Lèv. 13 - Ma Zhiklè

Ma kita a gèɗ skwi man a lizhè ndo

¹ A Ndo nzi pèc pècèk a ngaɗa na Moise a Aaron aranta:

² Aman a sam ndo ngiɗè hutèɗ va a hezi na, aman asam ngiɗè a gu ara nduvohom, man bai a gu ara lamlam, te deɓaʼa samaʼa a ngwèdè a hutsoɗ, sèi ta da a sam Aaron, ndo mvi skwi a Zhiklè, man bai a sam staɗ te va wudahi nengaʼa, ndohi mvi skwi a Zhiklè.

³ Aman ndo mvi skwi a Zhiklè da war samaʼa. Aman gwots a sam man skwa a dza na nslekaɗaʼa, a sam ntkwozlaʼa, nasa hutsoɗ. Aman ndo mvi skwi a Zhiklè a rkaʼa, da ngreda ndoʼa nlizhèa.

⁴ Aman sam hutèɗ nslekaɗa, aman sam ntkwozl bai, gwots a samaʼa nslekaɗ bai, ndo mvi skwi a Zhiklè da feda ndo sa a géɗ na, mʼmèn tsaraɗ.

⁵ Aman ndo mvi skwi a Zhiklè a da wèrèʼa a pats matsaraɗaʼa, sam a nʼngwoda va bai, ndo mvi skwi a Zhiklè da feda a géɗ na mʼmèn tsaraɗ zaʼa.

⁶ Aman a pats matsaraɗaʼa ndo mvi skwi a Zhiklè da wora saʼa. Aman a rka, sam a shüɗé, a zlèzlèmè a ma ma asaɓai, ndo mvi skwi a Zhiklè a da ngredè ndoʼa nlizhɓai. Nasa skwi ngiɗè ambalai ara nduvohom. Aman nengaʼa da pana maslaka na, te deɓaʼa mpana zaʼa.

⁷ Aman skwi a zlèzlèmè a ma ma, te deɓ man a ngra na va a ndo mvi skwi a Zhiklè nshèlèkuraʼa, a nza ara ndo nlizhɓiaʼa, a ngra na va a ndo mvi skwi a Zhiklè sak macècèwaʼa,

⁸ a ndo mvi skwi a Zhiklè a rkaʼa, skwi a zlèzlèmè a ma ma a va nengaʼa, ndo mvi skwi a Zhiklè da ngreda ndoʼa nlizhèa — nasa hutsoɗ.

⁹ Aman hutsoɗ a tsi gèɗ auda a va ndo ngiɗè, sèi ta da ndo sa a sam ndo mvi skwi a Zhiklè.

¹⁰ Aman ndo mvi skwi a Zhiklè a rkaʼa, hutèɗ a nhezl na, gwots nslekaɗaʼa, sam man a huzlokoɗai a yidahai,

¹¹ hutsoɗ a nga na gi a va ma. Ndo mvi skwi a Zhiklè da ngreda ndoʼa nlizhèa, da feda a géɗ na. Nengaʼa nlizhèa ma.

¹² Aman hutsoɗ a tsi gèɗ auda te va tèlèba, a hinè te gèɗ, ha ndè a sak, a ndo mvi skwi a Zhiklè a rkaʼa, hutsoɗ a va nengaʼa tèlèba,

¹³ a rkaʼa, va tèlèba nslekaɗaʼa, da ngreda ndo matakwan sa, ndoʼa nlizhɓai.

¹⁴ Aman hutsoɗ a yidahai, va nengaʼa nlizhèa.

¹⁵ Aman ndo mvi skwi a Zhiklè a rkaʼa, nyiè man a va na, da ngreda ndoʼa nlizhèʼa. Nyiè man a va na a lizhèʼa, nasa hutsoɗ.

¹⁶ Aman nyiè man a va na a men na a pa, a madz na zaʼa, da shkè a sam ndo mvi skwi a Zhiklè.

¹⁷ Aman ndo mvi skwi a Zhiklè a rkaʼa, samaʼa mʼmadza zaʼa, ndo mvi skwi a Zhiklè da ngreda ndo matakwan sa, ndo nlizhɓia zaʼa – nengaʼa nlizhɓai.

¹⁸ Aman mblè a nkalka na a va ndo ngiɗè, a pkwè na zaʼa,

¹⁹ aman a sam man mblè a va, skwi a hezla na kuftorhaʼa, man bai skwi ngiɗè ara lamlam, da ngra na va na a ndo mvi skwi a Zhiklè.

²⁰ Aman ndo mvi skwi a Zhiklè a rkaʼa, sam ntkwozla, gwots a samaʼa nslekaɗa, ndo mvi skwi a Zhiklè da ngreda ndoʼa nlizhèa. Nasa hutsoɗ man a tsoko gèɗ auda a sam vovi mblè.

