Proverbes 15 - Ma Zhiklè

¹ Man ka mbeɗa na ma a ndo zhèhèɗ zhèhèɗèʼa, a mbatsedaha ndzoan; ma man a ɗèwèrè ndav, a slambaɗda ndzoan.

² Ndohi maya ta gèɗè ma maya, ta tüsh ntishè; aman ndohi nrzlaʼa ta gèɗ ma nrzlè auda flak-flakaʼa.

³ Ndo nzi pèc pècèk a pi di a sam tèlèba, a war ndohi ambaɓihiaʼa a ndohi amba cèw ba.

⁴ Ndo man a verslè azɓai, nara wof nshèffê; aman nèʼèn ncèkèlma a mbeɗè ndav ndo.

⁵ Ndo nrzlaʼa a ngwèshè a géɗ njè-ma bab na; aman ndo man a hér ma man a ngatsa na maya, maya na zhè.

⁶ Te gi ndo nzuraʼa, skwi a zhè kumba; aman skwi man ndo ambaɓiaʼa a ɓicèʼa, a ksar na.

⁷ Ndohi maya ta shèwèldè ma maya; aman ndohi ambaɓihiaʼa ta sun skwi man ta gia ɓai.

⁸ Skwi man ndohi ambaɓihiaʼa ta va na Zhiklè, a ndara na; aman ntsi ri ndohi nzuraʼa ambaha.

⁹ Civèɗ ndo man ambaɓai a ndara na Ndo nzi pèc pècèk; aman ndo man a gi skwi zuraʼa, ambaha.

¹⁰ Ndo man a jèkeda civèɗèʼa, a ngècè kita wuɗitpa; ndo man a woy a ta ngatsa na maya ɓai, a metsi na.

¹¹ Sam mʼmetsai, vèvèɗ mpèltemtemaʼá mwinèa a sam di Ndo nzi pèc pècèk, holholaʼa ndav ndohi ta winè a sam na.

¹² Ndo mpèrè a ndo, ambaha ɓai, aman ta ngatsa na maya, a gshè va a ndohi maya azɓai.

¹³ Mwuffè te ndav a hela te di dzayaʼa; aman ndo man a lèyè te ndav, a nza huvokwaʼa.

¹⁴ Ndav man maya te pa, a hèsh maya; aman ndo nrzlaʼa a hèsh nrzlè.

¹⁵ Nduguɗi ndo te matakwan pèc pècèk; aman ndo man a wuffê, pèc pècèk nara pats ngolala.

¹⁶ Dara man nga ngots skwi kètè, aman nga gi zlau Ndo nzi pèc pècèk, a géɗ man nga ngots kumba, a nga gi zlau a géɗèʼa.

¹⁷ Dara man nga ndi lak hutsoɗ man ta toko nga te gumai, a géɗ lak zluèɗ man ta tokoɗa a shèwa.

¹⁸ Ndo man a gi ndav ɗekeɗekaʼa, a slambaɗda ndzoan; amari ndo man a gi ndav tsam tsam azɓai, a mbatsaha mbèzl va.

¹⁹ Civèɗ ndo wudar, nara zlazlar vatak; aman civèɗ ndohi nzuraʼa ntila fèhèʼa.

²⁰ Kra man maya na zhe, a wuffede bab na; aman ndo man maya nʼazɓai, a dérɗè mam na.

²¹ Nrzlè a wuffede ndav ndo nrzlaʼa; aman ndo nzuraʼa a dè a civèɗ na sarraʼa.

²² Skwi man ta herdahai, aman ta tila ɓai, a gédèsh na; aman ndohi kumba ta derzla maya ta, a gi amba.

²³ Ndo man a sun mbeɗi a ma, a wuffè. Ma man ka gaɗda di na a di na a pi a pa a ndav.

²⁴ Civèɗ nshèffè a da ndo maya a géɗèʼa; a jèkeda sam mʼmetsai a hi a godok.

²⁵ Ndo nzi pèc pècèk a gedassa gi ndohi nfi va, a til godzovok ngwoz mazai.

²⁶ Skwi ambaɓiaʼa man ndo a hérèʼa, a ndara na Ndo nzi pèc pècèk; aman ma mbelaʼa, ntila a sam na.

²⁷ Ndo man a cè skwi man ta ruɓè a vna, a gédèshè gi na; aman ndo man a woy skwi mbalai man ta ruɓa a vna ɓai, a nzi a nshèffè.

²⁸ Ndav ndo nzuraʼa a hérè dai, ga a mbeɗi a ma; aman ndo ambaɓiaʼa a gèɗè ma ambaɓiaʼa flak-flakaʼa.

²⁹ Ndo nzi pèc pècèk a nzi dra a sam ndohi ambaɓihiaʼa; aman a tsena ntsi ri ndohi nzuraʼa.

³⁰ Ndo man di nengaʼa nciɗa, a wuffe-dè ndav ndo ngiɗè. Ma mbelaʼa a wuffede ka te va.

³¹ Ndo man a fi zlembaɗ a maya mbelaʼa man ta ngatsa na, a nzi te ndev ndohi maya.

³² Ndo man a kwolaʼa man ta njè na, a kwola nshèffè na; aman ndo man a fi zlembaɗ man ta ngatsa na maya, mwosla.

³³ Zlau Ndo nzi pèc pècèk, sam man ta slebi maya a pa; ga ndo a ngècè nʼnjèlè, sèi a manda gèɗ a hi dai.