Psaumes 143 - Ma Zhiklè

¹ Psaume David. Ndo nzi pèc pècèk, tsena ntsi ri ga! Fu zlembaɗ a mbèhè ga! Mbeɗkay a ma a gèɗ pombi te ngi-zuraʼa ngaya!

² Iyè, ɓèl ngaya, ka diyè a kita ɓai! Te man te va ndohi man ta zhè a nshèffè, ndo man zuraʼa a sam di ngaya azɓai.

³ Ndo mayam a woy a zeday nshèffè ga, a nkaldyè a hai, a nzedyè a va ruva ara ndohi mʼmetsaʼa a mèdèp.

⁴ Wudi ndav ga azɓai; te ndav ga i gudzai.

⁵ Skwi nhalaʼa a hakay a gèɗ, i hér skwi man ka gokoɗai, i hérè te ndav a géɗ mizlinè ngaya.

⁶ I thè ka rai, ndav ga a woy ka, ara herkeda ngwora man a woy iyam.

⁷ Ndo nzi pèc pècèk, mbeɗkay a ma tsam-tsam, mèzhèɓ ndo a te iyè asaɓai. Ka nghede di ngaya a sam ga ɓai, man ɓai i da gi lèmèlèmè ara tengaʼa man ta dè vèvèɗ.

⁸ Vay pombi ngaya a prèk langa; aman i pi ndav a ka. Ngray civèɗ man ka woy a i dè a pa; aman i va ka nshèffè ga a ri a ka.

⁹ Ndo nzi pèc pècèk, prekay auda te ri ndohi mayamhi ga! I ngheda va ga a sam ngaya.

¹⁰ Sendayè, aman i gi skwi man ka woyaʼa; aman ka Zhiklè ga. Mèzhèɓ ngaya man amba da cèy ma a civèɗ fèhaʼa.

¹¹ Ndo nzi pèc pècèk, ɓür nshèffè ga a géɗ nzlembaɗ ngaya. Te ngi-zuraʼa ngaya ka da ckoy nshèffè ga auda te va skwi mwuɗitpa.

¹² Te pombi ngaya ka da ndevda mayamhi ga, ka da zede ta ndohi nʼngay matakwan tèlèba, te man iyè, i ɓèl ngaya.