Marc 5 - Ma Zhiklè

Yèsu a dzar ta mèzhèɓhi ambaɓihiaʼa auda te kokwar Gadara

¹ A ta ndika a wud woyam mbiaʼa, a kokwar Gadara.

² Aman Yèsu a mshkè auda te wurom, a nasa nasa ta zlü gèɗ a ndo ngiɗè man mèzhèɓ ambaɓiaʼa a ga na.

³ Nengaʼa a mshkè auda a sam gi dzavihai. Ndo azɓai, man a slaha a ndzawaʼa, ko a teɓa züdo.

⁴ A sam ngiɗè, ndzawaʼa a teɓa züdo te sak; a nengaʼa a ruhda teɓa züdo aussa, a ngesla teɓa züdo te sak, ndo azɓai man a slaha a ngshèʼa.

⁵ Nengaʼa a njèkeda sam gi dzavi bai, a vaɗ a pats a zhè te za, a tsi lalau, a kèldè va na a kwa.

⁶ A nrka Yèsu dra, a nhakaɗai, a nkalahai a deb sak nengaʼa,

⁷ a ntsu lalau, a ngaɗa: Nga gakaɗa a ka mè, Yèsu! Ka, kra Zhiklè te géɗèʼa! I mbaɗa ka a nzlembaɗ Zhiklè, ka gay matakwan bai!

⁸ Aman Yèsu a ngaɗa na: Mèzhèɓ ambabiaʼa, do auda te ndo haha!

⁹ A ndzhoɗo: Nzlembaɗ ngay wa?

¹⁰ A nengaʼa a ngaɗa na: Nzlembaɗ ga rèdèdèʼa, aman nga kumba. A ntsu riaʼa a vata: Kam, kam, ka dzam nga auda a haha ɓai!

¹¹ Aman a der za rèwè wodalahi a zhè a ta ndi mandai.

¹² A madzagihai sa tèlèba ta gaɗa na: Pre nga a va wodalahi ahngata, a nga dè a va tengaʼa.

¹³ A Yèsu a mpre ta. Tsam tsam mèzhèɓhi ambaɓihiaʼa ta shkè auda, a to do a va wodalahai, a wodalahi ta wush ta a iyam mbiaʼa. Wodalahi a gi 2.000, tèlè ta bazl ta a iyam mbiaʼa.

¹⁴ Ndohi mɓer ta ta hu ta, a to do a kokwar, a ta ngreda ta maʼa. A maʼa a ntsena a ngwai te kokwar mbiaʼa, a kokwar nkèshèa, a ndohi to do, a ta rka skwiaʼa.

¹⁵ Ta shkè a tsagi Yèsu, a ta rka ndo man a matsa madzagi a ga na, a nʼnzaʼa, maslaka a va, a maya te gèɗ; a zlau a ndza ta.

¹⁶ A tengahi man ta rka skwi man a ga na ndo madzagi sa, a ma wodalahai, ta ngreda ta ndohi ngiɗè man ta shkè.

¹⁷ Te deɓaʼa ta hüno a ta dzhoɗo, aman Yèsu a jòka ta kokwar ta.

¹⁸ Aman a mdo a wurom, nengaʼa man a matsa madzagi a ga na, a ndzhoɗo, a woya man a ta nzi a vna.

¹⁹ A Yèsu a mva na civèɗ ɓai, aman a ngaɗa na: Do a gi ngaya, a sam gwoli ngaya, a ka gada ta ma tèlèba, man Bi Zhiklè a ga ka, ara man ka su te va.

²⁰ A ndo na, a hüno man a njè ta te kokwar Décapole skwi tèlè man Yèsu a ga na. Tèlèba ta rzl ta.

Dem Jairus a ngwoz man a lama na maslaka Yèsu

²¹ A Yèsu a mʼmen na a deɓa a wud woyam ngiɗè a wurom. Te pa ndohi rèdèdèʼa ta ɓücko va a tsagi nengaʼa.

