Psaumes 103 - Ma Zhiklè

¹ Man a David. Ndav ga, slubordo Ndo nzi pèc pècèk! A nshèffè ga tèlèba da slubordo nzlembaɗ nengaʼa nkezlaʼa!

² Ndav ga, slubordo Ndo nzi pèc pècèk, a skwi mbelaʼa man a ga ka da pca ka a gèɗ ɓai!

³ Nengaʼa a pra ka mali ngaya tèlèba; nengaʼa a mbel ka te matakwan ngaya tèlèba;

⁴ nengaʼa a prokodi nshèffè ngaya auda te skwi man a ngedassaʼa; a ka sia te va, a pada ka gèɗ a pombi nengaʼa.

⁵ Nengaʼa a walde ka te nshèffè ngaya tèlèba, a mende ka auda gola ara vezai.

⁶ Ndo nzi pèc pècèk a gi zuraʼa tʼherkeda, a hel ka ta ndohi man ta zumda ta gèɗ, auda te kita.

⁷ Nengaʼa a nʼngra na civèɗ nengaʼa a Moise, a nʼngreda ta skwi mbiaʼa man a giaʼa a wudahi Israel.

⁸ Ndo nzi pèc pècèk, man ndohi ta sia te va, man a woy ndo, a gi ndav tsam-tsam azɓai, pombi nengaʼa a ndev ɓai.

⁹ A verslè a mèdèp azɓai, a gi ndav ɗèkeɗekaʼa a mèdèp azɓai.

¹⁰ A ga nga ara mali nga azɓai, a mendko nga a deɓa ara mphömè nga azɓai.

¹¹ Ara man giɗfèk a zhè kerpaʼa a géɗ herkeda, lèmèlèmè pombi nengaʼa a zhè a sam ndohi man ta gi zlauaʼa.

¹² Ara man nvangkaɗ pats na dra a sam nkèl pats, lèmèlèmè a helda mali nga dra.

¹³ Ara wudahi man ta si bab ta te va, ndohi man ta gi zlau Zhiklè, ta si Ndo nzi pèc pècèk te va.

¹⁴ Aman nengaʼa a sun ngakaɗ nga. A hérèʼa, nga mberfenèk.

¹⁵ Nshèffè ndo ara kuza, a pai, ara nwurzhè te gi dau.

¹⁶ A kozlar a gai, a wush na ma, a ndohi ta sun sam man a wurzhè a pa ɓai.

¹⁷ Aman pombi Ndo nzi pèc pècèk a zhè a mèdèp ba a sam ndohi man ta gi zlauaʼa, a ngi-zura nengaʼa a sam wud wuda tengaʼa,

¹⁸ a sam tengaʼa man ta nzi te nderzlè-ma nengaʼa, ta hér ma nkwèr nengaʼa a ta jèjèrèʼa.

¹⁹ Ndo nzi pèc pècèk a ntil sam nʼnzi bi nengaʼa te zhiklè te géɗèʼa, a gi bai a géɗ skwi tèlèba.

²⁰ Vo-slubordo Ndo nzi pèc pècèk, kinè golahi nengaʼa, kinè ngul ndohai man kin gi ara man a gaɗa kinè.

²¹ Vo-slubordo Ndo nzi pèc pècèk, kinè ndohi var nengaʼa tèlèba, man kin gi mizlinè nengaʼa, man kin gi skwi man a woyaʼa!

²² Vo-slubordo Ndo nzi pèc pècèk, kinè skwi man a gau tèlèba, a sam kokwar-bi nengaʼa tèlèba! Ndav ga, slubordo Ndo nzi pèc pècèk!