²¹ Aman ndo mvi skwi a Zhiklè a rkaʼa, gwots nslekaɗ bai, sam ntkwozl ɓai, a minè a pa, ndo mvi skwi a Zhiklè da feda ndo sa a gèɗ na mʼmèn tsaraɗ.

²² Aman a zlèzlèmè a ma ma a sam hutèɗ, ndo mvi skwi a Zhiklè da ngreda ndoʼa nlizhèa – nasa hutsoɗ.

²³ Aman samaʼa a ngwèdè va azbai, a zlèzlèmè a ma ma azbai, nasa vovi mblè, a ndo mvi skwi a Zhiklè da ngreda ndoʼa nlizhɓai.

²⁴ Man ndo ngiɗè, vogwa a nʼndoro, ta a tütüzh, sam nduzoa, tsagi kuftorhoʼa,

²⁵ a ndo mvi skwi a Zhiklè a nʼngotso, gwots a samaʼa nslekaɗaʼa, sam ntkwozla, nasa hutsoɗ man a tsoko gèɗ auda a sam man vogwa a ndoro, a ndo mvi skwi a Zhiklè da ngreda ndo sa, ndo nlizhèa – nasa hutsoɗ.

²⁶ Aman ndo mvi skwi a Zhiklè a nʼngotso, gwots a samaʼa nslekaɗ bai, sam ntkwozl bai, a minè a pa, a da feda ndo sa a gèɗ na mʼmèn tsaraɗ.

²⁷ A pats matsaraɗaʼa, ndo mvi skwi a Zhiklè a wèrèʼa. Aman a zlèzlèmè a ma ma a sam hutèɗ, ndo mvi skwi a Zhiklè da ngreda ndoʼa nlizhèa – nasa hutsoɗ.

²⁸ Aman sam kuftorhoʼa a nʼnza, a zlèzlèmè a ma ma azbai, a mʼmin na a pa, nasa vovi mblè vogwa. A ndo mvi skwi a Zhiklè da ngreda ndoʼa nlizhɓai — nasa vovi mblè vogwa.

²⁹ Aman a sam nguraʼa ngiɗè, a sam ngwoz ngiɗè, skwi a nʼndama na gèɗ, man bai a nʼndama na bozozom,

³⁰ a ndo mvi skwi a Zhiklè a rkaʼa, a ntkwozla, gwots ara kokuri kra, ngwèfngwèfèʼa, nasa skwi ngiɗè ara hutsoɗ, man a gédè-shè ndo, hutsoɗ a ndi gèɗ, hutsoɗ a ndi bozozom.

³¹ Aman ndo mvi skwi a Zhiklè a rka hutsoɗ, a nʼngotso, sam a ntkwozl bai, aman gwots mʼmadza ba a te pa bai, ndo mvi skwi a Zhiklè da feda ndo man skwi a ndi gèɗ na, a géɗ na mʼmèn tsaraɗ.

³² A pats matsaraɗaʼa ndo mvi skwi a Zhiklè da war samaʼa. Aman a zlèzlèmè a ma ma azbai, gwots ara kokuri kra az a pa bai, sam ntkwozl bai,

³³ ndo sa da sha gèɗ na. Aman sam man skwa a ndau, da sha bai. Te deɓaʼa ndo mvi skwi a Zhiklè da feda ndo man skwa a nʼndu gèɗ na a gèɗ na zaʼa, mʼmèn tsaraɗ.

³⁴ Aman a pats matsaraɗaʼa ndo mvi skwi a Zhiklè a rka samaʼa, a zlèzlèmè a ma ma azbai, ntkwozl bai, ndo mvi skwi a Zhiklè da ngreda ndoʼa nlizhɓai. Aman nengaʼa sèi a pènè maslaka na, te deɓaʼa mpanaʼa.

³⁵ Aman sam a zlèzlèmè a ma ma, te deb man ta ngreda ndo sa a ndo nlizhɓiaʼa,

³⁶ a ndo mvi skwi a Zhiklè a rkaʼa, sam a zlèzlèmè a ma ma, ndo mvi skwi a Zhiklè a hèsh gwots ara kokuri kra asaɗai. Nengaʼa nlizhèa.

³⁷ Aman a nʼngotso, sam a zlèzlèmè a ma ma azbai, gwots a samaʼa mʼmadza, samaʼa ntila ma; ndoʼa nlizhɓai, ndo mvi skwi a Zhiklè da ngreda nlizhèbai.

³⁸ Aman ndo ngiɗè, man bai ngwoz ngiɗè, a nʼngots sam nslekaɗaʼa a va na, ndo mvi skwi a Zhiklè da wora.

