Psaumes 18 - Ma Zhiklè

¹ Man a David, ɓèl Ndo nzi pèc pècèk, man a sla na dimèsh a Ndo nzi pèc pècèk, a pats man Ndo nzi pèc pècèk a mʼmbelkoɗauda te ri mayamhi nengaʼa tèlèba, te ri Saul ba, a ngaɗa:

² Ndo nzi pèc pècèk, i woy ka, ka wuɗi ga!

³ Ndo nzi pèc pècèk, sam ga ngedeng-gedengaʼa, gi ga ndakmaʼa, ndo mʼmbelyè. Zhiklè ga, sam ga nlèaʼa, man i pi ndav a vna, gambar ga a wuɗi man a mbelyè, sam man i hi a pa.

⁴ I bèhè: Ndo nzi pèc pècèk, amba man i shida ka gèɗ, te man i mbel ga te ri mayamhi ga ma.

⁵ Mʼmetsai a tèudyè a pa, skwi man a gedassyè a hakaɗi ara iyam, a mpray zlau a va.

⁶ Teɓa mʼmetsai a ndzawyè, gadda mʼmetsai a ngsyè.

⁷ Aman i gu zlau, i tsu ri a Ndo nzi pèc pècèk, a i kuɗau a sam Zhiklè ga. A nengaʼa a ntsena daʼai ga te gi nengaʼa, a kuɗ ga a ntsena na a zlembaɗ.

⁸ Herkeda a ngede va, gagagaʼa, a verzi giɗfèk a ngudzau, ta giɗè va a gèɗ ndzoan Zhiklè.

⁹ Vodzok a mshkè auda tʼhtsan nengaʼa, a vogwa man a ndi skwai ngatngataʼa te ma nengaʼa, a vogwa a mwurtskaɗauda te pa.

¹⁰ A nhejèkeda giɗfèk, a mshkèhai, ruva vanai tʼhwaɗ sak nengaʼa.

¹¹ A nʼnza a deɓ chérubim, a nhau, a hi ara kozlar, ara man kelpasl a va.

¹² A mpizlè te pa a ruva, ara man te gai, ruva iyam a vani tèdèɗikɗikaʼa.

¹³ Nengaʼa a nsu dai, a vani a nʼngelaʼa, a vandzal a vogwa a nwurtskaɗauda te pa.

¹⁴ Ndo nzi pèc pècèk a ngu aman iyam a ntsi te giɗfèk; te géɗèʼa a nslheda daʼai nengaʼa.

¹⁵ A mɓorko sulom nengaʼa, a ndzar ta ndohai, a nzlündkoɗi ndidiyam, a ndzam ta.

¹⁶ Tʼhwaɗ iyam mbiaʼa di a rkè a pa, verzi herkeda a rkè, a sam ndzoan Ndo nzi pèc pècèk, a sam man a vèɗè htsan.

¹⁷ A ntorko ri a hi te géɗèʼa, a ngsyè, a nckay auda te va iyam mbiaʼa.

¹⁸ A ngezlkay auda te ri mayam ga man wuɗi na zhè, te ri ndohi shèwa man ta fenyè a wuɗai.

¹⁹ Ta kalay a va a pats matakwan ga; aman Ndo nzi pèc pècèk a nzalyè,

²⁰ a ndyè auda a dala, a mprekay auda, a géɗ man i ambaha.

²¹ Ndo nzi pèc pècèk a ngayè ara ngizura ga, a mpelyè, te man ri ga mpana.

²² I dzodzor civèɗ Ndo nzi pèc pècèk, a i ga malai a i jèkeda Zhiklè ga ɓai.

²³ Halau, ma nkwèr nengaʼa tèlèba i ngots a sam di ga, a i kwola ma kita nengaʼa ɓai.

²⁴ I ga mali a sam nengaʼa ɓai, i ɓer ndav ga te ri malai.

²⁵ A géɗ nengaʼa Ndo nzi pèc pècèk a mpelyè ara ngi-zura ga, a géɗ man ndav ga mpana a sam di nengaʼa.

