Nombres 6 - Ma Zhiklè

Va nkezlaʼa

¹ A Ndo nzi pèc pècèk a ngaɗa na Moise:

² Gaɗa ta ndohi Israel ar haha: Aman nguraʼa, man bai ngwoz, a woya a ngèɗè ma a hai, a woya va nkezlaʼa, a woya a va na nshèffè a ri a Ndo nzi pèc pècèk,

³ da jèkeda zom, da sau skwi man a dè gèɗ bai. Ko barassa, ko skwi ngiɗè man a dè gèɗ, da sau bai, ko ny i wof man ta gi a barassa, da ndau bai!

⁴ Ha pats man a mva na nshèffè a ri Ndo nzi pèc pècèk tèlè, da ndau nyi wof man ta gi a barassa bai, ko kopi deɓaʼa ko ntʼhwaɗaʼa.

⁵ A pats man a ngaɗda ma a hai, a mva na nshèffè a ri a Zhiklè, tèlè, da fu pidök a gèɗ nengaʼa ɓai, ha patsa man a gadda hai.

⁶ A pats tèlèba man a nza ara ndo nkezlaʼa, do do a sam ndo mʼmetsaʼa ɓai!

⁷ Ko a sam bab na, ko a sam mam na, ko a sam kramam na, ko a sam demam na, aman ta mets ta, da lizhè va na a sam ta ɓai, te man va nengaʼa nkezla a sam Zhiklè na.

⁸ A pats tèlè man a ngaɗda ma a hai, nkezlaʼa a sam Ndo nzi pèc pècèk.

⁹ Aman mʼmetsai a ngso ndo ngiɗè te kalak na, a lizhè ndo nkezla sa, da shoko gèɗ auda a pats matsaraɗaʼa, a ntila va na zaʼa.

¹⁰ A pats matsamakeɗaʼa, da hulkoɗi ngudokwarhi cèw, man ɓai wud nkudhom cèw, a sam ndo mvi skwi a Zhiklè, a ma gi mɓicè-va.

¹¹ A ndo mvi skwi a Zhiklè da va na ngiɗè staɗ a Zhiklè a géɗ malai, ngiɗè da ndara na a géɗ mpil gèɗ, te man a nlizha va na a sam ndo mʼmetsaʼa. A pats nasa, va nengaʼa nkezla a sam Ndo nzi pèc pècèk zaʼa.

¹² A pats nasa da gadda ma a hi a sam Ndo nzi pèc pècèk, ara nshèlèkuraʼa. Kra tambak, mvi staɗ, da ckoɗa a sam Zhiklè te man a ntawadaha ma kita. Nhin man a ngaɗda ma a hai, da ngra na a va asaɓai, a hinè mɓuaʼa zaʼa, a géɗ man a nlizha va na.

¹³ Nasa ma kita a géɗ ndohi man ta kezla va, a ta vi nshèffè ta a ri Ndo nzi pèc pècèk: Aman a pats man a gaɗda hai, sèi ta ckoɗa a ma gi nkezlaʼa,

¹⁴ da zla na skwi a Ndo nzi pèc pècèk: tambak mvi staɗ, nsuɗekɗekaʼa, a ndara na Zhiklè. Dem tambak, mvi staɗ, nsuɗekɗekaʼa, a géɗ malai. Drok staɗ, nsuɗekɗekaʼa, te nshid gèɗ.

¹⁵ A vaʼa movar man skwi nshégèrè a te dia bai, nʼngaʼa a gufa dau, gadagar staɗ, mɓelaslasla man ta tu a mbar, a mɓelaslasla man skwi nshégèrè a te dia bai, a mbar te dai, a movar a vaʼa, man ta va na Zhiklè; a skwi nsi man ta va na a vaʼa.

¹⁶ A ndo mvi skwi a Zhiklè da hulkoɗa a sam Ndo nzi pèc pècèk, da va na skwi a géɗ malai, da ndara na skwi te di man a na.

¹⁷ Aman drok da va na Ndo nzi pèc pècèk te nshid gèɗ, a movar man skwi nshégèrè a te dia ɓai, gadagar staɗ. A movar a skwi nsi ba, ndo mvi skwi a Zhiklè, da va na.

¹⁸ Aman ndo nkezlaʼa da shoko gèɗ auda a ma gi nkezlaʼa. Da co gwots nengaʼa nkezlaʼa man a shokoɗauda, da kalda a vogwa man a ndèr skwi man ta va na Zhiklè te nshid gèɗ.

¹⁹ Te deɓaʼa ndo mvi skwi a Zhiklè da co ɗuar drok ntaʼa, a movar man skwi nshégèrè a te dia bai staɗ te gadagar, a mɓelaslasla man skwi nshégèrè a te dia bai staɗ, da pa na a ri a ndo ngaɗda ma a hai, te deɓ man a shoko gèɗ auda ma.

²⁰ Skwi haha tèlèba, ndo mvi skwi a Zhiklè da geda na Ndo nzi pèc pècèk. Ndo mvi skwi a Zhiklè a ngècèʼa ara skwi man ta va na Zhiklè; ndavaʼa ba, a deɓaʼa ba. Te deɓaʼa ndo nkezlaʼa a slaha a nsi iyam nyi wof zaʼa.

²¹ Nasa ma kita a géɗ ndohi man ta kezla va, man ta gadda ma a hai a sam Ndo nzi pèc pècèk, a skwi man ta va na Ndo nzi pèc pècèk, a géɗ man ta gadda ma a hai, a skwi ngiɗè man ta va na a vaʼa. Da gau ara man a gadda hai, ara ma kita a géɗ ndo man a nkezla va na, a goɗa.

Ma mpshè ma ndohi mvi skwi a Zhiklè

²² A Ndo nzi pèc pècèk a ngaɗa na Moise:

²³ Gaɗa na Aaron a wudahi nengaʼa ar haha: Va-gaɗa ta ndohi Israel, aman kin pshè ta ma:

²⁴ Ndo nzi pèc pècèk da pshè ka ma, da ɓer kal

²⁵ Ndo nzi pèc pècèk da hela sam ngaya dzayaʼa, da va ka pombai!

²⁶ Ndo nzi pèc pècèk da paha ka dai, da va ka gumai!

²⁷ Aman ka fa ta nzlembaɗ ga a géɗ a ndohi Israel aranta, iyè man i da pshè ta ma.