Matthew 28 - Ma Zhiklè

Nslambaɗkaɗ Yèsu auda te ndev ndohi mʼmetsaʼa

¹ Te deɓ pats nshèk va, a pats nshèlèkuraʼa te luma, a prèk vaɗ, Marie Magdala, a Marie ngiɗè, ta shkè, aman ta rka gi dzavai.

² Na haha, herkeda a gudzi a vata, a gol Bi Zhiklè a mshkè te zhiklè, a ngudumbala na kwa auda a ma, a nʼnza a pa.

³ Va nengaʼa ara ndidiyam, maslaka nengaʼa nslekaɗaʼa kuɗkuɗèʼa, ara gogumai.

⁴ A ndohi mɓer gi dzavai ta gu zlau a vata, ta gudzai, ta ara man ta metsa.

⁵ A gol Bi Zhiklè a ngaɗa ta ngwozai: Kin gu zlau ɓai, aman i suna, kin woy Yèsu, man ta gezlalaʼa.

⁶ Na az haha ɓai, aman nengaʼa a nslambaɗkaɗ na ma, ara man a gaɗa. Vo-washkè, va-rka samaʼa man a mʼmana a pa.

⁷ Te deɓaʼa vo-do tsam-tsam, a kin gaɗa ta golahai nengaʼa: Yèsu a nslambaɗkaɗauda te mʼmetsi ma! Na haha a dè a ma kine a kokwar Galilée. Te pa kin da rkaʼa. Ma ga anta.

⁸ A to do tsam-tsam, a ta jèkeda gi dzavai a zlau a mwuffe mbiaʼa, a ta hau, aman ta ngreda ta golahi nengaʼa.

⁹ Na haha Yèsu a mshke, aman ta zli gèɗ a tengaʼa, a ngaɗa: Vo-mbalai! Aman tengaʼa ta shkè, a ta kalahai a deɓ sak nengaʼa.

¹⁰ Yèsu a ngaɗa ta: Kin gu zlau ɓai, vo-do, va-njè ta kramamhi ga, aman ta dè a kokwar Galilée. Te pa ta da rkayè.

Ndo mɓer gi dzavai a menda ta ma a ndohi pharisie

¹¹ Aman to do, na haha ndohi ngiɗè, man ta ɓer gi dzavai, ta shkè a kokwar, a ta ngreda ta ndohi mvi skwi a Zhiklè mbibihiaʼa skwi tèlèba man a gau.

¹² A ta ɓica va a nda ndohi nhalaʼa, a ta tsomma. A ta va ta sulai a vata a sojèhai,

¹³ a ta gaɗa: Va-goɗa: Golahi nengaʼa ta shkè a vaɗ, a ta cko va auda a metsar, aman nga nzhuna.

¹⁴ Aman ngomna a da cinèʼa, nga da bidèʼa, a nga gi maya, aman a gi ma a géɗ kinè azɓai.

¹⁵ A tengaʼa ta co sulai, a ta gu ara man ta gaɗa ta. A ma haha a zlèzlèmè a zlèzlèmè a sam ndohi Juif, ha patsna.

Yèsu a zlinde ta golahi 11

¹⁶ A golahi 11 to do a kokwar Galilée, a za, a sam man Yèsu a gaɗa ta aman ta dè a pa.

¹⁷ Aman ta rkaʼa, ta kalahai a deɓ sak nengaʼa. Matrhiaʼa ta pu gèɗ cèw.

¹⁸ A Yèsu a mshkè a sam ta, a ngaɗa ta: Wuɗi tèlèba te zhiklè ba, tʼherkeda ba, nte ri ga.

¹⁹ Anai vo-do, va-ge ta ndohi herkeda tèlèba a golahi ga, va-ga ta bap-tême a nzlembaɗ Bab Zhiklè, a nzlembaɗ kra Zhiklè, a nzlembaɗ Mèzhèɓ Zhiklè nkezlaʼa.

²⁰ Va-senda ta, aman ta gi skwi tèlèba man i fa kinè a gèɗ. Na haha, i zhè a sam kinè pèc pècèk, a pats a vaɗ, ha herkeda a ndiv na.