Matthew 13 - Ma Zhiklè

Ngèlègèɗ-ma a géɗ ndo nwush tser skwai

¹ A pats nasa Yèsu a ndo auda te gai, a nʼnza a ma iyam mbiaʼa.

² A ndohi rèdèdèa ta ɓücko va a sam na, a Yèsu a mdo a wurom, a nʼnzahai, a ndohi rèdèdèa ta zlatsa a ma iyam.

³ Yèsu a ngaɗa ta ma kumba a ngèlègèɗ-ma: Na haha, ndo nwush tser skwai a mdo auda, aman a nwushè tser skwai.

⁴ Aman a mwusha ma, faɗkata ta wusha a civèɗ, a ɗiakihi ta shkè, a ta ndedama.

⁵ Faɗkata ta wusha a verzi pra, man herkeda az a pa a vata ɓai. Tsam-tsam nftsa, aman herkeda az a pa a vata ɓai.

⁶ Aman pats a dzai, a halala, a ngworaʼa, te man ta tsa zluzlor ɓai.

⁷ Ngidè faɗkata ta wusha a ndev vatakihai. A vatakihai ta grè a vna, a ta pizl ta a pa.

⁸ Ngidè faɗkata ta wusha a sam mbelaʼa, a ta yu wuda, ngiɗè 100, ngiɗè 60, ngiɗè 30 te verzi skwi staɗ.

⁹ Ndo man zlembaɗ na a zhè, da tsenaʼa!

Verzi ngèlègèɗ-ma

¹⁰ A golahi Yèsu ta shkè, a ta gaɗa na: Ka njè ta ma a ngèlègèɗ-ma èhèmè?

¹¹ A Yèsu a mʼmbeɗa ta a ma: Skwi man nʼngheda te kokwar-Bi-Zhiklè, a kinè. Aman a tengaʼa ka ɓai.

¹² Ndo man a nʼngots skwai, ta va na a vaʼa, aman a ngots a vata, a njèkèɗiaʼa a zhè. Aman ndo man a ngatsa skwa ɓai, ko skwi man a ngotso, ta cèma na.

¹³ Gar haha i gaɗa ta ma a ngèlègèɗ-ma, di ta a zhè, ta rka ɓai; zlembaɗ ta a zhè, ta tsena ɓai, a ta sun bai.

¹⁴ A sam tengaʼa a gi ara ma Zhiklè, man Esaie a hodko ta, a ngaɗa: Kin fi zlembaɗ, kin tsena ɓai; kin pi dai, kin rka ɓai.

¹⁵ Aman ndav ndohi haha nsassaya, a ta pizlè di ta, aman ta rka di ɓai, aman ta tsena zlembaɗ bai, aman ta sun te ndav bai, a ta woy a ta menkada deɓa a i da mbel ta ɓai.

¹⁶ Aman mwuffe a sam kinè, man di kinè a rka skwai, man zlembaɗ kinè a tsena ma.

¹⁷ Aman i gaɗa kinè a vava halaʼa ndohi nhadka ma a ndohi nzuraʼa kumba ta woy a ta rka skwi man kin rkaʼa, aman ta rka ɓai: a ta woy a ta tsena ma man kin tsenaʼa, aman ta tsena ɓai.

Yèsu a ngrede ngèlègèɗ-ma ndo nwush tser skwai

¹⁸ Va-tsena verzi ngèlègèɗ-ma a géɗ ndo nwush tser skwai:

¹⁹ Ko wawa man a tsena ma kokwar-Bi-Zhiklè, aman a sun ɓai, ndo ngedassa ndo a ngezlda ma man ta wusheda a ndav na, a ma; nengaʼa nara skwi man a wushahai a civèɗ.

²⁰ Ngidè man a wusha a verzi pra, nara ndo man a tsena ma, tsam-tsam a cèʼa a mwuffè.

²¹ Aman a ntsa zluzlor te ndav na ɓai, a nzi kètè gene. A matakwan a shkè, a ta paraha a géɗ ma Zhiklè, a slafadama na sak.

²² Ngidè man a wusha a ndev vatakihai, nara ndo man a tsena maʼa, aman a hér gèɗ; ntètèkè skwi mèshèlè a skwi kumba a pèkèteda, a mpizlè na ma a pa, a yi wuda azɓai.

