Psaumes 31 - Ma Zhiklè

¹ Psaume David.

² Ndo nzi pèc pècèk, i pi ndav a ka, ka pay hori a di bai, pèc pècèk ba; takahayè te ngi-zura ngaya,

³ fu zlembaɗ a ma ga! Prekay auda tsam-tsam, Ndo nzi pèc pècèk; nde ngaya a hwaɗ zlazlar a i nzi a hwaɗaʼa, ara gi bai man wuɗi na zhè, a i hi a pa.

⁴ A vava, ka sam ga ngedeng-gedengaʼa, ka gi ga ndakmaʼa, ka cèy ma a civèɗ a géɗ nzlembaɗ ngaya.

⁵ Ka da pryè auda te ɓalai, man ta ngay a hai a metsar, aman ka sam ga nlèaʼa.

⁶ I va ka nshèffè ga a ri a ka. Ndo nzi pèc pècèk, ka Zhiklè nlèɓèslèa, ka sumkay a deɓa.

⁷ Ndohi man ta gshè va a vrai, ta am-baha ka ɓai. Aman iyè, i gshè va a Ndo nzi pèc pècèk.

⁸ I woy a i gi langlangaʼa a i wuffè a géɗ pombi ngaya, te man ka rka matakwan ga, a ka hur nlèyè ga te ndav.

⁹ Ka viyè a ri mayamhi ga ɓai, a ka vay sam mbiaʼa, a sak ga a nshèwèlè a pa!

¹⁰ Ndo nzi pèc pècèk, i da se ka te va, i gi zlau. Di ga nkerwazla ma, ndav ga mʼmbeɗ na, va ga nhom na te ri nlèyè.

¹¹ A vava matakwan a vasedayè nshèffè ga, a nshèffè ga a ndev na te man i kuɗai. Nlèyè a herdahayè, a paslay vatasl a va.

¹² I ndara ta mayamhi ga, nslamagi ga a ngwossayè, mandalahi ga ta gi zlau a sam ga. Ndohi man ta ngatsyè a civèɗ, ta hi ta a iyè.

¹³ I pca ta a gèɗ a ndohai ara ndo man a mʼmets na ma; iyè ara shiɗèf mbazlaʼa.

¹⁴ Halau, i tsena ara man ta ngryè. Zlau mbiaʼa a tsagi ga. Ta tèlèba ta vhè ma a géɗ ga, ta woy a ta zeday nshèffè ga.

¹⁵ Aman iyè, i pi ndav a ka, Ndo nzi pèc pècèk. I gaɗa: Ka Zhiklè ga.

¹⁶ Nshèffè ga te ri ngaya, mbelyè te ri mayamhi ga, te ri ndohi man ta parahayè.

¹⁷ Di ngaya da hela na sam a ɓèl ngaya, takahayè te pombi ngaya!

¹⁸ Ndo nzi pèc pècèk, ka pay hori a di ɓai, aman i tsi ri a ka. Ndohi ambaɓihiaʼa da ngots hori a dai, do do a vèvèɗ a ta gèɗè asaɓai.

¹⁹ Pizlèma ta ma a ndohi ncèkèlma, man ta gèɗè ma ambaɓiaʼa a géɗ ndo nzuraʼa, a ta fi va a ta ɓeslaha dai.

²⁰ Ngi-amba ngaya mbiaʼa, man ka fe-dahi a géɗ tengaʼa man ta gi zlau ngaya, man ka ngra ta auda a ndohi herkeda tèlèba, man ta pi ndav a ka.

²¹ Ka nza ta a dai a géɗ ndohi man ta paraha ta. Ka ɓer ta te gi ngaya, te ri ndohi man ta gi bazlazlam.

²² Ngo-slubordokoy Ndo nzi pèc pècèk! Aman nengaʼa a mvay pombi nengaʼa mbiaʼa a pats mwuɗitpa.

²³ A pats man ndav ga a mʼmbeɗ na, i gada: Ka kaldyè aussa a sam di ngaya. Aman a vava ka tsena ntsi ri ga mbuh-mbuhaʼa, aman i kuɗau a sam ngaya.

²⁴ Va-woy Ndo nzi pèc pècèk, kin ndohi nengaʼa nkezlaʼa tèlèba! Ndo nzi pèc pècèk a ɓer ta ndohi nlèɓèslèhiaʼa; aman ndohi nfi va a pel ta a skwi ambaɓiaʼa.

²⁵ Va-mana ndav kinè, vanza taraʼa, kin tèlèba man kin fu gèɗ a Ndo nzi pèc pècèk!