Luke 18 - Ma Zhiklè

Ngèlègèɗ-ma a géɗ ngwoz mazai a ndo kita

¹ A ngaɗa ta a ngèlègèɗ-ma: Amba aman kin tsi ri pèc pècèk, a kin ngez ɓai!

² A ngaɗa: Ndo kita ngiɗè a zhè te kokwar ngiɗè, man a fi gèɗ a Zhiklè azɓai, man a fi gèɗ a ndo azɓai.

³ Ngwoz mazi staɗ a zhè te kokwar matsa, a mshkè a sam na, a ngaɗa: Takahayè a sam mayamhi ga!

⁴ Pèc pècèk a woya ɓai. Aman te deɓaʼa a huro: Aman i gi zlau Zhiklè azɓai, ko i gi hori ndo azɓai,

⁵ i woya man i takaha ngwoz mazi haha, da ngezyè pèc pècèk asaɓai!

⁶ A Bai Yèsu a ngaɗa: Va-tsena ma man ndo kita nzuraʼa ka ɓi haha a ngoɗo.

⁷ A Zhiklè a takaha ta ndohi man a parka ta, azɓi dè, man ta tsi riaʼa a pats a vaɗ? A gi ndawali a ntakaha ta dè?

⁸ I gaɗa kinè, a takaha ta tsam tsam. Aman kra-ndo a shkè, a da ngècè ncè-a-ndav tʼherkeda dè?

Ngèlègèɗ-ma géɗ ndo pharisie a ndo ncèkèlè skwai

⁹ A ngaâa ta ndohi ngiɗè, man ta hur te ndav: nga ndohi nzuraʼa, a ta rka ta ndohi ngiɗè ara ndohi ambalai, ngèlègèɗ-ma haha:

¹⁰ Ndohi ngiɗè cèw to do a gi Zhi-klè, aman ta tsi rai. Staɗ ndo pharisie, ngiɗè ndo ncèkèlè skwai.

¹¹ Ndo pharisie a nzlatsa, a ntsu ri arsa: Zhiklè, i shida ka gèɗ, a géɗ man iyè ara ndohi ngiɗè ka ɓai, ara ndohi nked ndo ka ɓai, ndohi man ta gi zuraʼa azɓi ka ɓai, ndohi mphömè ka ɓai, ara ndo ncèkèlè skwai haha ka ɓai.

¹² I jèkeda skwi nʼndai tʼhwaɗ luma cèw cèw; te va skwi tèlèba man i ngotso, i cè auda staɗ te va kula, a i va na Zhiklè.

¹³ A ndo ncèkèlè skwai a nzlatsa dra, a woya a nce gèɗ a zhiklè ɓai, a mpeda ri a ndav, a ngaɗa: Zhiklè, i da se ka te va, i ndo malai!

¹⁴ I gaɗa kinè: Nengaʼa a nʼndo ngwai a ndo nzuraʼa, nara ngiɗè ka ɓai. Ndo man a gre gèɗ na a ri na, ta manda na gèɗ a hai. Ndo man a manda gèɗ na a hai a ri na, ta da slambaɗda na gèɗ.

Yèsu a pshè ta ma wudahai

¹⁵ A ta hulkoɗi wudahi a sam na, aman a lama ta. Aman golahi Yèsu ta rkaʼa, a ta ga ta ndzoan a ndohi nhelka ta wudahai.

¹⁶ Aman Yèsu a mbaha ta, a ngaɗa: Va-jèk ta wudahai, aman ta shkè a sam ga. Kin gedassa civèɗ tengaʼa ɓai! Aman kokwar Bi Zhiklè a ndohi ara tengaʼa.

¹⁷ A vava, i gaɗa kinè: Ko wawa man a cè kokwar Bi Zhiklè ara kra azɓai, a dè a pa azɓai.

Ndo mèshèlè

¹⁸ A ndo mbia ngiɗè a ndzhoɗo, a ngaɗa: Ndo njèngè ma man amba, i gi be kè, aman i ngècè nshèffè a mèdèp?

¹⁹ Yèsu a ngaɗa na: Ka bahayè man amba èhè-mè? Ndo man amba azɓai, sèi Zhiklè staɗgenè.