²³ Ngidè man a wusha a sam mbelaʼa, nara ndo man a tsena maʼa, a sun te ndav na, a yi wuda, ngiɗè 100, ngiɗè 60, ngiɗè 30 te verzi skwi staɗ.

Dau zizlè te gi dau

²⁴ A ngaɗa ta ngèlègèɗ-ma ngiɗè, a ngaɗa: Kokwar-Bi-Zhiklè lèmèlèmè ara ndo, man a wushè tser skwi mbelaʼa a gi dau na.

²⁵ Aman a vaɗ, man ndohi ta nzhuna, ndo mayam na a mshkè, a nwusha na dau zizlè a va dau, a mdo na.

²⁶ Aman skwi nftsa ma, a dè gèɗ auda, dau zizlè ba a gudko gèɗ auda.

²⁷ A ndohi mizlinè ta shkè a sam bab gi dau, a ta gaɗa na: Bai, ka wusha tser skwi mbelaʼa a gi dau ngaya ka ɓi, ɗè? Dau zizlè a shkè tema?

²⁸ A nengaʼa a ngaɗa ta: Ndo mayam a ngau. A ndohi mizlinè ta gaɗa na: Ka woya aman nga dè a nga pelkoɗauda dè?

²⁹ A bab gi dau a ngaɗa ta: Azɓai, man ɓai kin da pelkoɗauda cèw ba.

³⁰ Sèi kin jèke ta cèw ba, aman ta grè a vna, ha pats man nsla. A pats man nsla i da gaɗa ta ndohi ntsi dau: Va-ɓica dau zizlè nshè-lèkuraʼa, va-manaʼa, va-wusheda a vogwa. Aman dau, va-ɓiceda a wov ga!

Ngèlègèɗ-ma tser gevda

³¹ Yèsu a ngaɗa ta ngèlègèɗ-ma ngiɗè: Kokwar-Bi-Zhiklè lèmèlèmè ara tser gevda, man ndo ngiɗè a mco, a nzlekeda a gi dau na.

³² Tser gevda, nkèshèa nengaʼa te va tser skwi tèlèba. Aman ngra ma, a nfena vahhi ngiɗè tèlèba, a gi a wof man ɗiakihi thwaɗ giɗfèk ta gi gi ta a hwaɗaʼa.

Ngèlègèɗ-ma a géɗ skwi nshégèr skwai

³³ A ngaɗa ta ngèlègèɗ-ma ngiɗè: Ko-kwar-Bi-Zhiklè lèmèlèmè ara skwi nshégèr skwai, man ngwoz a mco, a nhumda na va gufa, agoda 30, ha a nsagara gufa tèlèba.

Njè-ma Yèsu a ngèlègèɗ ma

³⁴ Yèsu a ngaɗa ta ndohi rèdèdèʼa ma haha tèlèba a ngèlègèɗ-ma. Man a ngèlègèɗ-ma ka ɓai, a ngaɗa ta ɓai.

³⁵ A gi ara ma Zhiklè man a goɗ te ma ndo nhadka ma: I da gaɗa ta a ngèlègèɗ-ma, i da gaɗa ta a ma man nghedaʼa daga nhinkaɗ herkeda.

Yèsu a ngreda ngèlègèɗ-ma dau zizlè

³⁶ Te deɓaʼa a njèke ta ndohi rèdèdèʼa a pa, a mshkè a gai, a golahi nengaʼa ta shkè a sam na, a ta gaɗa na: Ngra nga ngèlègèɗ-ma a géɗ dau zizlè te gi dau!

³⁷ Yèsu a mʼmbeɗa ta a ma: Ndo man a wushè tser skwi mbelaʼa, nengaʼa kra-ndo.

³⁸ Gi dau, nengaʼa herkeda. Tser skwi mbelaʼa, nasa ndohi kokwar-Bi-Zhiklè. Dau zizlè, nasa wud ndo ngedassa ndo.

³⁹ Ndo mayam man a wushe dau zizlè, nasa bi-madzagai. Pats man nsla, nengaʼa pats man herkeda a ndev na. Ndohi ntsi dau, tengaʼa golahi Zhiklè.

