, a skwi man lèmèlèmè ara ndo man a gédèsh na, ara ɗiakihai, a skwi ndzhamhai, a skwi nda a hwaɗhai.

²⁴ Gar haha, Zhiklè a njèke ta a ri ntétékè ndav ta, a skwi nlizhèa, a ta gedassa va ta a ri ta,

²⁵ a géɗ man ta ngwoda ma Zhiklè nzuraʼa a ncèkèlma, a ta kalahai a deɓ sak skwi nʼngaʼa, a ta gu ɓèl nengaʼa. Ta jèkeda Zhiklè, man a gu skwai, man nʼnjèlè nengaʼa a zhè a mèdèp. Amen.

²⁶ Gar haha Zhiklè a njèke ta a ri nté-tékè man hori a géɗèʼa. Ngwozi tengaʼa ta jèkeda civèɗ nyakaɗ ta, a ngwozi ta mènè a va ta,

²⁷ a ngurhi ta mènè a va ta. A ntétékè a vècè te ndav ta ara vogwa, a ta gi skwi hori a va ta, a ta ngècè kita ta arsa, a géɗ man ta beza zlawa.

²⁸ Arsa, a géɗ man ta huro nshin Zhiklè, skwi ambalai, Zhiklè a njèke ta a ri a maya tengaʼa ambaɓiaʼa, a ta gi skwi horai.

²⁹ Ndav ta nʼndha a skwi nzura ka ɓi tsaɗ tsaɗ tèlè, skwi ambaɓiaʼa, ngi keda, shèwa, ngi srak, nkéɗ ndo, ndzoan, ngi rai, nʼngwèdè ndo;

³⁰ ta ngrè ndo, ta tsi derngasl, ta derɗ Zhiklè, ndohi man ta gaɗa: nga ɓi wa? Ta fi va, ta tsi wai, ta hér skwi man ambaɓi tsaɗ tsaɗ, ta gi mèdègèɗ a sam bab ta a mam ta,

³¹ ta hér skwa azɓai, ta lèɓèsl ɓai, ta woy ndo ɓai, ndo a se ta te va azɓai.

³² Ta sun ma nkwèr Zhiklè, a ta suna, ndohi man ta gi skwi ambaɓia arsa, sèi ta ngècè kita mʼmetsi ta; aman ta giaʼa genè. Ta gia genè ka ɓai, aman ta nzala tengahia ba, a géɗ man ta giaʼa.