²⁰ Ka sun ma nkwèr Zhiklè: Ka gu mphömè ɓai, ka kuɗ ndo ɓai, ka gu metsar ɓai, ka gu malwuɗi ncèkèlma ɓai, slubordo bab ngaya a mam ngaya!

²¹ A nengaʼa a ngaɗa na: I goko skwi haha tèlèba daga kra.

²² A Yèsu a ntsena ma nengaʼa, a ngaɗa na: Njèkaʼa a sam ngaya skwi staɗ: Preda skwi ngaya tèlèba a ma, kezla ta ndohi ntawassaʼa, a ka ngècè skwi mèshèlè te zhiklè te géɗèʼa; a ka shkè, dzadzarkayè!

²³ Aman a ntsena ma haha, a ndza na a ndav kumba, aman skwi nengaʼa a a zhè a vata.

²⁴ Aman Yèsu a rkaʼa, ndav nengaʼa a kuɗai, a ngaɗa: Wuɗitpa a ndohi man skwi tengaʼa a zhè a vata, man ta dè a kokwar Bi Zhiklè.

²⁵ Dara zlugumai a bizhè a vèvèɗ lèpèr, a gèɗ ndo mèshèiè man a dè a kokwar Bi Zhiklè.

²⁶ A ndohi man ta tsenaʼa, ta gaɗa: Nslaha man a mbél wa?

²⁷ A nengaʼa a ngaɗa ta: Skwi man ndohi ta slaha ɓai, Zhiklè a slaha.

²⁸ A Pierre a ngaɗa: Na haha, nga jèkeda skwi nga tèlèba, a nga dzadzar ka.

²⁹ Yèsu a ngaɗa ta: A vava, i gaɗa kinè, ndo azɓai, man a njèkeda gi na, a bab na, a mam na, a kramamhi na, a ngwoz na, a wudahi na, a gèɗ kokwar Bi Zhiklè,

³⁰ man a ngècè skwi kumba a deɓa azɓai, tʼherkeda antanta, te deɓaʼa a pats man a di a shkè, nshèffè a mèdèp.

Yèsu a hodko mʼmetsi nengaʼa mamakaraʼa

³¹ Te deɓaʼa a nhel ta 12 a sam na, a ngaɗa ta: Na haha, nga dè a kokwar Jérusalem, a skwi tèlèba man ndohi nhadka ma ta Windo a géɗ kra-ndo, a da gai.

³² Aman ta da va na a ri a ndohi herkeda, ta da ngwossaha kiɗè-kiɗèʼa, a ta dirɗèʼa, a ta jfa na slèslèɓ a dai;

³³ ta ndèhaʼa a mènèwèɗ, te deɓaʼa ta da keɗaʼa. Aman a pats mamakaraʼa a da slambaɗkaɗauda te mʼmetsai.

³⁴ A golahi nengaʼa ta tsena ma haha ɓai. Ma haha nʼngheda a sam ta, a ta tsena ngèɗè nengaʼa ɓai.

Yèsu a mbel mandazlai a ma kokwar Jéricho

³⁵ Te deɓ nasa, Yèsu a mdo a kokwar Jéricho. A ndo mandazlai ngiɗè a nʼnza a civèɗ, aman a jhèdè skwai.

³⁶ Aman a tsena ndohi rèdèdèa, man ta beza a pa, a ndzhoɗo: Mbeza a haha wa?

³⁷ A ta gaɗa na: Yèsu, ndo Nazareth a bizhè a pa.

³⁸ A nengaʼa a ngaɗa: Yèsu, kra David, i da se ka te va!

³⁹ A ndohi ngiɗè ta ga na ndzoan, aman a nzi tètè. Aman nengaʼa a mboho a wuɗi holholaʼa: Kra David, i da se ka te va!

⁴⁰ A Yèsu a nzlatsa a pa, a ngoɗa, aman ta ckoɗa a sam na. Aman a herda na va,

⁴¹ a ndzhoɗo: Ka woya man a i ga ka mè? Bai, i woya man i ngècè di ga, a i rkaʼa.

⁴² A Yèsu a ngaɗa na: Di ngaya da rka! Aman ncè-a-ndav ngaya a mbel ka ma!

⁴³ A nasa nasa a nʼngots di na, a rka dai, a ndzodzor Yèsu, a nslubordo Zhiklè. A ndohi tèlèba man ta rkaʼa, ta shida na gèɗ a Zhiklè.