Philippiens 4 - Ma Zhiklè

Va-wuffa te Bai Yèsu!

¹ Gar haha, kramamhi ga, man i woy kinè, man i zhèr kinè, man i wuffè a géɗ kinè, man i jégèr va a géɗ kinè! Va-zlatsa taraʼa te Bai Yèsu, a kin gidè azɓai, dalahimam ga!

² I bidè Evodie a i bidè Syntyche, man ta hérè te ndav lèmèlèmè te Bai Yèsu.

³ A vava ka ba, ndo ntakahayè nlèɓèslèa, sèi ka takaha ta ngwozi haha. Ta takahayè a ngi gèjau a géɗ ma mbelaʼa, a nda Clément, a ndohi ntakahayè ngiɗè, man nzlembaɗ ta a zhè te ɗèlèwèr nshèffè.

⁴ Va-wuffa te Bai Yèsu pèc pècèk, a i gaɗa kinè zaʼa: Va-wuffa!

⁵ Va-ngreda ta maya nshèffè kinè man amba a ndohi tèlèba! Bai Yèsu a shkè ndul ndul.

⁶ Kin hur gèɗ zlau ɓai! Aman te skwi tèlèba, va-tsu rai mbuh-mbuhaʼa, a nshid gèɗ a sam Bi Zhiklè.

⁷ A gumi Bi Zhiklè man a fena maya te gèɗ nga tèlèba, da ɓür ndav kinè, a nhér gèɗ kinè te Yèsu Kristi!

Va-hur skwi haha

⁸ A vaʼa, dalahimam ga, skwi man nzuraʼa, man a maya nlèɓèslèa, man a vava, man nkezlaʼa, man amba, man mbelaʼa, a maya te gèɗ, a nshid gèɗ, va-hur nengaʼa!

⁹ Skwi tèlèba man kin sundo, kin ngotso, kin tsenaʼa a kin rkaʼa a sam ga, va-gu arsa! Te deɓaʼa Zhiklè gumai a di a zhè a nda kinè.

Skwi man ndohi Philippes ta vau

¹⁰ I wuffè holholaʼa te Bai Yèsu, te man kin ngots wuɗi zaʼa, a kin waray dai. Kin waray di nshèlèkuraʼa ma, aman te deɓaʼa kin ngatsa ria ɓai.

¹¹ I gèɗ ma haha azɓai, te man i woy skwai. I slebau, aman skwi man i ngotso, dèʼayè.

¹² I slaha a i nzi ara ndo ntawassa, i slaha a i nzi ara ndo mwalaʼa; skwi tèlèba i slebau. I slaha tèlèba, ko man dèʼay ma, ko man mi a keɗyè, ko i ngotso, a njèkèɗiaʼa a zhè, ko i tèkwèn skwai.

¹³ I slaha skwi tèlèba a nda nengaʼa, man a vay wuɗai.

¹⁴ Aman kin gu amba, aman kin takahayè te matakwan ga.

¹⁵ Kinè ndohi Philippes, kin suna, aman te nhinkaɗ ma mbelaʼa, man i do a kokwar Macédoine, mpi ndohi Zhiklè ngiɗè ta geday skwi man ta ngotso a skwi man ta gu a vna ɓai, sèi kinè staɗgenè.

¹⁶ Aman i te kokwar Thessalonique dai, kin zlündo skwi a sam ga, a gi sak cèw.

¹⁷ I zhèr skwi te ri kinè ka ɓai, aman i woya aman skwi mbelaʼa a shkè auda te nshèffè kinè.

¹⁸ Aman antanta i ngreda kinè, ara man i ngots skwi tèlèba, kumba, a njèkèɗiaʼa a zhè. I tèkwèn skwi asaɓai, a géɗ skwi kinè man amba, man i ngots te ri Epaphrodite: ara skwi man kin va na Zhiklè man a wuffè a gèɗèʼa, ambaha, man a cèʼa.

¹⁹ A skwi man kin tèkwènèʼa, Zhiklè ga a di a va kinè, ara nʼnjèl nengaʼa mbiaʼa te Yèsu Kristi.

²⁰ Aman a Zhiklè, Bab nga, nslébèrdè pèc pècèk, a mèdèp ba. Amen.

Mbali man a deɓa

²¹ Va-ga ta mbalai a ndohi Zhiklè nkezlaʼa tèlèba te Yèsu Kristi! Kramamhi man ta zhè a sam ga ta ga kinè mbalai.

²² Ndohi Zhiklè nkezlaʼa tèlèba, holholaʼa golahi César ta ga kinè mbalai.

²³ Pombai Bi Yèsu Kristi da zhè a nda mèzhèɓ kinè!