Mal. 3 - Ma Zhiklè

¹ Na haha i zlündo ndo sak ga, a til civèɗ a ma ga. Tsam-tsam Ndo nzi pèc pècèk man kin jhèɗèʼa, a shkè a gi nengaʼa. Gol Zhiklè nɗerzlè-ma man kin woyaʼa, na haha a shkè, Zhiklè bi mbiaʼa a gaɗa.

² Nslaha a nʼnzi a pats mshkè nengaʼa wa? Aman a gudko va a dai, nda zlècè wa? Mshkè nengaʼa ara vogwa ndo nwèsl züdo, ara iyam lalau ndo mpèn maslaka.

³ Ndo nzi pèc pècèk a da nzi a hai, a wèsl skwi tèlèba, a pènè skwi tèlèba, a da til wudahi Lévi, a da wosl ta ara guro a verzhègenè, aman ta va na skwi a Zhiklè zuraʼa.

⁴ A skwi man Juda a Jérusalem ta va na a Ndo nzi pèc pècèk a gi ambaha, lèmèlèmè ara man a gu zlèzlèʼa tʼhinkaɗ na.

⁵ I herdeka kinè va a i gi kita, a i gi a ndo malwuɗi nwoslaʼa a géɗ ndohi mʼmbèh skwai, a géɗ ndohi mphömè, a géɗ ndohi mʼmbèɗè a ncèkèlma, a géɗ ndohi man ta ga ta matakwan a ndohi mizlinè ta, a ngwozi mazihai, a wud dikai, ndo mbrok, a géɗ ndohi tèlèba man ta gi zlau ga azɓai, Zhiklè bi mbiaʼa a gaɗa.

Metsar a sam Zhiklè

⁶ Aman iyè, Ndo nzi pèc pècèk, i ngwèdè va ga azɓai; aman kinè, wudahi Jacob, kinè arsa genè!

⁷ A hünkoɗi te bababhi kinè, kin jèkeda ma ga, a kin dzadzara ɓai. Va-menkaɗa deɓa, a i woya a i dè deɓa a sam kinè, Zhiklè bi mbiaʼa a gaɗa. A kin jhèɗèʼa: Nga menkaɗa deɓa èhèmè?

⁸ Aman ndo a ngwoda ri a Zhiklè, ara man kin gi a haha, amba ɗè? Kin gaɗa: Nga ngwoda ri a ka te mè? Te skwi man kin co auda te va skwi kula a kin va na Zhiklè.

⁹ Ani haha i phomde kinè, te man kin gi rai a sam ga, kin tèlèba.

¹⁰ Aman va-hulko skwi kinè, man kin co auda te va skwi kula tèlèba a gi ga; a skwi nʼndi a zhè te gi ga. Va-jkedyè, man i dè winè nvakavar zhiklè, a i wusheda pombi a hi a géɗ kinè a vata, a njèkèɗia a zhè, azɓi da, Zhiklè bi mbiaʼa a gaɗa.

¹¹ A i woya ai gedassa skwi nʼndi dau, a gédèshè skwi te gi dau azɓai, a gédèshè skwi te gi lak ba azɓai, Zhiklè bi mbiaʼa a gaɗa.

¹² Te deɓaʼa ndohi herkeda tèlèba ta da gaɗa: Mwuffè a sam tengaʼa! Aman herkeda kinè nʼngaʼa a kokwar mbelaʼa, Zhiklè bi mbiaʼa a gaɗa.

Ma mwuɗitpa

¹³ Kin gèɗè ma nfi va a géɗ ga, Ndo nzi pèc pècèk a gaɗa. A kin gaɗa: Nga ngre ka tema?

¹⁴ Kin gaɗa: Ngi mizlinè Zhiklè, skwi ambalai. Nga jéjèr ma nengaʼa, nga lèyè a sam di Ndo nzi pèc pècèk, Zhiklè bi mbiaʼa, a takaha nga te mè?

¹⁵ Dara man nga gaɗa: Mwuffè a sam ndohi nfi va. Ndohi ndérɗè Zhiklè ta wèl va genè ka ɓai, ta pi Zhiklè a wai a ta zli va ta auda a samaʼa ba.

Ndohi Zhiklè

¹⁶ Ndohi man ta gi zlau Ndo nzi pèc pècèk, ta goɗ a va ta, a Ndo nzi pèc pècèk a nrkaʼa, a ntsenaʼa. A mwindo ɗèlèwèr mbèhè nzlembaɗ a sam na, a nzlembaɗ ndohi man ta gi zlau Ndo nzi pèc pècèk a pa, man ta slébèrdè nzlembaɗ nengaʼa.

¹⁷ Zhiklè bi mbiaʼa a gaɗa: Tengaʼa a ga ga; a pats kita ga, ta da siyè te va, ara man kra man a gi mizlinè a sam bab na a si bab na te va.

¹⁸ Te deɓaʼa kin ɗèlè auda te va ndo nzuraʼa a ndo nderɗè Zhiklè zaʼa, te va ndo man a gi mizlinè Zhiklè, a ndo man a gi mizlinè Zhiklè azɓai.