Proverbes 1 - Ma Zhiklè

¹ Ngèlègèɗ-ma Salomon, kra David, bi Israel.

² A va nga, a nga ngècè maya, a nga slebi skwai, a nga shin ngèɗè ma man maya te pa,

³ a nga cè man ndo a sleba nga maya, a nga ngècè ngi-zuraʼa, a nga sun nɗèl skwi zuraʼa tsarayaʼa;

⁴ a ndo a ngècè maya nshèffè, a di gola a winè na, a hér maya.

⁵ Ndo man maya na zhè, a tsenaʼa, a shindè skwi a ma ma. Ndo man maya te gèɗ a gi skwi man ta senda na,

⁶ aman a sun verzi ngèlègèɗma, a verzi tsaval-ma, ma man ndohi maya ta gaɗa na, a ma man ta jkedaʼa a vna.

⁷ Maya a hün te ngi zlau Ndo nzi pèc pècèk; ndohi nrzlaʼa ta kwola ma maya a nslebi skwai.

⁸ Kra ga, co ma man bab ngaya a ngreda ka; ka kwola ma man mam ngaya a njè ka a gèɗ ɓai!

⁹ Ma tengaʼa lèmèlèmè ara mpèdè gèɗ mbelaʼa; a skwi daʼai nte daʼai ngaya.

¹⁰ Kra ga, aman ndohi malai ta bid ka a verzai, ka dzadzar ta ɓai!

¹¹ Aman ta gaɗa: Washkè a verzi nga, ngodo-pokoy va a hai, ngodo-gsokoy ndo man a nʼnga mali ɓi a pa,

¹² ngodo-rokoy a vèvèɗ a di tʼuda, ngodo-gokoy ndohi mʼmetsaɓiaʼa a ndohi mʼmetsaʼa;

¹³ nga da ngècè skwi mèshèlè tsaɗ tsaɗ, a nga da ndhè gi nga a skwi metsar,

¹⁴ ngohumdokoy va staɗ, mpokoy va a sam staɗ! –

¹⁵ Kra ga, ko do a verzi tengaʼa ɓai, mendoko va ngaya a deɓa a verzi tengaʼa!

¹⁶ Sak tengaʼa a dè a sam ambaɓiaʼa; ta hai a ta kéɗè ndo.

¹⁷ Ɗiak man a sun a ngaɗa ka pa na votok a hai, a dè a pa azɓai.

¹⁸ Ta pi va a hai a va ta; ta da zeda nshèffè ta, a ta sun ɓai.

¹⁹ Nasa civèɗ ndohi tèlèba man ta haya skwi mèshèlè a gi ta a maya man ambaɓai; a da ngwoda ta va a gèɗ, a da keɗ ta.

²⁰ Maya a bèhè a civèɗ, a slheda daʼai a dal kokwar,

²¹ a njè ma a gaba, a gèɗè a sam ncèmma.

²² Kinè ndohi man kin hér skwa azɓai, kin woy a kin nzi ara deɓi ndohai tè ngèmè? Ndohi nderɗè ndo ta wuffè a gèɗ ma tengaʼa, a maya ndohi nrzlaʼa a hcè, tè ngèmè?

²³ Vo-co man i ngatsa kinè maya! Na haha i woy a i bèdè mèzhèɓ ga a gèɗ kinè, a i woy a i ngra kinè ma ga.

²⁴ I baha kinè – kin woya ɓai. I kutèka kinè rai – kin paka di azɓai.

²⁵ Skwi man i ngreda kinè tèlèba kin rka ara skwi ambalai; kin ca ɓai, aman i ngatsa kinè maya.

²⁶ Anai man kinè te drav matakwan, i ngwossaha kinè; aman zlau a keɗ kinè, i liv kinè.

²⁷ Zlau a tseda kinè gèɗ ara kozlar iyam, a skwi ngedas kinè a kalde kinè a hai ara ndombozlor, a matakwan a zlau mʼmetsai a ga kinè.

²⁸ Te deɓaʼa ta da bahayè; aman i da fi zlembaɗ asaɓai. Te deɓaʼa ta da hassyè; aman ta da ngatsyè asaɓai,

²⁹ te man ta kwola ma maya, ta woy a ta gi zlau Ndo nzi pèc pècèk ɓai.

³⁰ Ta woy a ta cè skwi man i ngra ta ɓai, ta kwola ma tèlèba man i woy a i ngatsa ta maya a vna.

³¹ Ta da ndokoɗko ri skwi man ta gu auda, ta da ngézhè te maya tengaʼa.

³² Ndohi man maya ta a hcè, nrzlè tengaʼa a kalde ta a hai; a ndohi nrzlaʼa man ta hér gèɗ azɓai, ta zi ta.

³³ Aman ndo man a tsena ma ga, a nzi amba amba, a nzai na, a gi zlau skwi mwuɗitpa azɓai.