Psaumes 106 - Ma Zhiklè

¹ Alleluia! Va-shüd gèɗ a Ndo nzi pèc pècèk, aman nengaʼa amba, pombi nengaʼa a nzi a mèdèp.

² Nslaha a ngrédè skwi mbiaʼa man Ndo nzi pèc pècèk a ngau tèlèba, wa? Nslaha a ngrè nrkedi nengaʼa tèlèba, wa?

³ Mwuffè a sam tengaʼa man ta jèjèr ma kita, man ta gi skwi nzuraʼa pèc pècèk.

⁴ Ndo nzi pèc pècèk, heryè, ara man ka woy ndohi ngaya! Washkè a sam ga a skwi mʼmbel ndo ngaya,

⁵ a i rka manam ndohi man ka par ta, a i wuffè a gèɗ mwuffè ndohi ngaya.

⁶ Nga gu mali lèmèlèmè ara babhi nga. Nga gu maharam, nga gu mphömè.

⁷ Babhi nga te Egypte ta fa na gèɗ a nrkedi ngaya bai; pombi ngaya man a ndev bi haha, ta hara ɓai. Ta gre gèɗ ta a sam Zhiklè te géɗèʼa, a ma woyam mbiaʼa ndu-zoa.

⁸ Aman nengaʼa a mbel ta, a gèɗ nzlembaɗ nengaʼa, a gèɗ man a nʼngrede wuɗi na auda.

⁹ A nguv iyam mbiaʼa, a nengaʼa a ngwor na. A ntakaha ta, a ta beza a ndev iyam ara a sam ngworaʼa.

¹⁰ A mʼmbelka ta auda te ri ndo shèwa, a mpreka ta auda te ri ndo mayam.

¹¹ Iyam a nzede ta ndohi mayamhi a pa, ko staɗ njèka ɓai.

¹² Te deɓaʼa ta co ma nengaʼa a ndav, a ta slu dimèsh a ta shüd gèɗ.

¹³ Aman a nasa nasa skwi man nengaʼa a gau, mpca ta a gèɗ, ta dzhoɗo a sam nengaʼa bai.

¹⁴ Ntétékè a nʼnga ta tʼhèshèkèɗ, ta jkeda Zhiklè tʼhèshèkèɗ.

¹⁵ A nengaʼa a mva ta skwi man ta dzhoɗo, a mva ta, ha a zhkè ta va a gèɗ.

¹⁶ Ta gu srak a gèɗ Moise, a sam man ta nza a pa, a ta gu srak a gèɗ Aaron, ndo Zhiklè nkezlaʼa.

¹⁷ A herkeda a mwinèa ma na, a nsedkada Dathan a ma, a mpizl ta ndohi nrubi Abiram a pa.

¹⁸ Vogwa a nʼnde ta ndohi nrubi tengaʼa a ma, nèʼèn vogwa a mpin ta ndohi malihai a ma.

¹⁹ Ta rom marai a der za Horeb, a ta kalahi a deɓ sak skwi man ta vüɗo.

²⁰ Aranta ta humbada nʼnjèl Zhiklè a kra zlè man a ndi mandai.

²¹ Zhiklè, ndo mʼmbel ta, mpca ta a gèɗ, nengaʼa man a gu skwi mbiaʼa te kokwar Egypte,

²² a gu nrkedi te kokwar Cham, a skwi mwuɗitpa a ma woyam mbiaʼa.

²³ Zhiklè a nhur a da gedas ta; aman Moise, ndo man a nʼngotskoɗauda, a nʼnza ta a deɓa a ndohai, dajèkeda ngi ndav, da gedas ta ɓai.

²⁴ A ta kwola kokwar mbelaʼa, ta ca mpèsl ri nengaʼa a ndav ɓai.

²⁵ Ta gu ma te gi ta, a ta fa zlembaɗ a ma Zhiklè ɓai.

²⁶ Zhiklè a nceda ri a zhiklè, a mʼmbaɗa, sèi ta bèzl ta tʼhèshèkèɗ.

²⁷ Sèi i wushede ta ndohi te verzi tengaʼa a va ndohi nte deɓa, a i ksar ta a gèɗ herkeda tèlèba.

²⁸ Te deɓaʼa ta gso va a Baal-Peor, ta ndau vrai,

²⁹ a ta poko na gèɗ ndav auda a skwi man ta gau. A matakwan a mshkè a géɗ tengaʼa.

³⁰ Phinées a nslambaɗa, a ngi kita: a matakwan a ndal na.

³¹ Nasa ngi-zuraʼa nengaʼa a sam di Zhiklè, a ma ma a sam verzi ndohi nengaʼa tèlèba a mèdèp.

³² Te deɓaʼa ta poko na gèɗ ndav auda a ma woyam Meriba, a Moise a nsau matakwan a géɗ tengaʼa;

³³ ta gau a ndav a ndza na, a ngoɗ ma ambaɓiaʼa.

³⁴ Ta gedassa ndohi kokwar ɓai, ara man Ndo nzi pèc pècèk a gaɗa ta;

³⁵ aman ta dzakaɓda va ta a va ndohi nte deɓa, a ta slebau ngi ara tengaʼa.

³⁶ Ta goɗ vri a nda tengaʼa, a nslafaɗama ta sak,

³⁷ a ta vau wudahi a dalahi tengaʼa a skwi man ta va ta mèzhèɓhi ambaɓihiaʼa.

³⁸ Ta keɗa ndo man a nga, mali ɓai, pombaz wudahi a dalahi tengaʼa ta va na a mhlom ndohi Canaan. A kokwar mphomda a géɗ mali nkéɗè ndo.

³⁹ Ta lizhè ndav a skwi man ta gau, ta gu mphömè a maya tengaʼa man ta gau.

⁴⁰ Ndo nzi pèc pècèk a ngu ndav worworaʼa a géɗ ndohi na, a ndohi nʼndi gi nengaʼa ta ndara na.

⁴¹ A mpe ta a ri ndohi nte deɓa, a ndohi shèwa tengaʼa ta gu a bi ta.

⁴² Mayamhi tengaʼa ta ga ta matakwan, ta manda ta gèɗ a hai a wuɗi tengaʼa.

⁴³ A mpreka ta auda sak kumba; aman tengaʼa ta sassaya ndav ta a sam skwi man woy a woy a ta a giaʼa, a ta sau matakwan a géɗ mali tengaʼa.

⁴⁴ A nengaʼa a nrka matakwan tengaʼa, a ntsena nkuɗi tengaʼa,

⁴⁵ a nhur nderzlè-ma nengaʼa man a mbel ta a vna, a nʼngwoda gèɗ na te pombi nengaʼa mbiaʼa.

⁴⁶ A ngu aman ta si ndohi ndum ta te va.

⁴⁷ Ndo nzi pèc pècèk, Zhiklè nga, mbel nga, ɓicka nga a deɓa te va ndohi nte deɓa, a nga shida na gèɗ a nzlembaɗ ngaya nkezlaʼa, a nga ngècè nʼnjèl nga te nslébèrdè ka.

⁴⁸ Ndo nzi pèc pècèk, Zhiklè Israel, nga shida ka gèɗ, tʼhinkaɗ na a ma ma a mèdèp. A ndohi tèlèba ta da gèɗèʼa: Amen, Alléluia!