Lèv. 24 - Ma Zhiklè

Vogwa man a mbècè azɓai

¹ Ndo nzi pèc pècèk a ngaɗa na Moise:

² Gaɗa ta ndohi Israel, a ta va ka gèɗ mbar ngalawaʼa man ta tau, a ka fa na vogwa a sam skwi nfi vogwa, a vogwa a pa a mbècè azɓai.

³ Aaron da tülo, a ma maslaka, man a zhè a ma koti kita, te gi mɓicè-va. Vogwa da zhè pèc pècèk a sam Ndo nzi pèc pècèk, daga dakwaɗ, ha prèk, daga prèk ha dakwaɗ.

⁴ Da tül vogwa a sam skwi nfi vogwa guro ndaɓalaʼa, aman vogwa a mbècè azɓai.

Movar nkezlaʼa

⁵ Te deɓaʼa co gufa ndernènèʼa, a ka tu movar 12, staɗ staɗ tèlèba a gufa agoda cèw.

⁶ A ka ɗaheda table guro, asam Ndo nzi pèc pècèk, te tsagi ngiɗè, te tsagi ngiɗè.

⁷ Cèw ba, pa na burdi a vaʼa, da gu a skwi man ambaha Ndo nzi pèc pècèk, movar man kin va na.

⁸ Pèc pècèk a pats nshèk va, da tül arsa a sam Ndo nzi pèc pècèk. Nasa ma kita nderzlè-ma ndohi Israel a mèdèp.

⁹ A Aaron a wudahi nengaʼa ta ngècèʼa, a ta ndiaʼa a sam nkezlaʼa. Nengaʼa a ngècèʼa te va skwi man ta va na Ndo nzi pèc pècèk, a skwi nkezli nkezlaʼa. Sèi nengaʼa a ngècèʼa a mèdèp.

¹⁰ A pats ngiɗè, kra ngwoz Israel, bab na ndo Egypte, a mdo a va ndohi Israel, a ta bozl va te kokwar, kra ngwoz Israel a ndo Israel ngiɗè.

¹¹ A kra ngwoz Israel a nlüv nzlembaɗ Ndo nzi pèc pècèk, a ndurɗo. A ta feda na ma a sam Moise. Nzlembaɗ mam na Shelomith, dem Dibri, te verzi Dan.

¹² A ta feda a dangai, ha Ndo nzi pèc pècèk a gada ta ma nengaʼa.

¹³ A Ndo nzi pèc pècèk a ngaɗa na Moise:

¹⁴ Ndo nlivyè kin da auda a dal kokwar, ta tèlèba man ta tsenaʼa, da ngeda ri a gèɗ nengaʼa. A mpi ndohi tèlèba sèi ta kèlè a kwa.

¹⁵ A ka gaɗa ta ndohi Israel: Ko wawa man a livè Zhiklè na, a fi mali a géɗ na.

¹⁶ A ndo man a dérdè nzlembaɗ Ndo nzi pèc pècèk, sèi ta keɗaʼa. Mpi ndohi sèi ta kèlè a kwa. Ko mbrok, ko ndo Israel, man a ndurɗo nzlembaɗ Ndo nzi pèc pècèk, sèi ta keɗaʼa.

¹⁷ Aman ndo ngiɗè a keɗa ndo ngiɗè, sèi ta keɗaʼa lèmèlèmè.

¹⁸ Aman ndo man a keɗa skwi ndo ngiɗè, da menda na skwi na a deɓa, da pul nshèffè a nshèffè.

¹⁹ Ndo man a ga na mblè a va ndo ngiɗè, sèi ta ga na lèmèlèmè.

²⁰ Ta pela sak mpasla a sak mpasla, dai a dai, zlèʼèn a zlèʼèn. Skwi man a ga na ndo ngiɗè, sèi ta ga na lèmèlèmè.

²¹ Ndo man a keɗa skwi ndo ngiɗè, da menda na skwi na a deɓa; aman ndo man a keɗa ndo, sèi ta keɗaʼa lèmèlèmè.

²² Ma kita kinè lèmèlèmè, ko mbrok, ko ndo Israel. Iyè Ndo nzi pèc pècèk, Zhiklè kinè.

²³ A Moise a ngaɗa ta ndohi Israel, a ta da ndo nlivè Zhiklè auda a dal kokwar, a ta kolo a kwa. Aranta ndohi Israel ta gu ara man Ndo nzi pèc pècèk a gada na Moise.