³⁹ Aman samaʼa a va na nslekaɗa kètè genè, nasa skwi man a yokoɗauda genè a sam hutèɗ; ndoʼa nlizhɓai.

⁴⁰ Aman ndo ngiɗè, gwots gèɗ nengaʼa a wush na, deb dengi nʼndaʼa, ndoʼa nlizhɓai.

⁴¹ Aman gwots gèɗ a wush na, ndev gèɗ nʼndaʼa, ndoʼa nlizhɓai.

⁴² Aman sam a deb dengi, a ndev gèɗ, a ndi a nteva, nasa skwi ngiɗè ara hutsoɗ man a tsoko gèɗ auda te deb dengai, te ndev gèɗ.

⁴³ Aman ndo mvi skwi a Zhiklè a rkaʼa, sam a deb dengai a ndev gèɗ a ndi a nteva, lèmèlèmè are hutsoɗ a sam hutèɗ va,

⁴⁴ nasa ndo hutsoɗ. Nengaʼa nlizhèa. Ndo mvi skwi a Zhiklè da ngreda ndoʼa nlizhèa. Hutsoɗ a ndi gèɗ.

⁴⁵ Ndo hutsoɗ man hutsoɗ a va, da feda maslaka nkuratsa a va, da sha gèɗ na, da paɗama na ma, a bozozom tèlèba, da boho: Nlizhèa, nlizhèa!

⁴⁶ Te matakwan nengaʼa tèlèba, nlizhèa. Ndo nlizhèa da nza a géɗ na, sam nʼnzi na a dal kokwar.

⁴⁷ Aman skwi ngiɗè ara hutsoɗ a lizhè maslaka ngiɗè, maslaka gwots tambak, man bai gogumai,

⁴⁸ ko ntsentsai, ko bata, ko gwots tambak, ko hutèɗ, ko gozhèm hutèɗ,

⁴⁹ sam maslaka man bai hutèɗ, man bai gozhèm hutèɗ, zlebhzlebhaʼa, nduzoa, nasa skwi ngiɗè ara hutsoɗ, sèi ta ngra na a ndo mvi skwi a Zhiklè.

⁵⁰ Aman ndo mvi skwi a Zhiklè a rka samaʼa, da pizlèda maslaka ngedassaʼa a koti mʼmèn tsaraɗ.

⁵¹ Aman a pats matsaraɗaʼa a rkaʼa, sam a va maslaka ntsentsai, a bata, a hutèɗ, a lizhè a ma ma, skwi ngedassaʼa ara hutsoɗ man ambaɓai – nlizhèa.

⁵² Sèi ta fa na vogwa a maslaka matsa, ko maslaka gwots tambak, ko maslaka gogumai, ko skwi hutèɗ, man skwi ngedassaʼa a zhè a pa. Aman skwi sa hutsoɗ man ambaɓai, sèi ta fa na vogwa.

⁵³ Aman ndo mvi skwi a Zhiklè a rkaʼa, skwi ngedassaʼa a sam maslaka ntsentsai, a bata maslaka, ko gwots tambak, ko gogumai, ko hutèɗ, a ngedassa a ma ma bai,

⁵⁴ ndo mvi skwi a Zhiklè da va ta civèɗ aman ta pènèʼa azbai, da pizlèda koti mʼmèn tsaraɗ a vaʼa.

⁵⁵ Aman te deɓaʼa ndo mvi skwi a Zhiklè a rkaʼa, a mpana sam ngedassaʼa, a ngwèdè azbai, ko sam ngedassaʼa, a zlèzlèmè a ma ma azbai, skwi nlizhèa. Sèi ka fa na vogwa. Vogwa da ndara samaʼa, ko hwaɗaʼa, ko a deɓaʼa.

⁵⁶ Aman ndo mvi skwi a Zhiklè a rkaʼa, te deb man a mpana samaʼa, sam ngedassaʼa te ndevaʼa, nderɗa a helaha va na auda, da zla na samaʼa auda, ko maslaka, ko hutèɗ, ko ntsentsai, ko bata.

⁵⁷ Aman a tsoko gèɗ auda zaʼa a sam maslaka, ko ntsentsai, ko bata maslaka, ko hutèɗ, sèi ka fa na vogwa a skwi tèlèba man a ngedas na.

⁵⁸ Aman ka pèn maslaka ntsentsai, man bata maslaka, man skwi hutèɗ ngedassaʼa, a ndev na auda a pa, sèi ka pènè zaʼa, da ga a skwi nlizhɓiaʼa.

⁵⁹ Nasa ma nkwèrè a géɗ hutsoɗ a va maslaka, ko gwots tambak, ko gogumai, ko maslaka ntsentsai, ko bata maslaka, ko skwi hutèɗ, ara man ta ngreda a skwi nlizhɓiaʼa, man bai a skwi nlizhèa.