Psaumes 144 - Ma Zhiklè

¹ Dimèsh David. I shid gèɗ a Ndo nzi pèc pècèk, sam ga ngedeng-gedengaʼa, a senday ngi var, a senday nlètè lèkèɗ.

² Nengaʼa sam ga níèaʼa, gi ga ndakmaʼa, gi ga te za, ndo mbelyè. Gambar ga man i nghede va ga a diaʼa, nengaʼa man a mpe ta ndohi herkeɗa a hwaɗ ri ga.

³ Ndo nzi pèc pècèk, ndo be mè, aman ka sun nengaʼa? Wud ndohi wa, aman ka hér ta?

⁴ Ndo nara kozlar, pats nshèffè nengaʼa nara mèzhèɓ man a zi na.

⁵ Ndo nzi pèc pècèk, hejèkda giɗfèk a ka shkè a hai! Lama na za, a vodzok a shkè auda!

⁶ Gau ndidiyam a ka venda ta gèɗ a mayamhai, ɓar ta a sulom a ka dzam ta!

⁷ Torko ri a hi te géɗèʼa, mbelyè, prekay auda te va iyam mbiaʼa, te ri ndohi kokwar man verzi ta tsaɗ,

⁸ man ta cèkèlma, man ta mbèɗè a ncèkèlma.

⁹ Bi Zhiklè, i woy a i sla ka dimèsh mɓuaʼa, i sli a deɓ ganzavar man mar a pa 10;

¹⁰ ka, man ka ge ta bihi a ngulaʼa, man ka mbela David, ɓèl ngaya.

¹¹ Mbelyè te ri tsakwal mʼmetsai, ckay auda te ri ndohi man verzi ta tsaɗ, man ta cèkèl-ma a ta mbèɗè a ncèkèlma.

¹² Wudahi nga ta gra gurguraʼa te gola, dalahi nga saɗsaɗaʼa ara ri ma gi bai.

¹³ Wov nga nʼndha, a skwi nʼndi te pa tsaɗ tsaɗ. Tambakihi nga ta mènè a vata rèdèdèa, ta ndev ɓai rèdèdèa te dak.

¹⁴ Zlèhi ta yi wud kumba, ta mèn kra a hi azɓai, mʼmetsi az a sam nga ɓai, lalau az a sam nga ɓai.

¹⁵ Mwuffè a sam ndohi kokwar man skwi a gi arsa a sam ta. Mwuffè a sam ndohai man Ndo nzi pèc pècèk Zhiklè tengaʼa!