Psaumes 38 - Ma Zhiklè

¹ Psaume David. Aman ndohi ta hérèʼa.

² Ndo nzi pèc pècèk, ka gay ndzoan a ndav ɓai, ka gay matakwan a ndzoan ɓai!

³ Sulom ngaya a ntezyè, ri ngaya a nzalay a gèɗ.

⁴ Va ga tèlèba a dzayè, a géɗ ndzoan ngaya; wuɗi va ga asaɓai a géɗ mali ga.

⁵ Mali ga a mbèy gèɗ a pa, a hurvyè ara skwi man a nzalayè.

⁶ Mblè ga a zhkè, a tsi voroɓ, a géɗ tali ga.

⁷ I kala tʼhai, i slaha a i cè gèɗ a zhiklè ɓai. A prèk, ha a ndè ma dakwaɗ, i lèyè genè.

⁸ Géd godor a dzahayè ara vogwa, va ga tèlèba a dzayè.

⁹ Wudi ga azɓai, skwi ngiɗè a nkaldyè a hai. Kud ga a fena kuɗ marizhèlè.

¹⁰ Ndo nzi pèc pècèk, skwi tèlèba man ndav ga a woyaʼa, ka suna. Nlèyè ga nʼngheda a sam ngaya ɓai.

¹¹ Ndav ga a gècè, wuɗi ga a mwuc na, i rka di ɓai.

¹² Mandalahi ga, nslamgihi ga, ta zlatsa dra a sam ga, gwoli ga ta shkè a sam ga azɓai.

¹³ Tengaʼa man ta woy a ta zeday nshèffè ga, ta ngay ɓali a hai; tengaʼa man ta woy a ta gay matakwan, ta tsay drengasl; ta hérè ara man ta gedassyè, pèc pècèk.

¹⁴ Aman iyè ara ndaɓazlam man a tsena zlembaɗ ɓai, ara ndaɓazlam man a gèɗè azɓai.

¹⁵ Iyè ara ndo man a tsena zlembaɗ ɓai, man i slaha a i mindè ma a deɓa ɓai.

¹⁶ Ndo nzi pèc pècèk, i gshè ndav ga a ka Ndo nzi pèc pècèk, Zhiklè ga, ka da mbeɗkay a ma!

¹⁷ I gaɗa: Da wuffa a géɗ ga ɓai! Da fu va ɓai, aman sak ga a fèdè.

¹⁸ Ndul ndul ma i kèlèhai, a skwa a dzayè lèk lèk.

¹⁹ Halau, i ngreda maharam ga, i kuɗi a géɗ mali ga.

²⁰ Tengaʼa man tagi shèwa a iyè, wuɗi ta a zhè. Ta kumba man ta gi mayamhi ga ambalai,

²¹ man ta pelay skwi man amba a skwi man ambaɓai, man ta woyè ɓai, a géɗ man i jèjèr skwi man amba.

²² Ndo nzi pèc pècèk, ka jèkyè ɓai! Zhiklè ga, ka nze dra a sam ga ɓai!

²³ Vaska va a ka takahayè, Bai – Zhiklè – ndo mbelyè!