Lamentations de Jérémie 5 - Ma Zhiklè

Ntsi rai

¹ Ndo nzi pèc pècèk, hur skwi man a ga nga, rka hori nga!

² Ndohi man verzi ta tsaɗ ta ngots skwi nʼndi gi nga. Ndohi kokwar ngiɗè ta ndau gi nga.

³ Nga ndaʼa a wud dikai, bab nga azɓai, mamhi nga ta nda a ngwozi mazai.

⁴ Iyam man nga siaʼa nga sum nshumè, nga ngècè shègwa sèi a sulai.

⁵ Ndohi mparaha nga ta te deɓ nga, nga ngeza, nshèk va nga azɓai.

⁶ Nga kalahi a deɓ sak ndohi Egypte a ndohi Assyrie, aman nga da ngècè skwi nʼndai, a nga ngézhè hwaɗ a vna.

⁷ Babhi nga ta gau malai, tengaʼà man ani tʼasaɓai. A nga, mali tengaʼa a gèɗ nga.

⁸ Ɓèlèlihi ta gi bi a gèɗ nga, ndo ngezlka nga auda te ri tengaʼa azɓai.

⁹ Nshèffè nga a zi na a verzi skwi nʼndi man nga hèshèʼa, te ri zlau tsakwal tʼhè-shèkèɗ.

¹⁰ Vogwa a va nga worworaʼa, a gèɗ mi man a keɗ nga.

¹¹ Ta par ta ngwozi a wuɗai te Sion, a ta sussora dalahi te kokwar Juda.

¹² Ta ktsalda wud bihi ta a wof, ta slubordo ndohi nhalaʼa ɓai.

¹³ Golahi ta shidè, a wud ngurhi shègwa a bazl ta a gèɗ.

¹⁴ Babgihai ta cèmma a ntamagi kokwar asaɓai. Golahi ta tsi ganzavar asaɓai.

¹⁵ Mwuffè klèng te ndav nga, ngècè nga a nʼngwoda na a kuɗa.

¹⁶ Mpèdè gèɗ nga nkal na hai. Woba nga a gèɗ man nga gu malai!

¹⁷ Ndav a dza nga a géɗ nengaʼa, di nga téɗéɗikɗikaʼa a géɗ nengaʼa,

¹⁸ a géɗ man za Sion a nʼnde na hèshèkèɗ, barkdadihai ta shèwèlè te pa.

¹⁹ Ka Ndo nzi pèc pècèk, ka nzi a géɗ sam nʼnzi bai a mèdèp. Sam nʼnzi bi ngaya a nzi a ma ma a ndè a verzi wud wuda.

²⁰ Ka woya aman nga pca ka a gèɗ a mèdèp, a ka kwol nga nʼnzi a zhè èhèmè?

²¹ Ndo nzi pèc pècèk, hel nga a deɓa a sam ngaya, a nga menkada deɓa. Va-nga nshèffè mɓuaʼa ara zlèzlèʼa.

²² Ɗè, ka kwol nga a mèdèp mèn ɗè? Ɗè ka gi ndav kumba ar haha a géɗ nga dè?