Psaumes 62 - Ma Zhiklè

¹ Njè ma David.

² Sèi a sam Bi Zhiklè staɗgenè, sam man ndav ga a shèk va a pa; skwi mbelyè a shkè te nengaʼa.

³ Sèi nengaʼa sam ga ngedeng-gedengaʼa, a skwi mbelyè, gi ga ndakmaʼa. I giɗè va azɓai.

⁴ Nʼnzi tèkè kin humda na va a géɗ a ndo staɗ; kin tèlèba, kin woy a kin kèldè a hai, ara dergai man a hejèkè, ara zlazlar man ta mbèɗèʼa.

⁵ Ta vhè ma, ta woy a ta zukdahai a sam nʼnzi na; ncèkèlma ambaha ta. Ta pshè ka ma a ma, te ndav ta tʼhwaɗaʼa ta phomde ka.

⁶ Ndav ga, sok va a sam Bi Zhiklè staɗgenè, skwi man i zhèrè te ndav a shkè te nengaʼa.

⁷ Sèi nengaʼa sam ga ngedeng-gedengaʼa, a skwi mʼmbelyè, gi ga ndakmaʼa, i giɗè va azɓai.

⁸ Skwi mbelyè, a nʼnjèl ga, sèi a sam Bi Zhiklè. Sam ga ngedeng-gedengaʼa man a vay wuɗai, sam ga nlèaʼa, a sam Bi Zhiklè.

⁹ Kin mpi ndohi tèlèba, va-pu ndav a nengaʼa pèc pècèk, va-hada na ndav kinè! Bi Zhiklè sam nga nlèaʼa.

¹⁰ Ndohi herkeda, nara kozlar genè, ndohi herkeda, ta mbed ndo. Ta njèlè a kilo azɓai, kafkarawaʼa, lèmèlèmè ara kozlar man nzal ɓai.

¹¹ Kin fu gèɗ a wuɗi kinè ɓai, kin hur a géɗ skwi man kin da hilè a wuɗi ɓai! Aman mèshèlè kinè a grè a ma ma, da gso ndav kinè ɓai!

¹² Bi Zhiklè a goɗ sak staɗ, i tsena sak cèw aranta: Sèi Bi Zhiklè staɗ a nʼngots wuɗai.

¹³ Ka, Bai, Zhiklè, pombi ngaya a zhè; a ka va na ndo staɗ staɗ tèlèba ara skwi man a gau.