Néhémie 8 - Ma Zhiklè

Esdras a jèngè ma kita

¹ Ndohi tèlèba ta ɓica va a sam nstaɗ, a ndav staɗ, zuraʼa a ntamagi ‘nlèlè iyam’, a ta gaɗa na Esdras, ndo ɗèlèwèr, aman a ckoɗi ɗèlèwèr ma kita Moise, man Ndo nzi pèc pècèk a mva ta ndohi Israel.

² Esdras, ndo mvi skwi a Zhiklè, a ncko ma kita a sam di mpi ndohai, ngurhai, a ngwozai, a ndohi tèlèba man ta slaha ta cinèʼa, a ta cinèʼa. Nasa a ki matsaraɗaʼa, pats nshèlèkuraʼa.

³ Esdras a njongo ɗèlèwèr, daga prèk, ha géɗ pats, a sam man a zhè a ntamagi ‘nlèlè iyam’, a sam di ngurhai a ngwozai, a ndohi tèlèba man maya ta zhè, a ta cinèʼa. A ndohi tèlèba ta fu zlembaɗ a ma ɗèlèwèr kita.

⁴ Esdras, ndo ɗèlèwèr, a nzlatsa a sam nzangalaʼa man ta gu a wof a géɗ nengaʼa. A tsagi nengaʼa, te civèɗ ri mandai, Matthithia, Shéma, Anaja, Urie, Hilkija a Maaséja. Te tsagi ri gula, Pedaja, Mishael, Malkija, Hashum, Hashbaddana, Zacharie a Meshullam.

⁵ Esdras a mwin ɗèlèwèr a sam di ndohi tèlèba; nengaʼa a nʼnza a géɗèʼa, a géɗ ndohi tèlèba. Aman a mwina ɗèlèwèr, ndohi tèlèba ta zlatsa.

⁶ A Esdras a nshüd gèɗ a Ndo nzi pèc pècèk, Zhiklè mbiaʼa, a ndohi tèlèba ta mbeɗa na a ma: Amen, amen! A ta peda ri a Zhiklè. Te deɓaʼa ta guɓda deɓ a hai, a ta gurɓahai, a ta tsu rai.

⁷ Josué, Bani, Shérébia, Jamin, Akkub, Shabbethai, Hodija, Maaséja, Kelith, Azaria, Jozabad, Hanan, Pelaja a ndohi Lévi, ta ngra ta verzi ma kita a ndohai. Ndohi ta zlatsa.

⁸ A ta jongo te ɗèlèwèr ma kita Zhiklè, a ta ngreda verziaʼa, a ta por ma auda te pa, aman ta shin skwi man ta jongo.

⁹ Néhémie, ngomna, a Esdras, ndo mvi skwi a Zhiklè, man a sun ɗèlèwèr, a ndohi Lévi man ta senda ta ndohai, ta gaɗa ta ndohai: Pats haha, nkezla a sam Ndo nzi pèc pècèk, Zhiklè kinè. Kin loyo skwa ɓai, kin kuɗ ɓai! A vava ndohi tèlèba ta kuɗai, aman ta tsena ma ɗèlèwèr kita.

¹⁰ Ta gaɗa ta: Vo-do, va-ndau zluèɗ, va-sau skwi nsi man a jèn, va-tsaka ta ndohi man ta ngatsa skwi bai, te man pats haha nkezla a sam Bi Zhiklè nga. Kin hur gèɗ ɓai! Mwuffè a géɗ Ndo nzi pèc pècèk, nengaʼa wuɗi kinè!

¹¹ A ndohi Lévi ta bid ta ndohi tèlèba, ta gaɗa: Va-nza tètè! Aman pats haha nkezlaʼa a sam Ndo nzi pèc pècèk. Kin loyo skwa ɓai!

¹² Te deɓaʼa ndohi tèlèba to do a ta ndau skwai, a ta sau skwai, a ta tsaka ta ndohi ngiɗè, a ta wuffè te ngolalaʼa, te man ta tsena ma tèlèba man ta ngra ta.

¹³ A pats macecèwaʼa, tsuvomhi verzi ndohi tèlèba, ndohi mvi skwi a Zhiklè, a ndohi Lévi, ta ɓiceda va a sam Esdras, ndo ɗèlèwèr, aman ta cinè ma ɗèlèwèr kita.

¹⁴ A ta ngots te ma kita, mwinda, ara man Ndo nzi pèc pècèk a njè ta te ma Moise: Ndohi Israel sèi ta nzi a godzovok, a pats ngolala, te ki matsaraɗaʼa.

¹⁵ A ta njèʼa, a ta bèhè te kokwar tèlèba, te Jérusalem tèlèba, ma haha: Vo-do za! Va-ngulko ri wof a vahaʼa te wof tsaɗ tsaɗ, wof tsna, wof wuslaf, wof ɗawai, wof man vahaʼa a zhè, va-gu godzovok a vna, ara man ta Windo!

¹⁶ Te deɓaʼa ndohi to do a ta hulkoɗi ri wof, a ta gu godzovok, staɗ staɗ tèlèba a ma gi na, a ma gi Zhiklè, a dalmagi a ntamagi ‘nlèlè iyam’, a dalmagi a ntamagi ‘Ephraim’.

¹⁷ Mpi ndohi tèlèba – tengaʼa man ta menkada deɓa te ɓèlè – ta gu godzovok, a ta nza a pa. Daga pats man Josué, kra Nun, a zhè, ha patsna, ndohi Israel ta ga arsa ɓai, a mwuffè mbiaʼa a zhè.

¹⁸ Ta jongo te ɗèlèwèr ma kita Zhiklè, a nciɗ sam a nciɗ sam, a hüno a pats nshèlèku-raʼa, ha ta rufa ngolala. Ta gu ngolala mʼmèn tsaraɗ; a pats matsamakaɗaʼa, nʼndikè-ma ngolala.