Marc 10 - Ma Zhiklè

Njè-ma Yèsu a géɗ njèkè ngwoz

¹ A Yèsu a nslambaɗa, a mdo a kokwar Judée, a wud woyam Jourdain. Ndohi rèdèdèa ta nzahi zaʼa a sam nengaʼa. Ara man a gia pèc pècèk, a hüno man a senda ta.

² Ndohi pharisie ta shkè a sam na, ta dzhoɗo, a ta jkedaʼa: Ndo a slaha a nkwola ngwoz na dè?

³ A Yèsu a mʼmbeɗa ta a ma: Moise a gada kinè kè?

⁴ Ta gaɗa: Moise a mva nga civèɗ, aman nga windè ɗèlèwèr njèkè ngwoz, a nga jèkeda.

⁵ Yèsu a mʼmbeɗa ta a ma: Moise a mva kinè ma haha, a gèɗ man ndav kinè nsassaya.

⁶ Te nhinkaɗ na, Zhiklè a ngu ngu-raʼa a ngwoz.

⁷ Gar haha nguraʼa a di a jèkeda bab na a mam na,

⁸ a ta nzi a ngwoz na, ta cèw ta gi ara ndo staɗ. Tengaʼa ta az cèw ɓai, aman ta nstad.

⁹ Gar haha skwi man Zhiklè a humda, ndo da kezla ɓai!

¹⁰ Aman ta te gai, golahi Yèsu ta dzhoɗo zaʼa a géɗèʼa.

¹¹ A Yèsu a ngaɗa ta: Ko wawa man a jèkeda ngwoz na, a ce ngwoz ngiɗè, a gi mphömè a sam ngwoz na nshèlèkuraʼa.

¹² Aman ngwoz ngiɗè a jèkeda baki na, a dè a gi baki ngiɗè, a gi mphömè.

Yèsu a pshè ta ma wudahai

¹³ A ta hulkoɗi wudahi a sam na, aman a lama ta. Aman golahi Yèsu ta ga ta ndzoan a ndohi nhelka ta wudahai.

¹⁴ Aman a rkaʼa, a ndza na a ndav a Yèsu, a ngaɗa ta: Va-jèk ta wudahi aman ta shkè a sam ga! Kin gedassa civèɗ tengaʼa ɓai, aman kokwar Bi Zhiklè a ndohi ara tengaʼa.

¹⁵ A vava i gaɗa kinè: ko wawa man a cè kokwar Bi Zhiklè ara kra azɓai, a dè a pa azɓi fèt.

¹⁶ Te deɓaʼa a nhumbat ta, a mpshè ta ma, a mfa ta ri a gèɗ.

Ndo mèshèlè

¹⁷ Aman Yèsu a civèɗ ma, ndo ngiɗè a nhakaɗai, a ngurɓahai a sam na, a ndzhoɗo: Ndo njèngè ma man amba: I da gi be kè, aman i ngècè nshèffe mbiaʼa man a ndev azɓai a mèdèp?

¹⁸ Yèsu a ngaɗa na: Ka bahayè man amba èhèmè? Man amba, na staɗgenè, sèi Zhiklè.

¹⁹ Ka sun ma Zhiklè: Ka kuɗ ndo ɓai, ka gu mphömè ɓai, ka gu metsar ɓai, ka gu malwuɗi ncèkèlma ɓai, ka ngwoda ri a ndo ɓai, slubordo bab ngaya a mam ngaya!

²⁰ Nengaʼa a ngaɗa na: Ndo njèngè ma, i goko skwia daga man i kra.

²¹ A Yèsu a mpa na dai, a woyaʼa a ndav na, a ngaɗa na: Njèkè skwi staɗ a sam ngaya: Do, preda skwi ngaya tèlèba a ma, va ta ndohi ntawassaʼa, a ka ngècè skwi mèshèlè te zhiklè te géɗèʼa. A ka shkè, dza-dzarkayè!

²² A ndav ndo matsa a mʼmbeɗ na, a gèɗ ma haha. A mdo na, a ndav man a kuɗai; aman skwi nengaʼa a zhè a vata.

²³ A Yèsu a mpu dai, a ngaɗa ta golahi nengaʼa: Wuɗitpa a ndohi man skwi ta a zhè a vata, aman a ta dè a kokwar Bi Zhiklè.

²⁴ Golahi Yèsu ta huro a vata a gèɗ ma nengaʼa. A Yèsu a hüno a ngaɗa ta: Wudahi ga, wuɗitpa a sam ndohai, aman a ta dè a kokwar Bi Zhiklè.

²⁵ Dara zlugumai man a ɓizhè a vèvèɗ lèpèr, a géɗ ndo mèshèlè man a dè a kokwar Bi Zhiklè.

²⁶ A golahi Yèsu ta rzl ta kurzlaʼa, a ta goɗ a va ta: Nslaha a mbél wa?

²⁷ A Yèsu a mpa ta dai, a ngaɗa: Ndo a slaha ɓai, sèi Bi Zhiklè! Bi Zhiklè a slaha skwi tèlèba.

²⁸ A Pierre a hüno a ngaɗa na: Na haha, nga jèkeda skwi tèlèba, a nga dzadzar ka.

