Proverbes 24 - Ma Zhiklè

¹ Ka gu srak a géɗ ndohi ambaɓihiaʼa ɓai, ka hoss nʼnzi a va tengaʼa ɓai!

² Ndav tengaʼa a hér shèwa, ta gèɗè ma ncèkèlma.

³ Gi mpaʼa, man mpa a maya a ngècè wuɗai te pa.

⁴ A maya man ka huro, wov nʼndha.

⁵ Ndo maya a fena ndo wuɗai. Ndo man a hér maya a fena ndo man a gi skwi a wuɗai.

⁶ Ka slaha ka gi var, a ka shin maya var, ka gi a ngulaʼa, a géɗ man ndohi nʼngatsa ka maya ta zhè kumba.

⁷ Nrzla a slaha maya ɓai; a sam ncèmma a winè ma na azɓai.

⁸ Ndo man a hér ngi skwi man ambaɓai, ta baha na ndo nʼngwèdè ndo.

⁹ Skwi man ndo nrzlaʼa a hérèʼa, malai. Ndo nderɗa ndo a ndara ta ndohai.

¹⁰ Aman a pats man matakwan a ga ka, wuɗi ngaya a da asaɓai, ka za da ngècè wuɗi ngaya tema?

¹¹ Preka ta ndohi man ta de ta a sam mʼmetsai, auda; a ndohi man ta lèk va a sam man ta da zli daʼai ta, mbel ta!

¹² Aman ka gada: I sunkoɗa matsa tema? Nengaʼa man a wuzhè ndav ndo a sun ka ɓi dè? Nengaʼa man a war nshèffè ngaya a suna, a pela na ndo skwi tèlè ara skwi nengaʼa man a gau.

¹³ Kra ga, ndau vongwom, aman nengaʼa amba; dazli vongwom a jèn a daʼai ngaya.

¹⁴ Maya te ndav ngaya a gi lèmèlèmè arsa; aman ka ngotso, ka nzi dai, a skwi man ka zhèrè te ndav a zhè dai.

¹⁵ Ka pu va a skwi te gi ndo nzuraʼa ɓai, ka dumama na gi ɓai!

¹⁶ Aman ndo nzuraʼa a kèlèhi, ko sak tsaraɗ, a slèmbèɗè genè. Aman ndohi ambaɓihiaʼa ta wush ta hai, a matakwan.

¹⁷ Aman ndo mayam ngaya a kèlèhai, ka ngwossaha ɓai; ka wuff ɓai, aman skwi a slafadama na sak!

¹⁸ Ndo nzi pèc pècèk a rkaʼa, a da ambaha ɓai, a jèkeda ngi ndav a géɗ nengaʼa.

¹⁹ Ndav ngaya da hubata a géɗ ndohi man ta gi skwi ambaɓiaʼa ɓai! Ka gu srak a géɗ ndohi ambaɓihiaʼa ɓai!

²⁰ Aman ndo ambaɓiaʼa a nzi azɓai; skwi nhél sam ndohi ambaɓihiaʼa a nde na a ruva.

²¹ Kra ga, gu zlau Ndo nzi pèc pècèk, a bai! Ka gur gèɗ a sam tengaʼa ɓai, cèw ba.

²² Aman a nasa nasa ta bidèha ka matakwan, tsam tsam ta kalde ka a hai a va skwi mwuɗitpa.

²³ Ma haha ba, ma ndohi maya: Ka por ndo mpèrè a sam kita ɓai!

²⁴ Ndo man a gaɗa na ndo malai: Mali ngay azɓai, ndohi ta phömdèʼa, a ta dérɗèʼa.

²⁵ Aman ta wuffè a géɗ tengaʼa man ta fa na mali a géɗ; a ta ngècè mpshè ma a manam.

²⁶ Ndo man a mbeɗa ka ma ndaz-ndazaʼa, kala man a kelawa ka ri a daʼai.

²⁷ Tila mizlinè ngaya dai, peza dau dai, ga ka cè ngwoz!

²⁸ Ka pün nslamagi ngaya ambali ɓai, ka woy a ka cèkèlma dè?

²⁹ Ka gaɗa: skwi man a gayè, i ba i ga na lèmèlèmè, i pulko di man a ga auda, ka goɗ ɓai!

³⁰ I beza a tsagi gi dau ndo wudar, a tsagi gi lak ndo nrzlaʼa:

³¹ na haha nkuɗdzarai te pa, bolmbolo a pizlèda pa, a zlazlar man ta ngalda pa, a mʼmbeɗ na.

³² I ngots aranta, a i huro; i rkaʼa, a i sundo maya te pa.

³³ I nzhun kètè dai, i nzhun a di ga zerɓaɓa dai, i ndérdè va dai,

³⁴ a ntèwèshè a kala ka va ara ndo metsar, a ndalalai a gs ka ara man ta gshè ɓèlè a ma var.