Psaumes 21 - Ma Zhiklè

¹ Psaume David.

² Ndo nzi pèc pècèk, bai a wuffè a gèɗ wuɗi ngaya, a gèɗ skwi man ka takaha a vna; a wuffè a vata.

³ Ka va na skwi man ndav nengaʼa a woyaʼa, a skwi man a ndzhodo.

⁴ Ko do a sam na a mpshè ma a manam, ka pada na gèɗ a guro.

⁵ A ndzhodo nshèffè te ri ngaya, ka va na; ka va na nshèffè mbiaʼa man a ndiv azɓai a mèdèp.

⁶ Nʼnjèl nengaʼa mbiaʼa, a gèɗ man ka takaha. Ka va na nʼnjèl-bai, a ka gaʼa a mbiaʼa.

⁷ A vava, ka gaʼa a skwi malwuɗi mpshè ma a mèdèp. Ka va na mwuffè a ndav a sam di ngaya.

⁸ Halau, bai a pi ndav a Ndo nzi pèc pècèk. A gèɗ pombi Zhiklè te géɗèʼa a kèlèhi azɓai.

⁹ Ri ngaya da par ta mayamhi ngaya tèlèba. Ri mandi ngaya da par ta tèlèba man ta ga ka shèwa!

¹⁰ Ka da ga ta ara skwi man ta viɗè te gezla, a pats man ka shkè, Ndo nzi pèc pècèk. Ndzoan Zhiklè a da ndev ta, vogwa a da nde ta ma.

¹¹ Ka da gedassa verzi tengaʼa tʼherkeda, a tser tengaʼa te ndev ndohi tʼherkeda.

¹² Aman ta vhè ma a gèɗ ngaya, ta peda va ta a wai a ngi skwi man ambaɓai, ta slaha ta gia ɓai.

¹³ Aman ka cè lèkèɗ ngaya a ka livè a di ta, ka fa ta ma a ngwai.

¹⁴ Ndo nzi pèc pècèk, slambaɗa a wuɗi ngaya, a nga woy a nga sli dimèsh a nga slébèrdè nʼnjèl ngaya.