²² Nengaʼa a ma iyam. Na haha, bi ngiɗè staɗ te gi njèngè ma Zhiklè a mshkè, nzlembaɗ na Jairus. Aman a rkaʼa, a nkalahi a deɓ sak Yèsu,

²³ a ntsu riaʼa a vata, a ngaɗa: Dem ga nkèshèa a woy mʼmetsai. Washkè, a ka fa na ri ngaya a gèɗ, aman a mbel na, a nzi a nshèffè.

²⁴ A nda Yèsu a to do a vna. A ndohi rèdèdèa ta dzodzora, ta ndéɗècèʼa.

²⁵ A ngwoz ngiɗè a zhè, hwaɗ a va, mvi 12.

²⁶ Ndohi madzaf ta ga na matakwan kumba, a nʼndeva skwi nengaʼa tèlèba, nʼnga na dara ɓai, a nherdaha holholaʼa.

²⁷ Aman a ntsena labar ma Yèsu, a mshkè te deɓa, a nʼndo a ndev ndohi rèdèdèʼa, a nlama na maslaka nengaʼa,

²⁸ aman a gada: Ko man i da lama na maslaka na genè ba, i mbél ga.

²⁹ A nasa nasa sam man Pombaz a hakaɗauda, a ngwor na, a nengaʼa a sun te va na, mʼmbela ma te matakwan nengaʼa.

³⁰ Tsam tsam Yèsu a sun te ndav na, wuɗi kètè kala auda te va nengaʼa. A nʼngwode va na a deɓa te ndev ndohi rèdèdèa, a ngaɗa: Nlama na maslaka ga wa?

³¹ Golahi nengaʼa ta gada na: Ka rka ndohi rèdèdèa, man ta ndeɗats ka, a ka gada: Nlamay wa?

³² A Yèsu a nturɗo va, a wèreʼa, aman a nrka nengaʼa man a gu arsa.

³³ A ngwoz a ngu zlau, a ngudzau, a sun skwi man a gu te va na. A mshkè, a nkalahi a deɓ sak nengaʼa, a ngaɗa na ma zuraʼa tèlèba.

³⁴ Aman Yèsu a ngaɗa na: Dem ga, ncè-a-ndav ngaya a mʼmbel ka ma. Do a gumai! Ka mbela ma!

³⁵ Aman a gèɗè dai, ndohi te gi bi gi njèngè ma Zhiklè ta shkè ta gada: Dem ngaya mʼmets na ma. Ka gedka na matakwan a ndo njèngè ma èhèmè?

³⁶ Aman Yèsu, ara man a tsena ɓai, a ngaɗa na bi gi njèngè ma Zhiklè: Ka gu zlau ɓai, co a ndav genè!

³⁷ A mva na civèɗ a ndo ɓai, sèi a Pierre a Jacques a Jean, kramam Jacques, man ta dè a vna. A ta ndika a gi bi gi njèngè ma Zhiklè.

³⁸ Te pa, Yèsu a nrka ndohi rèdèdèa ta rubai, a ndohi ta kuɗai, a ta tsi lalau.

³⁹ A mdo a pa, a ngaɗa ta: Kin hèzlèwè ar haha èhèmè, kin kuɗ mè? Demaʼa mʼmetsa ɓai, aman a nzhun genè.

⁴⁰ A ta ngwossaha. Te deɓaʼa, aman a ndzarka ta tèlèba auda ma, a nda bab a mam demaʼa, a ndohi man ta shke a nda nengaʼa, to do a gai, man demaʼa te pa.

⁴¹ A ngso riaʼa, a ngaɗa na: Talitha koumi! ara ngèɗè: Bidalai, i gaɗa ka, slambaɗa!

⁴² A nasa nasa dem sa a nslambaɗa, a ndè. Mvi nengaʼa 12. A ta rzl ta kurzlaʼa.

⁴³ A Yèsu a mfa ta ma a gèɗ: Ndo da sun skwi haha ɓai! A ngaɗa ta, aman ta va na skwi nʼndai a demaʼa.