Marc 3 - Ma Zhiklè

Ndo man ri na ngwora

¹ Yèsu a mdo a deɓa a gi njèngè ma Zhiklè zaʼa. Ndo staɗ a zhè te pa, ri nengaʼa ngwora.

² A ta kotè Yèsu, aman ta rkaʼa: a da mbelaʼa a pats nshèk va dè? Ta hèsh maya aman ta slaha a ta pinèʼa.

³ A Yèsu a ngaɗa na ndo man ri ngwora Slambaɗ ngay auda te ndev tengaʼa!

⁴ Te deɓaʼa a ngaɗa ta: A pats nshèk va a woy ta gi skwi man amba dè, dè skwi man ambaɓi dè? A woy ta mbel ndo dè, dè, ta keɗaʼa dè? Aman a ta nza tètè.

⁵ A Yèsu a mpu di a ndohi tèlèba, a ngu ndav, ndav nengaʼa a nkuɗau, a géɗ man ndav tengaʼa nsassaya, a ngaɗa na ndo matsa: Pelaha ri ngaya! A mpelaha rai, a ri nengaʼa ntila ma.

⁶ Aman ndohi to do ta auda ma, tsam tsam ndohi pharisie a ndohi Hérode ta vhè ma a géɗèʼa, a ta woya aman a ta keɗaʼa.

Ndohi rèdèdèa a ma iyam mbiaʼa

⁷ A Yèsu a mdo na a ma iyam mbiaʼa nda golahi nengaʼa. Ndohi rèdèdèʼa ta dzodzora te Galilée, te Judée,

⁸ te Jérusalem, te Idumée, tʼwud woyam Jourdain, tʼhwaɗ Tyr a Sidon. Ndohi rèdèdèʼa aman ta tsena skwi man a gau, ta shkè sam na.

⁹ A Yèsu a fa ta ma a gèɗ a golahi nengaʼa, a woy wurom nkèshèa a zhè a sam na, aman ndohi rèdèdèa ta ndèɗècèʼa azɓai.

¹⁰ A géɗ man a mʼmbel ta ndohi kumba te matakwan, ndohi matakwan tèlèba ta gu gazawa, aman ta lama na.

¹¹ Mèzhèɓhi ambaɓihiaʼa, aman ta rkaʼa, ta gurɓahai a sam na, a ta tsu lalau, a ta gada: Ka kra Zhiklè!

¹² A Yèsu a mfa ta ma a gèɗ zuraʼa, aman ta ngredèʼa a sam ndohi ngiɗè azɓai.

Yèsu a mpar ta ndohi 12

¹³ Te deɓaʼa a nteva za, a mbaha ta tengahi man a par ta, a ta shkè a tsagi na.

¹⁴ A mpar ta 12, aman ta nzi a sam na, a woy ta a ndohi sak na, a ta da njè ma mbelaw.

¹⁵ A mva ta wuɗai, aman ta jèr madzagihai.

¹⁶ Tengaʼa nkula a géɗèʼa cèw ta a haha: Simon, man a baha na Pierre;

¹⁷ Jacques, kra Zébédée, a Jean, kramam Jacques, tengaʼa a mbaha ta Boanergès, ara ntsi iyam;

¹⁸ André; Philippe; Bar-thélemy; Matthieu; Thomas; Jacques, kra Alphée; Thaddée; Simon ndo Cana;

¹⁹ a Judas Iscariot, nengaʼa man a nga na ri a gèɗ Yèsu.

Yèsu a madzagai

²⁰ A ta shkè a deɓa a gai, a ndohi rèdèdèa ta ɓica va zaʼa, a Yèsu a golahi nengaʼa ta ngatsa ri a ndi skwi nʼndi ɓai.

²¹ A ndohi gi Yèsu, aman ta tsena skwi man a gau, ta shkè aman ta gshèʼa, aman ta gada: Gèd na za.

²² Malamhai, man ta shkèhi te Jérusalem, ta goɗ zaʼa: Madzagi a ga na. A jèr madzagihai auda a bi madzagihai.

²³ A Yèsu a mbaha ta, a ngaɗa ta a ngèlègèɗ ma: Sadan a slaha man a jèr va na dè?

²⁴ Kokwar-bi nkezla te va, kokwar-bi matsa a slaha man a nzi azɓai.

²⁵ Aman te gi staɗ, gèɗ ndohi nkezla, gi matsa a slaha man a nzi azɓai.

²⁶ Aman kokwar-bi Sadan a ngi gèɗ a va na, nengaʼa nkezla te va, a slaha man a nzi azɓai, a di a ndiv na.

²⁷ Ndo a slaha a ndè a gi ndo wuɗai, a ngi metsar te gi nengaʼa, azɓai, sèi a dzawa ndo wuɗi dai. Te deɓaʼa a nda gi metsar te gi nengaʼa.

²⁸ A vava i gada kinè: mali tèlèba, a ma ndérɗè ndo tèlèba, Zhiklè a pra ta ndohai.

²⁹ Aman ndo man a derɗe Mèzhèɓ Zhiklè nkezlaʼa, mali nengaʼa a prè azɓai a mèdèp. Nengaʼa a ngu mali man a nzi a mèdèp.

³⁰ Yèsu a ngoɗ ar haha, a géɗ man ta gada, mèzhèɓ ambaɓi a ga na.

Mam a kramamhi Yèsu

³¹ Mam nengaʼa, a kramamhi nengaʼa ta shkè, a ta zlatsa tʼuda, a ta zlündo ndo a nda baha na.

³² Ndohi rèdèdèʼa ta nza, a ta tèuda a pa, a ta gada na: Na haha, nda mam ngaya a kramamhi ngaya tʼuda. Ta dzhaɗ ka.

³³ A Yèsu a mʼmbeɗa ta a ma: Mam ga a wa? Kramamhi ga a wa?

³⁴ Te deɓaʼa a pi di a tengaʼa man ta nza, a ta tèuda a pa, a ngaɗa ta: Na haha, mam ga, a kramamhi ga.

³⁵ Aman ko wawa man a gi skwi man Zhiklè a woyaʼa, nengaʼa kramam ga, demam ga, mam ga.