Lèv. 27 - Ma Zhiklè

Mvi skwi a mizlinè Zhiklè

¹ A Ndo nzi pèc pècèk a ngaɗa na Moise:

² Gada ta ndohi Israel aranta: Aman ndo ngiɗè a ngaɗda ma a hai, a vu va na a ri a Zhiklè, ka livèʼa:

³ nguraʼa te ndev mvi 20 a 60, Suli gurso 50, ara skwi nlivè nkezlaʼa.

⁴ Aman ngwoz, ka livèʼa: Suli gurso 30.

⁵ Aman ndo nte ndev mvi 5 a 20; man kra nguraʼa, Suli gurso 20, man demaʼa Suli gurso 10.

⁶ Aman kra nguraʼa staɗ staɗ tèlèba a ndè a mvi zlam, ka livèʼa: Suli gurso 5, man demaʼa Suli gurso 3.

⁷ Aman nguraʼa, mvi 60 a ndè a ma ma, gurso 15, man ngwoz, gurso 10.

⁸ Aman ndo ntawassaʼa a slaha a mpilè azbai, ara man ka livèʼa, da Zlatseda a sam ndo mvi skwi a Zhiklè, a ndo mvi skwi a Zhiklè da livèʼa. Da livèʼa ara skwi man ndo ngaɗda ma a hai a slaha.

⁹ Aman ta va na skwi kudom a Ndo nzi pèc pècèk, skwi staɗ staɗ tèlèba man ta va na, ta va na a sam nkezlaʼa.

¹⁰ Da humbaɗa ɓai, da vau ngiɗè te dia ɓai – man amba te di man ambaɓai, man ambaɓai te di man amba. Ndo man a humbèɗè genè, cèw ba skwi nkezlaʼa.

¹¹ Aman skwi nlizhèa, man ta slaha ta va na Ndo nzi pèc pècèk azbai, sèi da Zlatseda a sam ndo mvi skwi a Zhiklè,

¹² a ndo mvi skwi a Zhiklè a da ɗèlèʼa: amba ɗè, ɗè ambaɓi ɗè? A da gi ara man ndo mvi skwi a Zhiklè a da ɗèlèʼa.

¹³ Aman a woya a mprè auda, da pau skwi staɗ a verzi skwi zlam.

¹⁴ Ndo man a vi gi na a Ndo nzi pèc pècèk a skwi nkezlaʼa, ndo mvi skwi a Zhiklè da dèlèʼa: amba dè, dè ambaɓi dè? A da gi ara man ndo mvi skwi a Zhiklè a ɗèlèʼa.

¹⁵ Aman ndo man a woya a ngècè gi man a mvau a deɓa, da vau skwi staɗ a verzi skwi zlam. Te deɓaʼa a gi a skwi na zaʼa.

¹⁶ Aman ndo ngiɗè a woya a va na dak nʼndi gi na a Ndo nzi pèc pècèk, sèi ka livèʼa ara dau man ta zleki a pa, bho dau 1 te di Suli gurso 50.

¹⁷ Aman a vi dak na te mvi mwuffè – ara man ka livèʼa.

¹⁸ Aman a vi dak na te deb mvi mwuffè, ndo mvi skwi a Zhiklè da nger mvi man a ma dai, da helaha a sam skwi man a livèʼa.

¹⁹ Ndo man a vau dak na, a woya a ngècè skwi na a deɓa, da vau skwi staɗ a verzi skwi zlam man ta livèʼa.

²⁰ Aman a ngècè dak a deɓa azbai, da preda ma a sam ndo ngiɗè, a slaha a ncè skwi na a deɓa asaɓai.

²¹ Aman te mvi mwuffè dak mpraʼa, a gi a skwi Ndo nzi pèc pècèk nkezlaʼa, ara dak man ta va na a mèdèp. A gi a skwi ndo mvi skwi a Zhiklè.

²² Aman ndo ngiɗè a va na dak a Ndo nzi pèc pècèk, man a suma te ri ndo ngiɗè, man dak nʼndi gi na ka bai,

²³ ndo mvi skwi a Zhiklè da nger mvi man a ma, ha ndè a sam mvi mwuffè dai, a ndo sa da pau Suli a pats nasa, ara skwi nkezlaʼa man a va na Ndo nzi pèc pècèk.

²⁴ Mvi mwuffè, ndo man a sum dak te ri nengaʼa, a ngècè dak a deɓa, ndo man dak nʼndi gi nengaʼa.

²⁵ Skwi man ta livèʼa tèlèba, ara skwi nlivè nkezlaʼa: gurso staɗ a gi guéras 20.

²⁶ Ndo a slaha a vi tsuvom skwi azbai. Tsuvom skwi a Ndo nzi pèc pècèk ma, ko zlè, ko tambak.

²⁷ Aman skwi gi nlizhèa, sèi ta ngècè a deɓa, te di Suli man ta livèʼa, a ta pi skwi staɗ a verzi skwi zlam. Aman a woya a prè auda azbai, sèi ta predama te di Suli man ta livèʼa.

²⁸ Skwi man ndo a va na Ndo nzi pèc pècèk a skwi nkezlaʼa, te va skwi tèlèba man a ngotso, ko ndo, ko skwi gai, ko dak, skwi nʼndi gi na, ta slaha ta predama bai, ta slaha ta cè a deɓa azbai. Skwi nkezli nkezlaʼa, a Ndo nzi pèc pècèk.

²⁹ Aman ndo ngiɗè, ndo nkezlaʼa a sam Ndo nzi pèc pècèk, ta slaha ta cè a deɓa azbai, sèi ta keɗaʼa.

³⁰ Skwi staɗ te va skwi kula tèlèba te kokwar, gi dau, nyi wof, a Ndo nzi pèc pècèk, skwi nkezlaʼa a sam Ndo nzi pèc pècèk.

³¹ Ndo man a woya a ngècè skwi nengaʼa a deɓa, ko zlè, ko tambak, skwi staɗ te va skwi kula tèlèba, a vi skwi staɗ a vaʼa a verzi skwi zlam.

³² Skwi man ta ngrèʼa, staɗ te va kula tèlèba, a Ndo nzi pèc pècèk.

³³ Ta wèrè azbai, gar amba gar ambaɓai, ta humbèɗè azbai. Ndo man a humbèɗè genè, cèw cèw ba skwi nkezlaʼa, a ta slaha ta cè a deɓa azbai.

³⁴ Nasa ma nkwèr man Ndo nzi pèc pècèk a va na Moise a gèɗ za Sinai a géɗ ndohi Israel.