Matthew 26 - Ma Zhiklè

Ndohi mbibihiaʼa ta vhè ma a géɗ Yèsu

¹ Aman Yèsu a nʼndeva ma nengaʼa haha tèlèba, a ngaɗa ta golahi nengaʼa:

² Kin suna, njèkè mʼmèn cèw, ta da gi ngolala Pâque, a ta da gshè kra-ndo a kita, aman ta da gézlèlèʼa.

³ Te deɓaʼa ndohi mvi skwi a Zhiklè mbibihiaʼa, a malamhai, a ndohi nhalaʼa ta ɓeceda va a gala Bi ndohi mvi skwi a Zhiklè, nzlembaɗ na Caiphe,

⁴ a ta tsomma, aman ta gshè Yèsu, a maya ncèkèlma, a ta kéɗèʼa.

⁵ Aman ta gaɗa: Te ngolala ka ɓai, man ɓai ndohi ta da rubai.

Ngwoz a faɗ a na mbar a gèɗ a Yèsu

⁶ Aman Yèsu a zhè te Béthanie, te gi Simon, ndo hutsoɗ,

⁷ ngwoz ngiɗè a mshkè a sam na, a koloba ɓurdi te rai, nshum nengaʼa a vata. Aman Yèsu a ndi skwai, ngwoz a mbaɗa na burdi a gèɗ.

⁸ Aman golahi Yèsu ta rkaʼa, ta gu ndav, a ta gaɗa: A gedasse te pa me?

⁹ Dara man ta preda ma a Suli kumba, a ta va ta ndohi ntawassaʼa.

¹⁰ Aman Yèsu a suna, a ngaɗa ta: Kin pra na zlau a va ngwoz haha èhèmè? A ngau skwi man amba a sam ga.

¹¹ Ndohi ntawassaʼa ta zhè a sam kinè pèc pècèk; aman iyè, i nzi a sam kinè pèc pècèk azɓai.

¹² Nengaʼa a mbaɗa burdi a va ga, aman a tilay va ga, ga i metsi ga.

¹³ A vava i gaɗa kinè: Tʼherkeda tèlèba, man ta da njè ta ma mbelaʼa, ta da gèɗè skwi man ngwoz haha a gau, a ta da hérèʼa.

Juda a woya a ga na ri a gèɗ Yèsu

¹⁴ Judas Iscariot, staɗ te va 12, a mdo a sam ndohi mvi skwi a Zhiklè mbibihiaʼa,

¹⁵ a ngaɗa: Aman i va kinè Yèsu a ri a kinè, kin da vay mè? A tengaʼa ta ngra na gurso 30.

¹⁶ Te deɓaʼa a hüno man a nwoy maya, aman a nga na ri a gèɗ.

Yèsu a ndi skwi ngolala Pâque a nda golahi nengaʼa

¹⁷ A pats nshèlèkuraʼa man ta ndi movar man skwi nshégèrè a te di ɓai, golahi Yèsu ta shkè a sam Yèsu, a ta gaɗa na: Ka woya aman nga da tila ka skwi nʼndi Pâque a ka ndiaʼa tema?

¹⁸ Yèsu a ngaɗa ta: Vo-do a kokwar mbiaʼa, va-gaɗa na zana te pa: Ndo njèngè ma a gaɗa: Pats ga ndul ndul ma. Nga a golahi ga, nga ndi tambak Pâque a sam ngaya.

¹⁹ A golahi Yèsu ta gu ara man Yèsu a gaɗa ta, a ta tila skwi nʼndi Pâque.

²⁰ A dakwaɗ man pats nkala ma, Yèsu a nʼnza hai a ndi skwai a nda golahi 12.

²¹ Aman ta ndi skwi nʼndai, a ngaɗa ta: A vava i gaɗa kinè: Staɗ te ndev kinè a da gay ri a gèɗ.

²² Tengaʼa ta kuɗi te ndav ta, a ta hüno, staɗ staɗ a ndzhoɗo: Bai, i dè?

²³ A nengaʼa a mʼmbeɗa ta a ma: Nengaʼa man nga tèr ri a gandaf a vna, nengaʼa a nda gay ri a géɗ.

²⁴ Kra-ndo a dè na ara man ta Windo te ɗèlèwèr Zhiklè a géɗ nengaʼa; aman Woba ndo man a ga na ri a gèɗ a kra-ndo. Dara man da yoko ɓai.

²⁵ A Judas man a nga na ri a gèɗ, a mʼmbeɗa na a ma Yèsu: I dè, Rabbi? A Yèsu a ngaɗa na: Ara ngèd ngaya!

Nhinè nʼndi skwi nkezlaʼa

²⁶ Aman ta ndi skwai, Yèsu a nco movar, te deɓ man a mpshè na ma, a ntsakaʼa, a mva ta golahi nengaʼa, a ngaɗa: Vo-co, va-ndau, na haha va ga!

²⁷ Te deɓaʼa a nco kokwai, te deɓ nshid gèɗ, a mva ta, a ngaɗa: Va-sau tèlèba te pa!

