Psaumes 105 - Ma Zhiklè

¹ Va-shüd gèɗ a Ndo nzi pèc pècèk! Vo-boho nzlembaɗ nengaʼa! Va-njè ta ndohi herkeda skwi tèlèba man a giaʼa!

² Va-sla na dimèsh, va-sla na dimèsh a deɓ ganzavar! Va-nju ma nrkedi nengaʼa tèlèba!

³ Va-nzala nzlembaɗ nengaʼa nkezlaʼa! Ndo man a hèsh Ndo nzi pèc pècèk da wuffa te ndav!

⁴ Vo-hoss Ndo nzi pèc pècèk vo-hoss wuɗi nengaʼa, va-woy di nengaʼa pèc pècèk!

⁵ Va-hur nrkedi man a gau, skwi malwuɗi nengaʼa, ma nengaʼa man a goɗa.

⁶ Kinè wudahi Abraham, ɓèl nengaʼa, kinè wudahi Jacob, ndo nengaʼa man a nʼngotskoɗauda.

⁷ Ndo nzi pèc pècèk, nengaʼa Zhiklè nga, a gi kita a géɗ herkeda tèlèba.

⁸ A her nderzlè-ma nengaʼa a mèdèp, a hèr ma nengaʼa man a va ta te verzi ndohi 1.000, 1.000,

⁹ man ta derzla ma a Abraham, a ma man a mbaɗa na Isaac.

¹⁰ A ntila, a ngi a ma kita ndohi Jacob, a nderzlè-ma Israel a mèdèp.

¹¹ A ngaɗa: I woy a i va ka kokwar Canaan a skwi nʼndi gi ngaya.

¹² Aman ta az a vata di ɓai, ta nza te kokwar kumba di ɓai, ta mbrokihi dai,

¹³ to do a va ndohi ngiɗè, to do a va ndohi ngiɗè, to do a kokwar-bi ngiɗè ngiɗè.

¹⁴ A mva ta civèɗ a ndohi ngiɗè ta ga ta matakwan ɓai, a nʼnga ta kita a bihai, a géɗ tengaʼa.

¹⁵ Kin lama na ndo man i bada na mbar a gèɗ bai, kin ga ta matakwan a ndohi nhadka ma ga ɓai!

¹⁶ Aman a mbüdko mi a kokwar, movar man ta mbelè a vna azɓai,

¹⁷ a nzlün-do ndo staɗ a ma tengaʼa: Joseph man ta preda ma a ɓèlè.

¹⁸ Ta dzawama na sak nengaʼa a cèlèlèu, ta manda a züdo,

¹⁹ ha pats man Ndo nzi pèc pècèk a gu skwi man a hur a da giaʼa, man Ndo nzi pèc pècèk a njkeda ma.

²⁰ A bai a nzlündo gol nengaʼa, da prokoɗauda; bi mbiaʼa te kokwar a mprokoɗauda.

²¹ A mfu a bi gi na, a nkwor skwi man a nʼngots tèlèba a ri na.

²² Da slebda ta wud bihai ara man ndav nengaʼa a woyaʼa; da senda ta maya a ndohi nengaʼa nhalaʼa.

²³ A Israel a mshkè a kokwar Egypte, a Jacob a ngu a ndo mbrok te kokwar Cham.

²⁴ Zhiklè a gu a ndohi nengaʼa ta mènè a vata, a va ta wuɗai a fena man a ndohi nʼnga ta matakwan.

²⁵ A nʼngwodama ta gèɗ a tengaʼa man ta gu shèwa a ndohi na, a ta vhè ma a gèɗ ɓèlèlihi nengaʼa.

²⁶ A Zhiklè a nzlündo Moise, ɓèl na, a Aaron man a nʼngotskoɗauda.

²⁷ A nʼngreda skwi auda te kokwar Egypte a ri tengaʼa, skwi man a hur a da giaʼa, a nrkedi te kokwar Cham.

²⁸ A nzlündo ruva, a di a rka bai; te man ta fa gèɗ a ma nengaʼa ɓai.

²⁹ A nʼngwode iyam a pombaz, a mbèzlè klèf.

³⁰ Kudof tsumbodok-tsumboɗokaʼa te kokwar ta, ta dè ha a gi bai.

³¹ A nengaʼa a ngoɗa, a zlra a nvakamai a gi a kokwar tengaʼa tèlèba.

³² A nzlinda ta vandzal ara iyam, a vogwa man a ndi skwai, te kokwar.

³³ A ngedassa skwi te gi lak, a wof kslor, a mpasla wof barassa te kokwar tengaʼa.

³⁴ Nengaʼa a ngoɗa, a dzarai a shkè, dzarai man a ngrè azɓai.

³⁵ Ta ndeda lak te kokwar a ma, ta ndeda skwi te gi dau a ma.

³⁶ A mbazla tsuvomaʼa tsuvomaʼa te kokwar tengaʼa tèlèba, wuɗi tengaʼa nshèlèkuraʼa.

³⁷ A nde ta ndohi Israel auda te kokwar a verzhègenè a guro te rai, a ndo man a shèd bai te va gwoli tengaʼa, azɓai.

³⁸ Kokwar Egypte a wuffè, man ta dè, te man zlau a nkeɗ ta a gèɗ tengaʼa.

³⁹ Zhiklè a ngu vanai a mpizlè ta a pa, a vogwa man a hela ta sam a vaɗ.

⁴⁰ Ta dzhoɗo, a nzlinda ta ndégwèrèh, a mva ta movar te zhiklè.

⁴¹ A mwinèa za, a iyam a nhakaɗauda, a hi tʼhèshèkèɗ ara woyam.

⁴² Te man nengaʼa a hur ma nengaʼa nkezlaʼa, man a va na Abraham, ɓèl na.

⁴³ Aranta a nde ta ndohi nengaʼa auda, ndohi man a mparka ta auda. A ta wuffè kumba.

⁴⁴ Te deɓaʼa a mva ta kokwar ndohi nte deɓa, a ta duma skwi man ndohi herkeda ngiɗè ta ngots te mizlinè ta.

⁴⁵ A gèɗ man ta da fi gèɗ a ma man a nʼngatsa ta maya a vna, a ta da jèjèr ma kita nengaʼa. Alléluia!