Lèv. 7 - Ma Zhiklè

¹ Nta ma nkwèrè a géɗ skwi man ta vi a skwi mpil gèɗ. Nasa skwi nkezli nkezlaʼa.

² A sam man ta zlèh skwi man ta ndara na Zhiklè, ta zlèha skwi man ta vi a skwi mpil gèɗ ba, a ta guceda Pombaz nengaʼa a zlazlar sam mvi skwi a Zhiklè tèlèba.

³ Mbezaʼa tèlèba sèi ta viaʼa: mbeza hutor a mbeza te slrats vayats,

⁴ a kwa deɓa cèw, a mbeza a pa, a mbeza te verzi menad, man ta zli auda a nda kwa deɓa.

⁵ Ndo mvi skwi a Zhiklè da fa na vogwa tèlèba a sam mvi skwi a Zhiklè, a va na Zhiklè te vogwa. Nasa skwi man a vi a skwi mpil gèɗ.

⁶ Te verzi ndohi mvi skwi a Zhiklè, ngurhi tèlèba, ta ndiaʼa. Da ndau a sam nkezlaʼa. Nasa skwi nkezli nkezlaʼa.

⁷ Ma nkwèrè a géɗ skwi man ta via a skwi mpil gèɗ, lèmèlèmè ara skwi man ta via a géɗ malai. Ndo mvi skwi a Zhiklè man a nʼngatsa ta skwi mpil gèɗ a ndohai, nengaʼa a ndiaʼa.

⁸ Ndo mvi skwi a Zhiklè man a ndara na skwi ndo ngiɗè a Zhiklè, bkwi skwi man a ndara na, a nengaʼa.

⁹ Movar tèlèba man ta tau te kizlèd, tèlèba man ta tau te shidèf, tèlèba man ta tau a géɗ tèndèlèk, ndo mvi skwi a Zhiklè man a va na skwi sa a Zhiklè, a ndiaʼa.

¹⁰ Aman movar tèlèba man ta bsoma a mbar, man bai gufa ambalai, wudahi Aaron tèlèba ta ngècèʼa, cèw ba.

¹¹ Nta ma nkwèrè a géɗ skwi man ta va na Zhiklè te pombai:

¹² Ndo man a woya a shid gèɗ, da vau skwi man a via te nshid gèɗ: mɓelaslasla man skwi nshégèrè a te di bai, mbsomaʼa a mbar, skwi ngiɗè ara dafɗia, a mbar a deɓaʼa, a gufa mbsomaʼa, a mbar a vaʼa.

¹³ Da vau skwi man a va na Zhiklè a va mɓelaslasla man skwi nshégerè te dai, a va skwi man a zloho, man a va na Zhiklè te nshid gèɗ.

¹⁴ Te va skwi tèlèba man a va na Ndo nzi pèc pè-cèk, da ckoɗauda staɗ staɗ. Nasa a ndo mvi skwi a Zhiklè man a guceda Pombaz skwi man a vau te pombai.

¹⁵ Zluèɗ skwi man a va na Zhiklè te pombai a nshid gèɗ, sèi ta ndi a pats man ta va na langa. A prèk a woy njèkèdia azbai.

¹⁶ Aman a vi skwi na a géɗ man a gadda ma a hai, man bai a géɗ man a hur te ndav na, da ndau tèlèba a pats sa, man ta zli skwai. Aman ha nʼndikèma a prèk njèkèdia a zhè, te mangoslèmaʼa ta ndia genè.

¹⁷ Aman a pats mamakaraʼa, sèi ta fa na vogwa a njèkèdi zluèɗ.

¹⁸ Aman te mʼmèn mamakaraʼa ta ndi zluèɗ skwi man ta va na Zhiklè te pombai, ambaha Zhiklè bai. Zhiklè a cè azbai, ndo man a ndau, a ndara na Zhiklè. Ndo man a ndia genè, mali a gèɗ na.