²⁸ Aman na haha Pombaz ga, Pombaz nderzlè-ma, man mbadahai, a mprè mali ndohi kumba.

²⁹ I gaɗa kinè, anai i si barassa te deɓ anta asaɓai, ha pats man i da siaʼa mɓuaʼa a nda kinè te kokwar-Bi Bab ga.

³⁰ Te deɓaʼa aman ta slu dimèsh psaume Zhiklè ma, to do ta, a za oliviers.

Yèsu a ngreda, ara man Pierre a da cèkèlma a géɗ nengaʼa

³¹ Yèsu a ngaɗa ta: A vaɗ haha, kin da jèkyè tèlèba; aman ta Windo te ɗèlèwèr Zhiklè: I keɗa ndo mɓer skwai, a tambakihi a ta ngezl ta.

³² Aman i slambaɗkaɗauda te mʼmetsi ma, i dè a ma kinè a kokwar Galilée.

³³ A Pierre a mʼmbeɗa na a ma: Aman tèlèba ta jèke ka a pa, iyè, i jèke ka a pa azɓai.

³⁴ Yèsu a ngaɗa na: A vava, i gaɗa ka, a vaɗ haha, ga ngarah a tsi daʼai, ka cèkèlma a géɗ ga sak makar.

³⁵ Pierre a ngaɗa na: Ko i metsi ga a va ka, i cèkèlma a géɗ ngaya azɓai. A golahi tèlèba ta goɗ arsa.

Ntsi ri Yèsu te Gethsémané

³⁶ Te deɓaʼa Yèsu a mshkè a nda golahi na a sam man ta baha na Gethsémané. Yèsu a ngaɗa ta: Va-nza hai, ha i dè a i tsi ri ahngata.

³⁷ A nco Pierre a wudahi Zébédée cèw a nda nengaʼa, a hüno man a nkudi te ndav na, ndav nengaʼa a mbeɗè.

³⁸ A ngaɗa ta: Ndav ga a mbeɗè, nlèyè a keɗyè a hi a vèvèɗ. Va-nza a haha, va-nza a dai a nda iyè!

³⁹ Te deɓaʼa a nco sak a ma kètè, a ntseda medi a hai, a ntsu rai, a ngaɗa: Bab ga, aman ara man a gai, kokwi haha do do auda a sam ga; aman ara man iyè a nwoya ka ɓai, aman ara man ka, ka woyaʼa.

⁴⁰ A Yèsu a mshkè a deɓa a sam golahi nengaʼa, a nʼngats ta, ta nzhuna. A ngaɗa na Pierre: Ka slaha ka nzi a dai a nda iyè kèshkata azɓi dè?

⁴¹ Va-nza a dai, va-tsu rai, aman skwa da pe kinè a wi ɓai. Mè-zhèɓ a woya a ngi amba, aman wuɗi ndo azɓai.

⁴² A va zaʼa, macecèwaʼa, a ndo a ntsu rai, a ngaɗa: Bab ga, aman kokwi haha a slaha a ndè auda a sam ga azɓai, sèi i siaʼa, da gu ara man ka woyaʼa.

⁴³ Aman a mshkè a deɓa zaʼa, a nʼngats ta, ta nzhuna.

⁴⁴ A njèke ta, a ndo zaʼa, a ntsu ri mamakaraʼa, a ngoɗ lèmèlèmè.

⁴⁵ Te deɓaʼa a mshkè a sam golahi nengaʼa, a ngaɗa ta: Antanta va-nzhun ma! Va-sok va! Na haha, tiɗè sama ma, a ta va na kra-ndo a ri a ndohi malihai.

⁴⁶ Va-slambaɗa, ngo-dokoya, na haha, nengaʼa man a gay ri a gèɗ a herdeka nga va.

Ta gshè Yèsu

⁴⁷ Aman a gèɗè dai, na haha Judas a mshkè, staɗ te va 12, a ndohi rèdèdèa a nda nengaʼa, a ka fahi gwèsh a géɗ gaɗa, ara man ndohi mvi skwi a Zhiklè mbibihiaʼa, a ndohi nhalaʼa, ta zlinde ta.

⁴⁸ Ndo nʼnga na ri a gèɗ a Yèsu, a ngaɗa ta ar haha, aman ta shinè te pa: Nengaʼa man i da kelawa na ri a daʼai, vo-gso!

⁴⁹ Tsam-tsam a mshkè a sam Yèsu, a ngaɗa: Mbalai, Rabbi! A nkelawa na ri a daʼai.

⁵⁰ Yèsu a ngaɗa na: Masli ga, gu skwi man ka shkè a géɗèʼa. Te deɓaʼa ta shkè, a ta faha ri a Yèsu, a ta gso.

⁵¹ Na haha, staɗ te va tengaʼa man ta zhè a nda Yèsu, a ngeda rai, a mpho kafahi gwèsh, a ntsau ɓèl bi ndohi mvi skwi a Zhiklè, a ntsahama na zlembaɗ auda a va.

