Psaumes 116 - Ma Zhiklè

¹ I woy Ndo nzi pèc pècèk a ndav ga, aman nengaʼa a tsena daʼai ga, aman i kuɗi a sam na.

² A nfu zlembaɗ a ma ga. I da tsi ri a nengaʼa, ha nshèffè ga a nʼndev na.

³ I kala a gadda mʼmetsai, zlau sam mʼmetsai a ngsyè; zlau mʼmetsai a lèydyè, a dzay te ndav.

⁴ Aman i tsu ri a nzlembaɗ Ndo nzi pèc pècèk: Wa Ndo nzi pèc pècèk, kam kam mbelay nshèffè ga!

⁵ Pombi Ndo nzi pèc pècèk a zhè; Ndo nzi pèc pècèk zuraʼa, Zhiklè nga, ndo a sia te va.

⁶ Ndo nzi pèc pècèk ɓer ndohi man ta her mali azɓai. Iyè, wuɗi ga azɓai, a nengaʼa a ntakahayè.

⁷ Menkada deɓa, ndav ga, a ka sok va, aman Ndo nzi pèc pècèk a nʼnga ka skwi man amba.

⁸ A géɗ man ka mbelkay nshèffè ga auda te mʼmetsai, a ka sahay kuɗa auda a dai, a ka ɓer sak ga aman a i kèlèhi azɓai,

⁹ i dè a di Ndo nzi pèc pècèk, tʼherkeda man ndohi ta zhè a nshèffè.

¹⁰ Ko man i gaɗa: A vava i te matakwan, i ɓer ncè-a-ndav ga genè.

¹¹ Te va skwi man a dzakaɓamay gèɗ, i gaɗa: Ndohi tèlèba ndohi ncèkelma!

¹² I da pil Ndo nzi pèc pècèk a mè? A gèɗ skwi man amba tèlèba man a gayè.

¹³ I woy a i cè kokwi mʼmbel ndo, a i tsi rai a nzlembaɗ Ndo nzi pèc pècèk.

¹⁴ Skwi man i gaɗa na hi a Ndo nzi pèc pècèk, i woy a i rufaʼa a sam di ndohi nengaʼa tèlèba.

¹⁵ Nshèffè ɓèlèlihi Zhiklè, a sam di Ndo nzi pèc pècèk gani a pa kumba.

¹⁶ Wa Ndo nzi pèc pècèk, tsena ma ga, te man i ndo mizlinè ngaya; iyè, ndo mizlinè ngaya, kra dem ɓèl ngaya. Ka pray skwi man a dzawyè.

¹⁷ I da zla ka skwi man i shida ka gèɗ a vna, a i da tsi rai a nzlembaɗ Ndo nzi pèc pècèk.

¹⁸ Skwi man i gaɗa na hi a Ndo nzi pèc pècèk, i woy a i rufaʼa a sam di ndohi nengaʼa tèlèba,

¹⁹ te gi Ndo nzi pèc pècèk, te ndev kokwar Jérusalem! Alléluia!