²⁶ Ndo man ndo a sia te va, nengaʼa a da se ka te va. A sam ndo nzuraʼa, ka gi zuraʼa.

²⁷ A sam ndo ndzuwaɗaɗaʼa, ka gi skwi ndzuwaɗaɗaʼa. A sam ndo ambaɓiaʼa, ka gi skwi ambaɓiaʼa.

²⁸ Halau, ka takaha ta ndohi man ndohi ngiɗè ta zumda ta gèɗ. Aka manda na gèɗ a hai a ndo nfi va.

²⁹ Ka skwi nhél sam ga. Ndo nzi pèc pècèk, Zhiklè ga, a helay sam te ruva.

³⁰ Nga a ka, i mbeda sam nʼngalaʼa. Nga a Zhiklè ga, i nzevi auda a géɗ zlazlar.

³¹ Civèɗ Zhiklè, amba zuraʼa. Ma Ndo nzi pèc pècèk, zuraʼa, njkeda ma. Ko wawa man a pi ndav a vna, gambar na.

³² Zhiklè wa? Sèi Ndo nzi pèc pècèk. Sam ngedeng-gedengaʼa ngiɗè azɓai, sèi Zhiklè nga.

³³ Zhiklè man a vay wuɗi a va, man a lèmdè civèɗ ga saraʼa,

³⁴ man a nzalay sak ga a i hi ara mènèɗ, man a zlatsedyè a géɗèʼa,

³⁵ man a senda ri ga a i gi var, a senda ri ga a i lètè lèkèɗ züdo.

³⁶ Ka vay gambar skwi mʼmbel ndo ngaya. Ri mandi ngaya a nzalyè. Pombi ngaya a gyè a ndo mbiaʼa.

³⁷ Ka tilay sam man i mbècè a pa, a sak ga a fèdè azɓai.

³⁸ I hi a verzi mayamhi ga a i gedas ta; i minè a deɓa azɓai, sèi i ndev ta.

³⁹ I keɗ ta a hai, a ta slèmbèɗè te deɓaʼa asaɓai, a ta kalahi a hwaɗ sak ga.

⁴⁰ Ka vay wuɗi a va a ngi var. Ka manda ta gèɗ a hai a ndohi man ta slambaɗkay a va.

⁴¹ Ka gi a mayamhi ga ta hi ta a iyè, a ndohi man ta gi shèwa a iyè, i gedas ta.

⁴² Ta tsi lalau — ndo ntakaha ta azɓai — Ndo nzi pèc pècèk a tsena kuɗ tengaʼa azɓai.

⁴³ I kérzh ta ara mberfenèk herkeda, a kozlar a nhilèʼa; i wushede ta aussa ara koskosai a civèɗ.

⁴⁴ Ka mbelyè a sam var ndohai; ndohi herkeda ta gurɓahi a sam ga, a ndohi man i sen ta ɓai ta gi a ɓèl ga.

⁴⁵ Ndohi verzi ngiɗè ta gi huyokokoʼa a sam ga; ta tsena ma ga, a ta fi gèɗ a ma ga langa.

⁴⁶ Ta kèlèhai, a ta shkè auda a sam manta ngheda va ta a pa, a ta gudzai.

⁴⁷ Ndo nzi pèc pècèk a zhè a nshèffè. I shid gèɗ a nengaʼa, sam ga ngedeng-gedengaʼa. I nzala Zhiklè man a mbelyè.

⁴⁸ Zhiklè a pelay di man a ga, a nge ta ndohi a ɓèlèlihi ga.

⁴⁹ Ka man ka mbelyè te ri mayamhi ga, a ka slambaɗay gèɗ a sam ndohi shèwa ga, ka prekay auda te ri ndohi wuɗai.

⁵⁰ A gèɗ nengaʼa i woy a i shida ka gèɗ, Ndo nzi pèc pècèk, a i sli dimèsh a i slébèrdè nzlembaɗ ngaya a sam ndohi herkeda.

⁵¹ Ka man ka va na skwi mʼmbel ndo mbiaʼa a bi ngaya, a ka va na pombai a ndo ngaya man ka bada na mbar a gèɗ, David a ndohi gi nengaʼa, a mèdèp.