Psaumes 147 - Ma Zhiklè

¹ Alléluia! Va-shüd gèɗ a Ndo nzi pèc pècèk, aman nasa amba. Amba aman nga slébèrdè Zhiklè nga a dimèsh, a nga shida na gèɗ.

² Ndo nzi pèc pècèk a da dadaya Jerusalem zaʼa, a da helka ta ndohi Israel a deɓa zaʼa.

³ Nengaʼa man a menda na wuɗi a pa a ndo man ndav na a mbeɗè, a mènè mblè tengaʼa.

⁴ A nger bantihai, a baha ta staɗ staɗ tèlèba a nzlembaɗ ta.

⁵ Bai, Zhiklè nga, mbiaʼa, wuɗi na zhè a vata, ngima nengaʼa azɓai.

⁶ Ndo nzi pèc pècèk a slambaɗda ta gèɗ a ndohi man ta manda ta gèɗ a hai, a wushede ta ndohi ambaɓihiaʼa a hai.

⁷ Va-fu dimèsh nshid gèɗ a Ndo nzi pèc pècèk, va-tsa na ganzavar a Zhiklè nga!

⁸ Nengaʼa man a pizlè giɗfèk a va-nai, nengaʼa man a goko na iyam a herkeɗa, nengaʼa man a gi a kuza a fcè a gèɗ za, a lak te di man a ndohai.

⁹ Nengaʼa man a va ta skwi nʼndai a skwi ndzham, a wud ɗiakihai man ta kuɗai.

¹⁰ Nengaʼa a nhur a gèɗ wuɗi plèsh ka ɓai; a wuffè a gèɗ ɓorom sak nguraʼa ka ɓai.

¹¹ Skwi man Ndo nzi pèc pècèk a wuffè a géɗèʼa: ndohi man ta gi zlau Zhiklè, a ndohi man ta zhèr pombi nengaʼa.

¹² Jerusalem, slubordo Ndo nzi pèc pècèk! Sion, slu dimèsh nshid gèɗ a Zhiklè ngaya!

¹³ Aman nengaʼa a dizla skwi mɓara ntamagi ngaya ngedeng-gedengaʼa, a pshè ta ma wudahi a sam ngaya.

¹⁴ Nengaʼa man a vi gumai a ndikè-ma a kuma ngaya, a va ka géɗ dau a ka ngézhè a vna.

¹⁵ Nengaʼa man a zlindè ma nengaʼa a herkeda, a ma nkwèr nengaʼa a hai.

¹⁶ Nengaʼa man a vi vandzal ara krengaz, a minmèn ara mèrwèc.

¹⁷ A wushedeko vandzal mbibihiaʼa ara krengaz; nslaha mtasl nengaʼa wa?

¹⁸ A zlindè ma nengaʼa, a ndè wyam vandzal aussa; a zlindko kozlar nengaʼa, a ncko iyam.

¹⁹ A ngra na ma nengaʼa a Jacob, a ma nengaʼa man a de nga, a ma kita nengaʼa, a Israel.

²⁰ A ngau arsa a sam ndohi herkeɗa ngiɗè ɓai, a mva ta ma kita nengaʼa a tengaʼa ɓai. Alléluia!