Juges 20 - Ma Zhiklè

Ntil var a Guibea

¹ Ndohi Israel tèlèba, mpi ndohi tèlèba, ta ɓica va a ma staɗ, a hinè te Dan, ha ndè Beer-Shèba, a kokwar Galaad ba, a sam Ndo nzi pèc pècèk te Mitspa.

² Tsuvom ndohai a verzi ndohi Israel tèlèba ta ɓica va a mpi ndohi Zhiklè tèlèba: Ndohi nda a sak 400.000, a tsakwal te rai.

³ A ndohi Benjamin ta tsenaʼa, ara man ndohi Israel to do za Mitspa. A ndohi Israel ta gaɗa: Vo-goɗa: Mali va na haha a tsoko gèɗ tema?

⁴ A ndo Lévi, baki ngwoz man ta keɗaʼa, a hüno a ngaɗa: I do a kokwar Guibéa, nga a ngwoz kalak ga, a nga mana a pa.

⁵ A ndohi kokwar Guibéa ta slambaɗkay a va, a ta hurtsa nga ntamagi a gèɗ a vaɗ. Ta woy a ta keɗyè. A ta wulaɗay ngwoz ga aussa, a mʼmets na.

⁶ A i co ngwoz, a i wotsaʼa, a i zlinda a sam kokwar ndohi Israel tèlèba, te man ta gu malai a skwi horai te Israel.

⁷ Kinè ndohi Israel, kin ɓica va tèlèba, vo-tsomma haha a kin tül ma haha!

⁸ A ndohi tèlèba ta slambaɗa ara ndo staɗ, a ta gaɗa: Ko ndo staɗ ba a dè ngwi azɓai, a dè a gi na azɓai.

⁹ Nga da gi skwi haha a kokwar Guibéa: Nga dè a ma kokwar!

¹⁰ Te verzi ndohi Israel tèlèba, a géɗ 100, nga porkoɗauda 10. A gèɗ 1.000, nga porkoɗauda 100. A géɗ 10.000, nga porkoɗauda 1.000. A ta woya ta skwi nʼndi a ndohi man ta dè var, a ndohi Guibéa te Benjamin ta da pilèʼa a géɗ skwi man ambaɓai man ta gau te Israel.

Ndohi Israel a ndohi Benjamin ta gi var

¹¹ Ndohi Israel tèlèba ta humda ma ta staɗ, a ta slambaɗa na va a kokwar.

¹² Ndohi Israel ta zlinde ta ndohi a sam verzi ndohi Benjamin tèlèba, a ta gaɗa ta: Skwi ambaɓi mè man a gu a sam kinè?

¹³ Anai va-poko nga ndohi mphömè te Guibéa, nga da bazl ta, a nga til mali man a gu te Israel. Aman ndohi Benjamin ta fa na gèɗ a ma kramamhi tengaʼa, ndohi Israel, ɓai.

¹⁴ A ndohi Benjamin ta ɓic ta ndohi te kokwar tengaʼa tèlèba a kokwar Guibéa, aman a ta gi var a ndohi Israel.

¹⁵ A pats nasa ndohi Benjamin te kokwar tèlèba ta ɗaha va, ndohi 26.000, a tsakwal te rai. Ta ɗaha va, ndohi Guibéa te va tengaʼa ɓai.

¹⁶ Te va ndohi haha tèlèba, ndohi 700 man ta par ta, ta zhè, ngul ndohai. Ta tèlèba ta kèlè ndo a vangava, ko skwi njèrèʼa ara mènèwèd a ndza ta pèc pècèk, ri ta a kèlèhi ambali azɓai.

¹⁷ A ndohi Israel ta ɗaha va, sèi ndohi Benjamin ta te va ɓai: ndohi 400.000, a tsakwal te rai, ndohi var tèlèba.

¹⁸ Ta slambaɗa, to do Béthel, a ta dzhoɗo a sam Bi Zhiklè. Ndohi Israel ta Gad: Ndè zlèr var a sam ndohi Benjamin wa? A Ndo nzi pèc pècèk a Ngalda: Juda do do nshèlèkuraʼa!

¹⁹ A ndohi Israel ta slambaɗa a prèk, a ta ɗaha va a ma kokwar Guibéa.

²⁰ Ndohi Israel to do a ta gu var a ndohi Benjamin, a ndohi Israel ta ɗaha va te Guibéa.

²¹ Ndohi Benjamin ta hakaɗauda te kokwar Guibéa a var, a ta bazl ta ndohi Israel 22.000 a pats nasa.

²² A ndohi Israel to do a ta kuɗai a sam Ndo nzi pèc pècèk, ha dakwa, a ta dzhoɗo: Nga minè a deɓa a var a ndohi Benjamin, kramam nga genè dè? A Ndo nzi pèc pècèk a Ngalda: vo-do!

²³ A ndohai, ngurhi Israel, ta mana ndav ta zaʼa, a ta hüno ndèh va a sam madatsuta.

