Nahum 1 - Ma Zhiklè

¹ Ma a géɗ Ninive. Ɗèlèwèr a géɗ skwi man a da shkè, man Nahum te Elkosh a rkaʼa.

Mayamhi Zhiklè a kita nengaʼa

² Ndo nzi pèc pècèk, nengaʼa Zhiklè srak, man a jhèɗè skwi mpil gèɗ. Ndo nzi pèc pècèk a jhèɗè skwi mpil gèɗ, a gi ndav worworaʼa.

³ Ndo nzi pèc pècèk a gi ndav tsam tsam azɓai, a woy ndo kumba; aman a gi ndzoan a géɗ malai. A dè te ndev lokotor a ndombozlor, vanai nara lokotor man sam sak nengaʼa a nslambaɗda.

⁴ A güv iyam mbiaʼa, a gworaʼa, a Woyamhi tèlèba ta she ta. Basan a Carmel, iyam a dza ta, mwurzhè te Liban a mɓüt na.

⁵ Zahi ta gudzi a sam na, ngègèɗhai ta wèl ta. A sam di na herkeda a mbéɗ na, a ndohi herkeda a deɓaʼa tèlèba.

⁶ Nslaha a nzlècè a sam ndzoan nengaʼa wa? Nslaha a nʼnzi a sam ndav nengaʼa man a gi worworaʼa wa? Wuɗi ndzoan nengaʼa a zlèzlèmè ara vogwa, ko zahi ta wurzl ta a sam na.

⁷ Ndo nzi pèc pècèk amba, sam nga nlèaʼa a pats matakwan. A sen ta ndohi man ta hi a sam na,

⁸ a mbel ta aman iyam nʼndha te woyam, a hi auda a dzah. A zeda ndohi man ta zlatsa na a gèɗ, a paraha ta mayamhi na te ruva.

⁹ Kin hér a géɗ Ndo nzi pèc pècèk mè? Nengaʼa a zeda skwai; matakwan a slèmbèɗè sak cèw azɓai.

¹⁰ Ta tèlèba nara vatak nʼngelaʼa; vogwa a nʼndeda ma ara kuza ngworaʼa.

¹¹ Ndo man a hur skwi man ambaɓai a géɗ Ndo nzi pèc pècèk, man a gi shèwa, a mshkè auda te ka.

¹² Gar haha Ndo nzi pèc pècèk a goɗa: Ko ta hur a ta gaɗa: skwa a ga nga azɓai, nga kumba, i pats ta aussa tʼherkeda, a ta zi ta. Aman i manda ka gèɗ a hi haha, i da manda ka gèɗ a hi te deɓaʼa asaɓai.

Israel a Juda ta praʼa

¹³ I woy a i poslko wof nkelawa a daʼai ngaya auda, i ngeslda teɓa aussa.

¹⁴ A géɗ ngaya Ndo nzi pèc pècèk a mvau ma nkwèr haha: Nzlembaɗ ngaya da ze na, verzi ngaya asaɓai. I da hulkoɗi zhiklèhi ngaya, a vrihi a mblomhi tèlèba auda te gi zhiklè mbèh skwi ngaya. I tila ka gi dzavi ngaya a hi ma, te man ka ambaɓai.