Psaumes 57 - Ma Zhiklè

¹ Dimèsh mpi ndav a Zhiklè. Man a David, a pats man a nʼnghede va na a gi za, a géɗ Saul.

² Bi Zhiklè, i da se ka te va, i da se ka te va! Nshèffè ga a zhè tʼhwaɗ ri ngaya. I nghede va ga tʼhwaɗ kelpasl ngaya, ha skwi mwuɗitpa a ndev na.

³ I tsi ri a Bi Zhiklè, Zhiklè te géɗèʼa, Zhiklè man a gay skwi man amba.

⁴ A da zlindko gol nengaʼa te zhiklè a nda takahayè a sam ndohi man ta vèɗè htsan a iyè. Bi Zhiklè a da zlindko pombai a ngi-zura nengaʼa.

⁵ Sam mʼmènè ga ngiɗè azɓai, sèi te ndev marizhèlèhai, man ta ndi ndo. Zlèʼèn tengaʼa nara sulom a tsakwal, nèʼèn tengaʼa nara kafahi gwèsh ntaslaʼa.

⁶ Bi Zhiklè, da nza a gèɗ skwi tèlèba, ngreda nʼnjèl ngaya auda a sam herkeda tèlèba!

⁷ Ta til gadda a hi a ma sak ga, ta mbeɗamay ndav, ta ray vèvèɗ a hai a ma ga, a tengaʼa ta kal ta a pa a ri ta.

⁸ Bi Zhiklè, ndav ga ntila, ndav ga ntila! I woy a i sli dimèsh a i tsi ganzavar.

⁹ Ndav ga, wosla va; ganga a ganzavar, va-slha! I woy a i baha na nhél sam prèk.

¹⁰ Bai, Zhiklè, i woy a i shida ka gèɗ te ndev ndohi herkeda. I woy a i sli dimèsh a ka te ndev kokwar bihai.

¹¹ Aman pombi ngaya mbiaʼa a dè zhiklè, nlèɓèslè ngaya mbiaʼa a dè a va vanai.

¹² Bi Zhiklè, da nza a géɗ skwi tèlèba, ngreda nʼnjèl ngaya auda a sam herkeda tèlèba!