²⁹ A Yèsu a ngaɗa na: A vava i gada kinè, ko wawa man a njèkeda gi na, man kramamhi na, man demamhi na, man mam na, man bab na, man wudahi na, man gi dauhi na, a géɗ ga, a géɗ ma mbelaʼa,

³⁰ aman a ngècè a vaʼa azɓai a gi 100, 100, ko ta paraha, tʼherkeda antanta: gihai, kramamhai, demamhai, mamhai, wudahai, gi dauhai; te deɓaʼa te zhiklè te géâèʼa nshèffè mbiaʼa man a ndiv azɓai a mèdèp.

³¹ A ndohi kumba te va ndohi nshèlèkurhiaʼa ta da ndi a nʼndikèma ndohai. A nʼndikèma ndohai, ta da ndi a ndohi nshèlèkurhiaʼa.

Yèsu a hodko mʼmetsi nengaʼa mamakaraʼa

³² Ta a civèɗ man ta dè Jérusalem, a Yèsu a mdo a ma tengaʼa. A golahi Yèsu ta hur te ndav a vata, a ta dzodzora a zlau.

³³ Yèsu a nhelka ta 12 zaʼa a sam na, a hüno man a ngreda ta skwi man sèi a di a shkè a géɗ nengaʼa: Na haha, nga dè a kokwar Jérusalem; ta da vi kra-ndo a ri a ndohi mvi skwi a Zhiklè mbibihiaʼa, a malamhai. Ta da ngela na kita mʼmetsai, a ta da va na a ri a ndohi herkeda.

³⁴ Ta da ngwossaha kiɗè-kiɗèʼa, a ta njfa na slèslèɓ a dai, a ta ndèhaʼa a mènèwèɗ, a ta da keɗaʼa. Te deɓ mèn makar a da slambaɗkaɗauda.

Njhèɗè-ma Jacques a Jean

³⁵ Jacques a Jean, wudahi Zébédée cèw, to do a sam Yèsu, a ta gaɗa na: Ndo njèngè ma, nga woy a ka ga nga skwi mèmè man nga jhèɗè a sam ngaya.

³⁶ A Yèsu a ngaɗa ta: Kin woy a i ga kinè mè?

³⁷ Ta gaɗa na: Va nga, aman nga nzi a sam ngaya, staɗ a ri mandi ngaya, staɗ a ri gula ngaya, aman ka zhe a sam nʼnjèl ngaya.

³⁸ A Yèsu a ngaɗa ta: Kin sun skwi man kin jhèɗè ɓai. Kin slaha kin si a kokwi man i sia te pa de? A kin slaha kin gi baptême man sèi ta gayè ndèzl ɗè?

³⁹ Ta gada na: Nga slaha. A Yèsu a ngaɗa ta: Kin si a kokwi man i sia te pa ndèzl, a kin gi baptême man sèi ta gayè ndèzl.

⁴⁰ Aman nʼnzi te ri mandai, te ri gula ga, nasa ma ga ka ɓai. Sam nʼnzi sa sèi a tengaʼa, man Zhiklè a tila ta a tengaʼa.

⁴¹ Ta kula, aman ta tsena ma haha, ta hüno ngi ndav a géɗ Jacques a Jean.

⁴² A Yèsu a mbaha ta, a ngaɗa ta: Kin suna, bihi herkeda ta kwor ta ndohi herkeda, a ndohi mbibihiaʼa ta ga ta wuɗai.

⁴³ Te ndev kinè az arsa ɓai! Aman ko wawa man a woya a ngi a mbiaʼa te ndev kinè, da gu a ndo ntakaha kinè;

⁴⁴ ko wawa man a woya a ngi a tsuvomaʼa te ndev kinè, da gu a ɓèl ndohi tèlèba.

⁴⁵ Aman kra-ndo ba a shkè aman ndohi ta takaha ka ɓai; aman a shkè, aman a ntakaha ta ndohai, a vi nshèffè nengaʼa a skwi mpil gèɗ a géɗ ndohi kumba.

Bartimée, mandazlai, a rka dai

⁴⁶ A ta shkè a kokwar Jéricho. Mshkè Yèsu auda te kokwar, a nda golahi nengaʼa, a nda ndohi kumba, Bartimée, kra Timée, mandazlai man a hèsh skwai, a nʼnza a zolom civèɗ.

⁴⁷ Aman a ntsenaʼa, nasa Yèsu te Nazareth, a nhüno man a bèhè a wuɗai: Kra David, Yèsu, i da se ka te va!

⁴⁸ Tengahi ngiɗè ta ga na ndzoan, aman a nzi tètè. Aman nengaʼa a mboho a wuɗi holholaʼa: Kra David, i da se ka te va!

⁴⁹ A Yèsu a nzlatsahai, a ngaɗa: Va-baha na! A ta baha na mandazlai, a ta gada na: Mana ndav ngaya, ka gu zlau ɓai, slambaɗa, a baha ka!

⁵⁰ Ndo mandazlai a nkalda maslaka nengaʼa, a nslambaɗa, a nzevai, a mshkè a sam Yèsu. Yèsu a ngaɗa na:

⁵¹ Ka woya a i ga ka mè? Ndo mandazlai a mʼmbeɗa na a ma: Rabbuni, i woya aman i rka dai!

⁵² A Yèsu a ngaɗa na: Do, ncè-a-ndav ngaya a mʼmbel ka ma!

⁵³ A nasa nasa a rka dai, a ndzodzor Yèsu.