Matthew 16 - Ma Zhiklè

Ndohi ta woy skwi malwuɗai

¹ Ndohi pharisie a ndohi sadducée ta shkè a sam na, ta pi a wai, a ta dzhoɗo, aman a ngreda ta skwi malwuɗi te zhiklè.

² A Yèsu a mʼmbeɗa ta a ma: A dakwaɗ kin gaɗa: Verzi gi nduzoʼa, iyam a da shkè azɓai.

³ A prèk te gai, kin gaɗa: Verzi gi mʼmadza, a patsna iyam a shkè. Kin sun nɗèl skwi a giɗfèk, aman kin sun nɗèl skwi a géɗ herkeda ɓai.

⁴ Ndohi ambaɓihiaʼa, a ndohi mphomaʼa ta jhèɗè skwi malwudai. Aman ta ngècè skwi malwuɗi ngiɗè azɓai, sèi skwi malwuɗi Jonas. A Yèsu a njèke ta, a ndo na.

Skwi nshègèr skwai a ndohi pharisie a ndohi sadducée

⁵ Aman golahi Yèsu ta ndikè a wud woyam, movar mpca ta a gèɗ.

⁶ A Yèsu a ngaɗa ta: Va-gu maya a skwi nshègèr skwai a sam ndohi pharisie a ndohi sadducée!

⁷ A golahi ta goɗ a va ta: A goɗ a géɗ man nga cka movar a ri ɓai.

⁸ Aman Yèsu a sun skwi man ta gèɗèʼa, a ngaɗa: Kinè ndohi man kin ca a ndav a vata ɓai. Kin gèɗè a va kinè, a géɗ man kin ngatsa movar ɓai, èhèmè?

⁹ Kin sun di ɓi dè? Kin hér ma movar zlam a ndohi gozhèm zlam azɓi ɗè? A kin ɓüco njèkèâiaʼa gadagar ngama?

¹⁰ Kin hér movar tsaraɗ a ndohi gozhem faɗ azɓi dè? Kin ɓüco njèkèdiaʼa gadagar ngama?

¹¹ Kin tsena ɓi èhèmè? I gaɗa kinè a géɗ movar ka bai. Aman va-gu maya a skwi man a shégèr skwai a sam ndohi pharisie a ndohi sadducée.

¹² Te deɓaʼa ta suna, a ngaɗa ta a géɗ skwi nshégèr movar ka ɓai, aman a géɗ njè-ma ndohi pharisie a ndohi sadducée.

Pierre a geɗè a géɗ Yèsu

¹³ Aman Yèsu a mdo a kokwar Césarée a Philippe, a ndzhad ta golahi nengaʼa: Ndohi ta sla na kra-ndo wa?

¹⁴ Ta gaɗa na: Ndohi ngiɗè ta gaɗa: Jean Baptiste. Ndohi ngiɗè: Elie. Ndohi ngiɗè: Jérémie, man ɓai, ndo nhadka ma ngiɗè.

¹⁵ A Yèsu a ngaɗa ta: A kinè, kin slay wa?

¹⁶ Simon Pierre a mʼmbeɗa na a ma: Ka Kristi, kra Zhiklè, Zhiklè man a zhè a nshèffè.

¹⁷ Yèsu a mʼmbeɗa na a ma: Mwuffe a sam ngaya, Simon Pierre, kra Jonas! Aman ndo a ngra ka ka bai, aman Bab ga, man a zhè te zhiklè.

¹⁸ Aman iyè ba, i gaɗa ka: Ka Pierre: a géɗ pra haha i woya man a i til mpi ndohi Zhiklè ga. Mʼmetsai a da slaha ta azɓai.

¹⁹ I da va ka skwi mwinè kokwar-Bi-Zhiklè. A skwi ko mèmè man ka da manaʼa a géɗ herkeda, mʼmana te zhiklè. A skwi ko mèmè man ka praʼa a géɗ herkeda, mpra te zhiklè.

²⁰ Te debaʼa a mfa ta ma a gèɗ a golahi nengaʼa, da ngreda na ndo ngiɗè, nengaʼa Kristi, ɓai.

Yèsu a hodko mʼmetsi nengaʼa

²¹ A hüno a pats nasa, aman a senda ta a golahi nengaʼa: Sèi i dè a kokwar Jérusalem; ndohi nhalaʼa a ndohi mvi skwi a Zhiklè mbibihiaʼa a malamhai ta da gay matakwan mbiaʼa, a ta da keɗyè, aman a pats mamakaraʼa i da slambaɗkaɗauda.

²² A Pierre a ngskoɗa deɓa, a mfa na ma a gèɗ: Bai, Zhiklè da ɓer ka! Skwi haha da ga ka ɓai!

²³ Aman Yèsu a nʼngwoda na ma, a ngaɗa na Pierre: Do ngaya a deɓa a sam ga, Sadan! Ka war a ka slafaɗamay sak. Aman ka hér skwi Zhiklè ka ɓai, ka hér skwi ndohai.

²⁴ A Yèsu a ngaɗa ta golahi nengaʼa: Ndo man a woya a ndzadzarkayè, da hur a géɗ nshèffè na ɓai, da zuɓ wof ngézlèl na, da dzadzarkayè!

²⁵ Aman ndo man a woya a mbél nshèffè na a ri na, a da zede nshèffè na. Aman ndo man a zede nshèffè na a géɗ ga, a da ngècèʼa a deɓa.

²⁶ Ndo man a ngots herkeda tèlèba, aman a zede nshèffè nengaʼa, a ngècè te pa mè? Ndo a shum nshèffè na a mè?

²⁷ Kra-ndo a di a shkè a nʼnjèl Bab na, a nda golahi nengaʼa. Te deɓaʼa a da va na ndo staɗ staɗ tèlèba te di skwi man a gau.

²⁸ A vava i gaɗa kinè: Ndohi ngiɗè man ta zhè a haha, ta metsi di azɓai, sèi ta rka kra-ndo man a shkè te kokwar-Bi nengaʼa dai.