⁴⁰ Lèmèlèmè ara man ta ɓicè dau zizlè a ta wusheda a vogwa, lèmèlèmè a da gi a pats man herkeda a da ndev na.

⁴¹ Kra-ndo a di a zlündkodi golahi nengaʼa, a ta ɓicè ndohi tèlèba man ta slafadama ta sak a ndohai, a ndohi mphömè, te kokwar-Bi nengaʼa.

⁴² Ta da wushede ta a vogwa mbiaʼa. Te pa ta da kuɗai, a ta da peɗi zlèʼèn.

⁴³ A ndohi nzuraʼa ta da hél sam te kokwar-Bi Bab ta, ara pats. Ndo man zlembaɗ na a zhè, da tsenaʼa!

Skwi mèshèlè nʼnghedaʼa, a kwa mbelaʼa

⁴⁴ Kokwar-Bi-Zhiklè lèmèlèmè ara skwi mèshèlè nʼnghedaʼa te gi dau, a ndo ngiɗè a nʼngotso, a nʼngheda zaʼa. A géɗ mwuffè nengaʼa, a dè a preda skwi na a ma tèlèba, a nshum gi dau matsa.

⁴⁵ A va zaʼa, kokwar-Bi-Zhiklè lèmèlèmè ara ndo ganai, man a woy kwa mbelaʼa.

⁴⁶ Aman a ngots kwa mbelaʼa staɗ, gani nengaʼa kumba, a nda preda skwi nengaʼa a ma tèlèba, a nshum nengaʼa.

Lata

⁴⁷ A va zaʼa, kokwar-Bi-Zhiklè lèmèlèmè ara lata, man ta wusheda a iyam mbiaʼa, aman a ɓicè skwi nte iyam tsaɗ tsaɗ.

⁴⁸ Aman nʼndha ma, ta ngozlkoɗai a dzah, a ta nzahai a ta pèr skwi man amba a kokwi ngiɗè, skwi man ambaɓai ta wushedaussa.

⁴⁹ A gi lèmèlèmè a pats man herkeda a da ndev na. Golahi Zhiklè ta dè a ta pèr ndohi ambaɓihiaʼa auda te ndev ndohi nzuraʼa,

⁵⁰ a ta da wushede ta a vogwa mbiaʼa. Te pa ta da kuɗai a ta da peɗi zlèʼèn.

Skwi mèshèlè mɓuaʼa, a skwi mèshèlè mʼmovaʼa

⁵¹ Yèsu a ngaɗa ta: Kin sun skwi haha tèlè ɗè? A ta gaɗa na: Halau!

⁵² Aman Yèsu a ngaɗa ta: Gar haha malam staɗ staɗ tèlèba, man nʼnde na a ndo kokwar-Bi-Zhiklè, lèmèlèmè ara babgai, man a ngecè skwi auda te skwi mèshèlè nengaʼa, ko skwi mɓuaʼa ko skwi mʼmovaʼa.

Ta kwola Yèsu te Nazareth

⁵³ Aman Yèsu a nʼndeva ngèlègèɗ-ma haha ma, a nde na.

⁵⁴ A ndo a kokwar bab na, a nsenda ta ma te gi-njèngè-ma-Zhiklè, tèlèba ta rzl ta, a ta gaɗa: A nʼngotsko maya a wuɗi haha tema?

⁵⁵ Nengaʼa kra ndo mbèzl wof ka bi dè? Mam nengaʼa Marie ka ɓi dè? Kramamhi nengaʼa Jacques a Joseph a Simon a Jude ka ɓi dè?

⁵⁶ Demamhi nengaʼa ta zhè tèlè a sam nga ka ɓi dè? Nengaʼa a nʼngotsko wuɗi tèlèba tema?

⁵⁷ A skwi haha a nslafaɗama ta sak. Aman Yèsu a ngaɗa ta: Ta slébèrdè ndo nhadka ma; aman te kokwar bab na ka ɓai, te gi nenga ka ɓai.

⁵⁸ Yèsu a nga nrkedi te pa kumba ɓai, a géɗ man ta ca a ndav ɓai.