Néhémie 5 - Ma Zhiklè

Mpi kramama a ɓèlè

¹ Te deɓaʼa ndohi te kokwar a ngwozi ta, ta gu ma a géɗ ndohi Juif.

² Ndohi ngiɗè ta gaɗa: Wudahi nga a dalahi nga, nga tèlèba, nga kumba. Sèi nga gi maya dau, aman nga ndiaʼa, a nga mbel nga.

³ Ndohi ngiɗè ta gaɗa: Sèi nga vi gi dau a gi lak a gi nga a hai a nslembolom, a nga ngècè dau te ndev mai.

⁴ Ndohi ngiɗè ta gaɗa: Nga co Suli a dua a nga pil budu bi a vna, a nga feda gi dau a gi lak a hi te diaʼa.

⁵ Aman nga a kramamhi nga a wudahi nga a wudahi tengaʼa, zluèɗ va nga staɗ, Pombaz staɗ. Na haha, nga pa ta wudahi nga a dalahi nga a ɓèlè. Dalahi nga ngiɗè ta te ɓèlè ma. Wuɗi nga azɓai, te man gi dau a gi lak nga a ndohi ngiɗè ma.

⁶ A i gu ndav kumba, aman i tsena ndzoan tengaʼa arsa.

⁷ A i mana ndav ga, a i ga ta ndzoan a ndohi mbibihiaʼa, a ndohi mɓer kokwar. A i gaɗa ta: Kin ga ta skwi mwuɗitpa a kramamhi kinè! Te deɓaʼa i baha ta a mbicè-va gedam tèlèba,

⁸ a i gaɗa ta: Nga, nga sumka ta ndohi Juif, kramamhi nga, a deɓa te va ndohi nte deɓa, a wuɗi nga. Antanta kin pra kramam kinè, a kin prè va a va kinè ɗè? A ta nza tètè, a nfa ta medkam a gèɗ.

⁹ A i gaɗa: Skwi man kin giaʼa, ambaɓai. Dara ngo-gokoy maya nshèffè nga, a nga gi zlau Zhiklè nga, aman nga ngècè hori a di azɓai a sam ndohi nte deɓa, mayamhi nga.

¹⁰ I ba i pa ta sulai a dau a dua a ndohi mizlinè ga, kramamhi ga. Dara kin gia lèmèlèmè arsa!

¹¹ Va-pa ta skwi ta a deɓa a patsna, gi dau a gi lak ta, wof tsna, a gi ta, a dua sulai a dau a marori a mbar man te ri kinè.

¹² A ta gaɗa: Nga da pa ta skwi ta, a nga jhèɗè skwi nga a deɓa azɓai. Nga da gi ara man ka goɗo. A i baha ta ndohi mvi skwi a Zhiklè, a i dzhoɗo aman ta mbèɗè, a ta da gi ara man ta gaɗdahai.

¹³ A i gegerda dawar ga, a i gaɗa: Ko wawa man a gi azɓai ara man a gaɗda hai, Zhiklè a da gudèma na gèɗ aranta, a nkoldokoɗauda te gai, te va skwi na. A mpi ndohi tèlèba ta gaɗa: Amen! Te deɓaʼa ta slubordo Ndo nzi pèc pècèk, ndohi tèlèba ta gau ara man ta gaɗdahai.

Skwi ntul Néhémie azɓai

¹⁴ A hüno a pats man ta fiyè a ngomna te kokwar Juda, aman Artaherhes bai, te mvi 20aʼa, ha ndè a mvi 32aʼa, a gi mvi 12, nga a kramamhi ga, nga co skwi ntul ngomna Bai.

¹⁵ Ngomnahai man ta zhè, ga i shkè, ta dzhoɗo skwi kumba te ri ndohai, a ta helama ta skwi pèc pècèk, movar a barassa, a Suli gurso 40. Golahi tengaʼa ba ta zumda ta gèɗ a ndohai. Aman iyè, i ga arsa ɓai, a gèɗ man i gu zlau Zhiklè.

¹⁶ I ba i gau mizlinè nɗizlè zlazlar sa, ko i ngatsa gi dau ɓai, a ndohi gi ga tèlèba ta shkè a sam mizlinè genè.

¹⁷ Ndohi Juif a ndohi mɓer kokwar man ta ndau skwi te gi ga, ndohi 150; ndohi herkeda ngiɗè man ta shkè a sam nga, nslamagihi ga, ta ngra ta a vaʼa ɓai.

¹⁸ Skwi man nga tau a nciɗ sam a nciɗ sam: marai 1, tambaki nsuɗekɗekaʼa 6, a wotsakihai; iyè mpulo. Te deɓ mʼmèn kula pèc pècèk duzlaki barassa a vata. Ko ar haha, i dzhoɗ skwi ntul ngomna ga ɓai, te man ndohi ta sau matakwan te ri mizlinè kumba ma.

¹⁹ Zhiklè ga, heryè, a ka vay pombai, a gèɗ skwi tèlèba man i ga ta ndohi haha!