⁵² A Yèsu a ngaɗa na: Ciɓda gwèsh a gi na! Aman ndohi tèlèba man ta phè gwèsh auda, ta da metsi te ri gwèsh.

⁵³ Ka hur antanta ba i slaha a i tsi ri a bab ga azɓi ɗè, aman a zlindkoɗi golahi a fena gozhèm 12 a sam ga?

⁵⁴ Ɗèlèwèr Zhiklè a da ndikè a pa kè? Sèi a gi arsa!

⁵⁵ A pats nasa Yèsu a ngaɗa ta ndohi rèdèdèa: Kin shkè ara man kin shkè a sam ndo metsar, a kafahi gwesh a géɗ gaɗa, aman a kin gsyè dè? Pèc pècèk i nza a sam kinè te gi Zhiklè, a i senda kinè, kin gsyè ɓai.

⁵⁶ Aman skwi haha tèlèba a gi arsa, ara man ɗèlèwèr ndohi nhadka ma Zhiklè a gaɗa. A golahi nengaʼa ta jèkeda a pa tèlèba, a ta hu ta.

Yèsu a sam kita

⁵⁷ A ndohi man ta gso Yèsu, ta daʼa a sam Caiphe, bi ndohi mvi skwi a Zhiklè, a sam man malamhai a ndohi nhalaʼa ta ɓica va.

⁵⁸ A Pierre a ndzodzor te deɓa dra, ha a ndè a gala bi ndohi mvi skwi a Zhiklè, a nʼnzahai a sam ndohi mizlinè, a woya a nrka kita man ta da ngela na a gèɗ.

⁵⁹ A ndohi mvi skwi a Zhiklè mbibihiaʼa, a ndohi ncèmma tèlèba ta woy malwuɗi ncèkèlma a géɗ Yèsu, aman ta woy a ta kéɗèʼa.

⁶⁰ Aman ta ngatsa ɓai, ko ndohi malwuɗihi ncèkèlma kumba ta shkè, a ta tsokol ma a géɗ nengaʼa. Te deɓaʼa ndohi malwuɗihi ncèkèlma cèw ta shkè, a ta gaɗa:

⁶¹ Ndo haha a gaɗa: I slaha man i mbeɗda gi Zhiklè aussa, a i rèm ngiɗè te mʼmèn makar.

⁶² A bi ndohi mvi skwi a Zhiklè a nslambaɗa, a ngaɗa na Yèsu: Ndohi haha ta gi ma a géɗ ngaya, ka mbedi a pa azɓi dè?

⁶³ Aman Yèsu a nʼnza tètè. A bi ndohi mvi skwi a Zhiklè a ngaɗa na: I mbaɗa ka a nzlembaɗ Bi Zhiklè a nshèffè, sèi ka ngra nga, aman ka Kristi, kra Zhiklè!

⁶⁴ A Yèsu a ngaɗa na: Ara ngèd ngaya! Aman i gaɗa kinè: Anai kin da rka kra-ndo a nzi te ri mandi Zhiklè, a da shkè te va vanai te zhiklè.

⁶⁵ A bi ndohi mvi skwi a Zhiklè a nkuratsa maslaka nengaʼa, a ngaɗa: A derde Zhiklè! Kos nga woy ma malwuɗi ngiɗè za dè? Antanta kin tsenaʼa ara man a derɗi Zhiklè.

⁶⁶ Kin hur kè? A ta mbeɗa na a ma: Mʼmetsi mènè!

⁶⁷ Te deɓaʼa ta njfa na slèslèɓ a dai, ta ɗutso, matrhiaʼa ta tsama na bazlazlam,

⁶⁸ a ta gaɗa: Kristi, ngreda nga, ntse ka wa?

Pierre a cèkèlma a géɗ Yèsu

⁶⁹ Pierre a nʼnza tʼuda te gala. A dem mizlinè a mshkè a sam na, a ngaɗa: Ka ba, kin nza a nda Yèsu, ndo Galilée!

⁷⁰ A Pierre a ntsokol ma a sam di ndohi tèlèba, a ngaɗa: I sun skwi man ka gèɗè ɓai.

⁷¹ Aman a ndo auda a ntamagai, dem mizlinè ngiɗè a nrkaʼa, a ngaɗa ta tengahi man ta zhè: Nengaʼa ba a nʼnza a nda Yèsu, ndo Nazareth.

⁷² A Pierre a tsokol ma zaʼa a mbèdè: I sun ndo haha ɓai!

⁷³ Te deɓa kètè ndohi man ta zlatsa a pa ta shkè, a ta gaɗa na Pierre: A vava ka ba, ka staɗ te va ndohi nengaʼa; aman daʼai ngaya ara tengaʼa.

⁷⁴ Te deɓaʼa a hüno man a mbèdè a géɗ va na: I sun ndo haha ɓai! A nasa nasa ngarah a ntsu daʼai.

⁷⁵ A Pierre a nhur ma Yèsu, ara man a gaɗa na: Ga ngarah a tsi daʼai, ka cèkèlma a géɗ ga, sak makar. A mdo auda, a nkuɗau a vata.