Psaumes 97 - Ma Zhiklè

¹ Ndo nzi pèc pècèk, bai! Herkeda da wuffa, herkeda man nte ndev iyam da wuffa!

² Vani nɗikɗikaʼa a tsagi nengaʼa; kita a ngi-zuraʼa nte verzi sam nʼnzi bi nengaʼa.

³ Vogwa a dè a ma na, a ndeda mayamhi a tsagi nengaʼa a ma.

⁴ Ndidiyam nengaʼa a hela gèɗ herkeda, herkeda a rkaʼa, a gudzai.

⁵ Za a wal na ara dazli vongwom, a sam di Ndo nzi pèc pècèk, a sam di Bai herkeda tèlèba.

⁶ Giɗfèk a njè ngi-zura nengaʼa, a ndohi herkeda tèlèba ta rka nʼnjèl nengaʼa.

⁷ Ndohi man ta gi vrai, ta ngècè hori a dai, tengaʼa tèlèba man ta jégèr va a géɗ mblom. Zhiklèhi tèlèba ta da gurɓèhai a sam Ndo nzi pèc pècèk.

⁸ Sion a tsenaʼa, a wuffè, dalahi Juda ta sli dimèsh a mwuffè, a gèɗ kita ngaya, Ndo nzi pèc pècèk.

⁹ Aman ka Ndo nzi pèc pècèk, ka zhè a gèɗ herkeda tèlèba, ka mbiaʼa a fena zhiklèhi tèlèba.

¹⁰ Mandalahi Ndo nzi pèc pècèk, skwi man ambaɓai da ndara kinè! Ndo nzi pèc pècèk a ɓer nshèffè ɓèlèlihi nengaʼa, a preka ta auda te ri ndohi ambaɓihiaʼa.

¹¹ Skwi nhél sam a vèngè a rido nzuraʼa. Mwuffè a gi a sam ndohi man ndav ta tsarayaʼa.

¹² Kin ndohi nzuraʼa, va-wuffa a géɗ Ndo nzi pèc pècèk, va-shüd gèɗ a nzlembaɗ nengaʼa nkezlaʼa!