Juges 21 - Ma Zhiklè

Ngwozi ndohi Benjamin

¹ Ga ta dè var, ndohi Israel ta mbaɗa te Mitspa, ta Gad: Te va nga, ko staɗ da va na dem na a ngwoz a ndo Benjamin asaɓai.

² A ndohi ta shkè Béthel, a ta zlatsa a sam Bi Zhiklè, ha dakwa, a ta kuɗai a ta gi wobau.

³ Ta Gad: Ndo nzi pèc pècèk, Zhiklè Israel, skwi haha a gu èhèmè? A patsna verzi ndohi Israel staɗ a ndev na.

⁴ Te mangoslèmaʼa ndohi ta slambaɗa a prèk te gai, ta rom sam mvi skwi a Zhiklè, a ta ndara na skwi a Zhiklè a nshid gèɗ.

⁵ Te deɓaʼa ndohi Israel ta Gad: A sam mpi ndohi Israel, mshkè a sam Ndo nzi pèc pècèk, a sam mɓicè-va ɓi wa? Te nshèlèkuraʼa ta goɗ a mʼmbèdè: Ndo man a dè a sam Ndo nzi pèc pècèk a Mitspa azɓai, sèi ta keɗaʼa.

⁶ Ndohi Israel ta lèyè ndohi Benjamin, kramam ta, a ta Gad: A patsna verzi Israel ngiɗè a zaha va na auda te va nga.

⁷ A sam njèkèdia man ta zhè a nshèffè nga da gi maya kè, a ta da ngècè ngwoz tema? Nga mbaɗa a sam Ndo nzi pèc pècèk, nga va ta dalahi nga asaɓai.

⁸ A ta Gad: Ndo man a mɓica va ɓi te va ndohi Israel a sam Ndo nzi pèc pècèk, a zhi dè? Te va ndohi Jabès te Galaad, ndo a nda a sam mɓica va ɓai.

⁹ Ta ngra ta ndohai, a ta ngotso, ndohi Jabès te Galaad, ta azɓai.

¹⁰ A mpi ndohai ta zlinde ta ndohi var 12.000, a ta fa ta ma a gèɗ, a ta Gad: Vo-do! Va-bazl ta ndohi Jabès te Galaad, ngurhi a ngwozi a wudahi nkèshèa.

¹¹ Va-gu aranta: Va-gedassa ngurhi ngurhi a ngwozi tèlèba, man baki ta zhè.

¹² A ta ngots te va ndohi Jabès te Galaad dalahi 400 man baki ta az di ɓai, a ta helka ta a sam man ta mana a pa, te Silo, te kokwar Canaan.

¹³ Te deɓaʼa mpi ndohai ta zlinde ta ndohi a ta tsomma a ndohi Benjamin, man ta ngheda va te za Rimmon, a ta pi gèɗ a hai.

¹⁴ A ndohi Benjamin ta shke a deɓa te ndev nasa, a ta va ta dalahi man ta jèka ta nshèffè te va ndohi Jabès te Galaad. Aman a ndikeda ta tèlè ɓai.

¹⁵ A ndohi Benjamin ta se ta te va a ndohi Israel, a gèɗ man Ndo nzi pèc pècèk a nzede verzi Israel staɗ.

¹⁶ A ndohi nhalaʼa te va mpi ndohai ta Gad: Nga da gi maya kè a njèkèdia ndohai a ta da ngè-cè ngwoz? Ngwozi Benjamin tèlèba klèng.

¹⁷ A ta Gad: Maya kè a tengaʼa man ta mbel ta a ta mènè a ma ma, a verzi Israel a zi a mèdèp azɓai?

¹⁸ Nga, nga slaha nga va ta dalahi nga a ngwoz azɓai, a gèɗ man ndohi Israel ta goɗ a mʼmbèdè, a ta Gad: Ndo man a va na dem nengaʼa a ngwoz a ndo Benjamin, da phomda!

¹⁹ A ta Gad: Na haha, ngolala te Silo a zhè, a mvi a mvai, a tsagi Béthel, a civèɗ man a dè te Béthel a Sichem, te civèɗ mvèng pats, a tsagi Lebona, te civeɗ man a tsagi a tsagai.

²⁰ A ta ngatsa ta maya a ndohi Benjamin, a ta Gad: Vo-do, va-ngheda va kinè a gi lak.

²¹ Aman kin rka ta dalahi Silo ta shkè auda te kokwar, a ta gècè a ta sli dimèsh, va-hakaɗauda a kin gs ta dalahi Silo, staɗ staɗ dem staɗ, va-hel ta a kokwar Benjamin a ngwoz!

²² Aman bab ta a kramamhi ta ta shkè a ta da ga nga ndzoan, nga da Gad ta: Va-pra nga malai. Te var nga staɗ staɗ ta ngatsa ngwoz ɓai. Aman kin va nga a ri kinè ka ɓai; mali kinè azɓai.

²³ A ndohi Benjamin ta gu arsa: ta co ngwoz te va dalahi man ta gècè, staɗ staɗ dem staɗ, ta gs ta, a ta de ta a ngwi a kokwar ta.

²⁴ Te ndev nasa, ndohi Israel ta kezla gèɗ, verzi staɗ staɗ te va gwoli na. To do ta a deɓa a kokwar ta.

²⁵ Te ndev nasa bi Israel azɓai. Ndo staɗ staɗ tèlèba a gu ara man ndav na a woyaʼa.