Proverbes 9 - Ma Zhiklè

¹ Maya a nrom gi na, a sak gi tsaraɗ.

² A nzlaha skwi na, nta zom na, ntilda sam a hi ma.

³ A nzlinde ta dalahi mizlinè na, da bahka ta ndohi te kokwar te man a géɗèʼa:

⁴ Deɓi ndohi da shkè! A ngaɗa ta madaɗauhai:

⁵ Vo-washkè, va-ndau skwi a sam ga! Va-sau zom man i taʼa!

⁶ Vo-washkè, va-jèkeda madaɗau kinè, a kin nzi a nshèffè, vo-do a civèɗ nshin skwai!

⁷ Ndo man a ngra na maya a ndo nderɗe ndo, a ngècè ndzoan; ndo man a ngatsa na maya a ndo ambaɓiaʼa, a ngècè hori a dai.

⁸ Ka ngatsa na maya a ndo nderɗe ndo ɓai, man ɓai a ga ka shèwa. Aman gada na ndo maya, nengaʼa a da woy ka.

⁹ Va na skwi a ndo maya, a maya nengaʼa a gi a ma ma; senda na ndo nzuraʼa, a nengaʼa a shin skwi a ma ma.

¹⁰ Maya a hün te zlau Ndo nzi pèc pècèk; nshin skwai, nasa maya ndohi nkezlaʼa.

¹¹ A géɗ ga, pats nshèffè ngaya ta gi a vata, a ta pa na a va mvi nshèffè ngaya.

¹² Aman ka ndo maya, maya a ngaya; aman ka ndo nderɗè ndo, ka si matakwan te riaʼa, ka staɗgenè.

¹³ Nrzlè a njidè verzi a hi azɓai, maya na azɓai, a sun skwa ɓai.

¹⁴ A nzi a ma gi nengaʼa, a géɗ sam nʼnzai te kokwar man a géɗèʼa.

¹⁵ A baha ta ndohai man ta bi-zhè a civèɗ a ta dè a ma zuraʼa:

¹⁶ Deɓi ndo, washkè a sam ga! A gada na madaɗau ndo:

¹⁷ Iyam man ta ɓéjè a metsar, a jèn; movar man ka luhudo nlühüdè, a jèn.

¹⁸ A sun a ngaɗa ruva ɓai, mbrokihi nengaʼa golahi mʼmetsai, a sun ɓai.