Nombres 30 - Ma Zhiklè

Ngwoz man a ngaɗda ma a hai

¹ A Moise a ngaɗa ta ndohi Israel ma tèlèba man Ndo nzi pèc pècèk a njè na ma a gèɗ.

² Te deɓaʼa Moise a ngaɗa ta tsuvom ndohi te verzi Israel, aranta: Na haha skwi man Ndo nzi pèc pècèk a jhèɗèʼa:

³ Aman ndo a gadda ma a hai a sam Ndo nzi pèc pècèk, man ɓai a goɗ a mbèɗè, a ngaɗda ma a hai a ngi arsa, a mindè a deba azbai, sèi a gi tèlèba ara man a goɗ te ma na.

⁴ Aman dali ngwoz a gadda ma a hai a sam Ndo nzi pèc pècèk, a gada i da gi a vava, man nengaʼa a nza a gi bab na man bidali dai,

⁵ a bab nengaʼa a sun ma nengaʼa man a woya a gia a vava, a mʼmbeɗa na a ma ɓai, da gau skwi tèlèba man a ngod ara man a woya a giaʼa a vava.

⁶ Aman bab na a ntsenaʼa, a mva na civèɗ bai man a ngèd ma a hai, mpraʼa te riaʼa. A Ndo nzi pèc pècèk a da pra na malai, a géɗ man bab na a woya bai.

⁷ Aman nengaʼa ngwoza ma, a baki nengaʼa a sun ma man a ngaɗdahai, a sun ma man a gada i da gi a vava, ko a hur skwi te pa bai,

⁸ a baki nengaʼa a pats man a ntsenaʼa, ngaɗa na ɗai, sèi a gia ara man a gadda ma a hi tèlèba, man a gada i da gi a vava.

⁹ A pats man baki nengaʼa a ntsenaʼa, a mva na civèɗ bai, ngwozaʼa mpra te riaʼa, man a ngaɗdahai, a hur skwi ngiɗè te pa bai. A Ndo nzi pèc pècèk a da pra na malai.

¹⁰ Aman ngwoz mazai, man bai ngwoz man ta kwolaʼa, a ngaɗda ma a hai, skwi mèmè man a ngaɗ i da gi a vava, sèi a giaʼa tèlèba.

¹¹ Aman ngwoz a ngod ma a hai te gi baki na, a ngaɗ i da gia a vava, man bai a mbèdè,

¹² a baki nengaʼa a ntsenaʼa, a ngaɗa na ka gu bi bai, ma man a ngaɗdahi tèlèba, sèi a gia a vava.

¹³ Aman baki nengaʼa a mpreda ma a deɓa, a pats man a tsenaʼa, ma tèlèba man a shkè auda te ma nengaʼa, man a ngaɗda hi klèng. Baki nengaʼa a mpreda ma a deba ma. A Ndo nzi pèc pècèk a da pra na mali a ngwoz.

¹⁴ Ma mèmè man a gaɗdahai, a géɗ skwi man a da giaʼa, man ɓai a da jèkeda, aman a woya a til va na a vna, baki nengaʼa a slaha a mva na civèɗ, man bai a preda ma na a deba.

¹⁵ Aman baki a ntsenaʼa, a ngaɗa na bai, ha te mangoslèmaʼa, sèi a gia tèlèba, ara man a gaɗdahai. Baki nengaʼa a mva na civèɗ, te man a ngaɗa na a pats man a ntsenaʼa bai.

¹⁶ Aman te deɓ man a ntsenaʼa, a preda ma a a deba, mali a géɗ nengaʼa, a géɗ ngwoz ka bai.

¹⁷ Nasa ma nkwèr man Ndo nzi pèc pècèk a va na Moise, te ndev nguraʼa a ngwoz, te ndev baba a dem na, man nengaʼa a nza te gi na, bidali dai.