Nombres 23 - Ma Zhiklè

¹ Balaam a ngaɗa na Balak: Ramayè sam mvi skwi a Zhiklè a haha tsaraɗ, a ka hulkoɗi zlèhi tsaraɗ, a droki tsaraɗ!

² A Balak a ngau ara man Balaam a gada na. Te deɓaʼa Balak a Balaam ta zlaha na skwi a Zhiklè, staɗ staɗ a géɗ sam mvi skwi a Zhiklè staɗ staɗ tèlèba, zlè staɗ a drok staɗ.

³ A Balaam a ngaɗa na Balak: Nza a haha a sam skwi ngaya man ka ndara na Zhiklè. I woy a i dè aman i rkaʼa, nga da zli gèɗ a Ndo nzi pèc pècèk, a i da gada ka skwi man a da ngrayè.

⁴ Bi Zhiklè a shkè, a Balaam a ngaɗa na: I rom sam mvi skwi a Zhiklè tsaraɗ, a i vau zlè staɗ a drok staɗ a géɗ sam mvi skwi a Zhiklè staɗ staɗ tèlèba.

⁵ A Ndo nzi pèc pècèk a mva na ma nengaʼa a ma Balaam, a ngaɗa: Do a deɓa a sam Balak, a ka gada na ar haha.

⁶ A nengaʼa a ndo a deɓa a sam na, a nʼngotso, a nzlatsa a tsagi skwi man a ndara na a Zhiklè, a bihi Moab a sam na tèlèba.

⁷ A Balaam a hüno ngèɗè ma, a ngaɗa: Balak a bahkay te Aram, Bi Moab te za, te civèɗ mvèng pats, washkè! A ka phomda Jacob, ar na. Washkè, durɗo Israel!

⁸ Ndo man Zhiklè a mphomda bai, i phömdè dè? Ndo man Zhiklè a nderɗa bai, i dérɗè dè?

⁹ Iyè a géɗ za, i rka ta, iyè man a géɗèʼa, ta zhè a sam di ga, na haha, ndohi man ta zhè a géɗ ta ka ɓai, na haha, ta te verzi ndohi nte deɓa ka ɓai!

¹⁰ Nslaha nʼngér wyak Jacob wa? Nslaha nʼngér ndohi Israel gozhèm gozhèm wa? Dara i metsi ga ara ndo nzuraʼa, a ndike-ma ga nʼnga lèmèlèmè ara ndikè-ma tengaʼa.

¹¹ A Balak a ngaɗa na Balaam: Ka gay haha mè! I baha ka aman ka phomde ta mayamhi ga, anai ka pshè ta ma!

¹² A nengaʼa a mʼmbeɗa na a ma: I mendè ma man Ndo nzi pèc pècèk a ngaɗkayè azɓi ɗè?

¹³ A Balak a ngaɗa na: Washkè, a verzi ga, a sam ngiɗè, man ka slaha ka rka ta ndohi tèlèba zuraʼa. A haha ka rka rèta genè, ka rka tèlè ɓai.

¹⁴ A ndaʼa a gi dau man ta baha na sam-nʼngél-dai, a géɗ za Pisga. A nrom sam mvi skwi a Zhiklè tsaraɗ, a nzloho zlè a drok staɗ a géɗ sam mvi skwi a Zhiklè staɗ staɗ tèlèba.

¹⁵ A Balaam a ngaɗa na Balak: Zlatsa a haha a tsagi skwi ngaya man ka ndara na Zhiklè. Iyè, i dè ahngata, a nga da zli gèɗ a Ndo nzi pèc pècèk.

¹⁶ A Ndo nzi pèc pècèk a shkè, a mva na ma nengaʼa a ma Balaam, a ngaɗa: Do a deɓa a sam Balak, a ka gada na ar haha.

¹⁷ A nengaʼa a mshkè a sam na, a nʼngotso, nzlatsa a tsagi skwi nengaʼa man a ndara na Zhiklè, a ndohi Moab ta zhè a sam na. A Balak a ngaɗa na: Ndo nzi pèc pècèk a gad kè?

¹⁸ A nengaʼa a nhüno ngèɗè, a ngaɗa: Balak, slambaɗa, tsenaʼa! Kra Tsippor, fay zlembaɗ!

¹⁹ Zhiklè nara ndo ka bai, a cèkèlma azbai, kra-ndo ka bai, man a mindè ma na a deɓa. Skwi man a mpasla ri a pa, a rufaʼa azɓi dè? Ma man a ngoɗa, a giaʼa azɓi dè?

²⁰ Na haha a ngaɗayè: Pshè ta ma! Aranta i pshè ta ma, i slaha a i mindè mpshè ma a deɓa azbai.

²¹ A nʼngots mali a sam ndohi Jacob bai, a nrka skwi ambaɓiaʼa a sam ndohi Israel bai. Ndo nzi pèc pècèk, Zhi-klè nengaʼa, a zhè a sam na nengaʼa bi ta, man ta slébèrdèʼa,

²² man a helka ta auda te kokwar Egypte, wuɗi na zhè ara wuɗi kevar.

²³ Mʼmbèh skwi mèmè a slaha ta ndohi Jacob azbai; mpi kwa a slaha ta ndohi Israel azbai. Man tiɗè sama ma, ndohi Israel a ndohi Jacob ta dè shin skwi man Zhiklè a giaʼa.

²⁴ Na haha ndohi man ta dzegaraʼa ara mam marizhèlè, mari ta slèmbèdè ara marizhèlè. A mènèhi azbai, sèi a nʼndeda skwi na a ma, a nseda pombaz skwi man a gso, a ma.

²⁵ A Balak a ngaɗa na Balaam: Aman ka slaha ka phomde ta bai – ka pshè ta ma bai!

²⁶ Aman Balaam a mʼmbeɗa na a ma Balak: I gaɗa ka bi dè: Skwi tèlèba man Ndo nzi pèc pècèk a gaɗayè, i da giaʼa.

²⁷ A Balak a ngaɗa na Balaam: Washkè dakwa, i de ka a sam ngiɗè. Wa ngiɗè ba a da ambaha Bi Zhiklè, a ka da phomde ta te pa.

²⁸ A Balak a nda Balaam a géɗ za Peor, zuraʼa a ma hèshèkèɗ.

²⁹ A Balaam a ngaɗa na Balak: Rom sam mvi skwi a Zhiklè tsaraɗ, zloho zlèhi a droki tsaraɗ!

³⁰ A Balak a ngau ara man Balaam a gada na, a mvau zlè staɗ a drok staɗ a géɗ sam mvi skwi a Zhiklè tsaraɗ sa.