Nombres 25 - Ma Zhiklè

Israel a dzodzor Baal Beor

¹ Aman ndohi Israel ta nza te Sittim, ndohi ta hüno ngi mphömè a dalahi Moab.

² Ta baha ta ndohi a sam ngolala mvi skwi a zhiklè mbèh skwi tengaʼa, a ndohi ta ndau skwai a ta tsu ri a Baal tengaʼa.

³ A Israel a ndzodzor Baal-Peor, a Ndo nzi pèc pècèk a ngu ndav kumba a géɗ ndohi Israel.

⁴ Te deɓaʼa Ndo nzi pèc pècèk a ngaɗa na Moise: Parka ta bihi ndohi tèlèba, a ka dizl ta a wof a sam Ndo nzi pèc pècèk, a pats. Aman Ndo nzi pèc pècèk a manda ndav worwora sa a hai a géɗ Israel.

⁵ A Moise a ngaɗa ta ndohi kita Israel: Staɗ staɗ te va kinè, da bazla ndohi na man ta dzodzor Baal!

⁶ A na haha, ndo Israel ngiɗè a mshkè, a nco ngwoz Madian, a nckoɗa a sam kramamhi na, a sam di Moise, a sam di mpi ndohi Israel tèlèba, te ndev man ndohai ta gi wobau a ma gi Zhiklè.

⁷ Aman Phinées, kra Eléazar, kra Aaron, ndo mvi skwi a Zhiklè a rkaʼa, a nslambaɗa te ndev mpi ndohai, a nceda tsakwal a rai,

⁸ a mdo a gi ndo Israel sa, a ntez ta cèw ba, nguraʼa a ngwoz, a hwaɗ. A matakwan a nda! na a sam ndohi Israel.

⁹ Ndohi Israel man ta bazl ta te va matakwan, 24.000.

¹⁰ A Ndo nzi pèc pècèk a ngaɗa na Moise.

¹¹ Phinées, kra Eléazar, kra Aaron, ndo mvi skwi a Zhiklè, a mco ndzoan ga auda a géɗ Israel, a ngu srak te di man a ga te ndev ndohi Israel. Ar haha i zede ta ndohi Israel tèlè ɓai, te srak ga.

¹² Gar haha goɗ aranta: I derzla ma gumai a nda nengaʼa.

¹³ Nengaʼa a ndohi te verzi nengaʼa sèi ta ngècè mizlinè mvi skwi a Zhiklè a ma ma a mèdèp, te man nengaʼa a ngu skwi a srak a géɗ Zhiklè nengaʼa, a nʼngatsa ta skwi mpil gèɗ a ndohi Israel.

¹⁴ Nzlembaɗ ndo Israel, man ta keɗaʼa, a nda ngwoz Madian, nzlembaɗ na Zimri, kra Saul, tsuvom ndohi Simèon.

¹⁵ Nzlembaɗ ngwoz Madian man ta keɗaʼa, Cozbi, dem Tsur, tsuvom gwoli Madian ngiɗè.

¹⁶ A Ndo nzi pèc pècèk a ngaɗa na Moise:

¹⁷ Va-gu var a ndohi Madian, a kin bazl ta!

¹⁸ Aman tengaʼa ta pe kinè a wai a maya tengaʼa, a géɗ Peor, a géɗ gwoli Cozbi, dem tsuvom Madian, demam ta, nengaʼa man ta keɗaʼa a pats matakwan a géɗ Peor.