Psaumes 22 - Ma Zhiklè

¹ Psaume David.

² Zhiklè ga, Zhiklè ga, ka jèkyè èhèmè? I kuɗai; aman ka dra a sam ga.

³ Zhiklè ga, i kuɗi a pats, a ka mbeɗay a ma azɓai. Ko a vaɗ i jèkeda mbèhè azɓai.

⁴ Aman ko ar haha, ka nza ara bai, ka Zhiklè nkezlaʼa, a dimèsh man Israel a slèbardé ka a vna, a dè a sam ngaya.

⁵ Babhi nga ta pu ndav a ka, te deɓaʼa ka takaha ta.

⁶ Ta kuɗau a sam ngaya, a ka mbel ta. Ta pu ndav a ka, a ta ngatsa hori a di ɓai.

⁷ Aman iyè, i meturdi genè, i ndo ka ɓai, skwi man ndohi ta livèʼa a ta kwolaʼa.

⁸ Tèlèba man ta rkayè, ta livyè, ta ngwossahayè, ta giɗè géɗ kwotakwo aʼa, ta gaɗayè:

⁹ Nengaʼa a mpu ndav na a Ndo nzi pèc pècèk. Ndo nzi pèc pècèk da takaha, da mbelaʼa; aman nengaʼa ambaha!

¹⁰ Ka, ka ckay auda tʼhwaɗ mam ga. Ka fyè a wa mam ga.

¹¹ Man i tʼhwaɗ mam ga dai, va ga te ri ngaya ma. Ka Zhiklè ga daga man i tʼhwaɗ mam ga dai.

¹² Ka nza dra a sam ga bai, aman matakwan a zhè ndul ndul, ndo ntakahayè azɓai.

¹³ Mayamhi kumba ta zhè a tsagi ga, ta ara kevarhai mbibihiaʼa, ta tèudyè a pa.

¹⁴ Ta winkoy ma tengaʼa a gèɗ, ara marizhèlè man a kuɗkaɗa a rai, a woy a ndi zluèɗ.

¹⁵ Iyè ara iyam man mbaɗa tʼhai. Va-taslhi ga ta verzl ta. Tukwal a te ndav ɓai.

¹⁶ Wudi ga ngwora ara nkulama, nèʼèn ga ntkots na a ngerɗak, a ka mandyè a va vodzok mʼmetsai.

¹⁷ Ndohi ambaɓihiaʼa ta a tsagi ga, nrubi ndohi nderkèzhè a tèudyè a pa. Ta tuzo rihi a sakhi ga.

¹⁸ I slaha a i ngrè vataslhi ga tèlèba. Aman tengaʼa ta pakay dai, ambaha ta.

¹⁹ Ta kezli maslaka ga a va ta, ta gi jimèr a géɗ da war ga.

²⁰ Aman ka, Ndo nzi pèc pècèk, ka nza dra bail Zhiklè, wuɗi ga, vaska va aman ka takahayè!

²¹ Mbel nshèffè ga te ri tsakwal, skwi ga mbelaʼa te ri ndohi ambaɓihiaʼa.

²² Mbelyè te ma marizhèlè, mbelyè te ri kevarhai!

²³ I woy aman i njè nzlembaɗ ngaya a sam kramamhi ga. I woy aman i nzal ka te ndev mpi ndohi Zhiklè.

²⁴ Va-nzala Ndo nzi pèc pècèk, kin man kin slébèrdèʼa a zlau. Tser Jacob tèlèba do slubordo nengaʼa, tser Israel da gu huyokokoʼa a sam na.

²⁵ Aman nengaʼa a nkwola matakwan ndo ntawassaʼa ɓai, matakwan a ndara na ɓai, a ngheda di nengaʼa a sam na ɓai. A tsenaʼa, man a kuɗi a sam nengaʼa.

²⁶ I woya man a i slébèrdè ka te ndev ndohi Zhiklè mɓicaʼa a vata. I woya man a i gi ara ma ga man i gaɗda hai a sam di tengaʼa man ta slébèrdèʼa a zlau.

²⁷ Ndohi man ta manda ta gèɗ a hai, ta da ndi skwai a ta ngézhè. Ndohi man ta woya Ndo nzi pèc pècèk, ta da shida na gèɗ. Ndav kinè da nza a nshèffè a mèdèp!

²⁸ Ndohi tʼherkeda tèlèba ta da her Ndo nzi pèc pècèk, a ta menkaɗa deɓa a sam na, a verzi ndohi herkeda tèlèba ta da kèlèhi a deɓ sak nengaʼa.

²⁹ Aman kokwar-bai a Ndo nzi pèc pècèk, a nengaʼa a gi bai a géɗ ndohi herkeda.

³⁰ Ndohi tèlèba man nshèffè ta a ndev na, ta da gurɓèhai a sam nengaʼa genè. A ndohi man ta dè a sam mʼmetsai, ta da kèlèhi a deɓ sak nengaʼa tèlèba.

³¹ Wudahi ga ta da gi mizlinè nengaʼa, ta da njè ma Ndo nzi pèc pècèk a sam ndohi te verzi wud wuda.

³² Ta da shkè a ta njè ngizuraʼa nengaʼa a sam ndohi man ta ya di ɓai: Ndo nzi pèc pècèk a ngau.