¹⁹ Ko zluèɗ man ta humda a skwi nlizhèa, ta slaha ta ndi azbai, sèi ta fa na vogwa. Ko wawa man ndav na nlizhèɓai, a slaha a nʼndi zluèɗ.

²⁰ Aman ndo man a ndi zluèɗ skwi man ta va na Zhiklè te pombai, a ndav nlizhèa, sèi da zedkoɗauda te va gwoli na.

²¹ A ndo man a lama na skwi nlizhèa, ko ndo man skwi a nlizhèa a va na ko skwi kudom nlizhèa, ko skwi nda a hwaɗ nlizhèa, a ndi zluèɗ man ta va na Zhiklè te pombai, sèi da zedkoɗauda te va gwoli na.

²² Ndo nzi pèc pècèk a ngaɗa na Moise:

²³ Gada ta ndohi Israel aranta: Mbeza zlè a tambak a ɓok kin ndau bai!

²⁴ Mbeza skwi nhuslaʼa, a skwi man skwi dak a nkeɗaʼa, kin slaha kin gi skwi ngiɗè tsaɗ tsaɗ a vna, aman kin ndu ɓai!

²⁵ Ndo man a ndi mbeza skwi kudom man ta va na Ndo nzi pèc pècèk te vogwa, sèi da zedkoɗi ndo nʼndau auda te va gwoli na.

²⁶ Ko Pombaz ba kin ndu bai! Ko Pombaz skwi kudom, a sam tèlèba man kin nzi a pa.

²⁷ Ko wawa man a ndi pomaz, sèi ta zedkoɗauda te va gwoli na.

²⁸ Ndo nzi pèc pècèk a ngaɗa na Moise:

²⁹ Gada ta ndohi Israel aranta: Ndo man a va na skwi a Ndo nzi pèc pècèk te pombai, da va na di man a Ndo nzi pèc pècèk.

³⁰ Da va na a ri na, di man a Ndo nzi pèc pècèk man a via te vogwa: mbeza a ndavaʼa. Ndavaʼa da geda na gèɗ a sam Ndo nzi pèc pècèk.

³¹ Mbeza, ndo mvi skwi a Zhiklè da fa na vogwa a sam mvi skwi a Zhiklè. Ndavaʼa, a Aaron a wudahi nengaʼa.

³² Ɗuar nte civèɗ ri mandi ba, sèi kin ckoɗauda te va skwi man kin va na Zhiklè te pombai, a kin va na ndo mvi skwi a Zhiklè.

³³ Te va wudahi Aaron, nengaʼa man a vi Pombaz skwi te pombai, a mbezaʼa, da ngots ɗuar nte civèɗ ri mandai.

³⁴ Aman ndavaʼa, man ta geda na gèɗ a sam Ndo nzi pèc pècèk, a ɗuar man ta ckoɗauda, i helama ta ndohi Israel a sam skwi man ta va na Zhiklè te pombai; i va na Aaron a wudahi nengaʼa. Nasa skwi man i jhèɗè teri ndohi Israel a mèdèp.

³⁵ Nasa skwi man Aaron a wudahi nengaʼa ta ngècè te va skwi man ndohi ta va na Zhiklè te vogwa, man ta ngots a pats man ta pe ta a mizlinè mvi skwi a Zhiklè.

³⁶ Nasa skwi man Ndo nzi pèc pècèk a mva ta a pats man a bada ta mbar a gèɗ, a skwi man ta ngècè te ri ndohi Israel a mèdèp, te verzi wud wud ta a ma ma.

³⁷ Nasa ma nkwèrè a géɗ skwi man ta ndara na Zhiklè, movar man ta va na Zhiklè, skwi man ta vi a géɗ malai, skwi man ta vi a skwi mpil gèɗ, skwi man ta vi a pats man ta pe ta a mizlinè, a skwi man ta vi te pombai,

³⁸ man Ndo nzi pèc pècèk a njè na a gèɗ a Moise a gèɗ za Sinai, a pats man a ndzhaɗ ta ndohi Israel, aman ta va na skwai, tʼhèshèkèd Sinai.