²⁴ A ndohi Israel to do a ta gu var a ndohi Benjamin, te mʼmèn macecèwaʼa.

²⁵ A ndohi Benjamin ta hakaɗauda te kokwar Guibéa, aman ta zli gèɗ a nda ta macecèwaʼa, a ta bazl ta ndohi Israel a vaʼa 18.000, tèlèba, a tsakwal te rai.

²⁶ Te deɓaʼa ndohi Israel tèlèba, mpi ndohai, ta shkè Béthel. Te pa ta zlatsa a sam Ndo nzi pèc pècèk, ta kuɗai, ta jèke-da skwi nʼndai, ha dakwa. Te deɓaʼa ta va na skwi a ta ndara na skwi a Ndo nzi pèc pècèk.

²⁷ Ndohi Israel ta dzhoɗo a sam Ndo nzi pèc pècèk (te ndev nasa koti nderzlè-ma Bi Zhiklè a zhè a samaʼa.

²⁸ Phinées, kra Eléazar, kra Aaron, a ɓerèʼa a pats nasa), a ta Gad: Nga mine a deɓa a dal var a ndohi Benjamin, kramam nga genè dè, dè nga nzi nga mèn dè? A Ndo nzi pèc pècèk a Ngalda: vo-do, an-goslèm i da pa ta a ri a kinè.

²⁹ A ndohi Israel ta pau nzliagai a tsagi kokwar Guibéa.

³⁰ Ndohi Israel to do, te mʼmèn mantakraʼa, a ta gu var a ndohi Benjamin, a ta ɗaha va a ma kokwar Guibéa, ara nshèlèkuraʼa.

³¹ A ndohi Benjamin ta hakaɗauda te kokwar, a ta zli gèɗ a ndohi var. Aman ta bidka ta auda a dala, a ta hüno a ta bazl ta ndohi Israel ara nshèlèkuraʼa, a gi ndohi Israel 30, te va ndohi nzliagi ngiɗè a civèɗ ngiɗè man a dè Béthel, ngiɗè man a dè Guibéa, a vara.

³² Ndohi Benjamin ta Gad: Nga da fen ta ara nshèlèkuraʼa! Aman ndohi Israel ta Gad: Ngo-hokoy nga a nga da bidokoya a verzi nga auda a dal kokwar!

³³ A ndohi Israel tèlèba ta slambaɗa a samaʼa a ta ɗaha va te Baal-Thamar, a ndohi nzliagai ta ngezlkaɗauda te civèɗ nkèl pats, te Guibéa.

³⁴ Ndohi Israel mparaʼa, tèlèba ndohi 10.000, ta shkè zuraʼa a ma Guibéa. A var ɗekɗekaʼa a ndohi Benjamin ta sun ma ngiɗè a va ta ɓai.

³⁵ Ndo nzi pèc pècèk a ndzam ta ndohi Benjamin a ma ndohi Israel. A pats nasa ndohi Israel ta bazl ta ndohi Benjamin 25.000, tèlèba ndohi a tsakwal te rai.

³⁶ Aman ndohi Benjamin ta rkaʼa, ndohi Israel ta fen ta ma. A ndohi Israel ta winè ta civèɗ kètè a ndohi Benjamin, a mogoɓ ndohi ta shkè te deɓaʼa man ta pe ta a deɓ kokwar Guibéa.

³⁷ A ndohi mogoɓ ta hakaɗai a ta kala na va a kokwar Guibéa, a ta bazla ndohi kokwar tèlèba a tsakwal.

³⁸ Ndohi Israel ta lèmdè ma ta a ndohi mogoɓ, ta da gi aman vodzok a ɗüzhè te kokwar.

³⁹ A ndohi Israel ta ngwoda gèɗ ta a deɓa, aman ndohi Benjamin ta hüno a ta bazl ta ndohi 30 te va ndohi Israel, a ta Gad: Nga fen ta mbelembela ara nshèlèkuraʼa!

⁴⁰ A vodzok a düzhè auda te kokwar ta. A ta pu ɗi a deɓa, kokwar tèlèba vogwa a gai.

⁴¹ A ndohi Israel ta ngwoda gèɗ ta a deɓa, a gèɗ ndohi Benjamin ndzakaɓa, ta suna, ta zi ta.

⁴² A ta hu ta a ndohi Israel, a hèshèkèɗ. Aman ndohi var ta dzadzar ta te deɓa, a ndohi nfaka vogwa ta shkè auda a ta bazl ta ndohai.

⁴³ Ta tèuda ndohi Benjamin a pa, ta hu a verzi ta; aman ta woy a ta shèk va, ta bazl ta, zuraʼa a Guibéa, te civèɗ mvèng pats.

⁴⁴ A ndohi Benjamin ta bazl ta 18.000, tèlèba ndohi var.

⁴⁵ Tengaʼa man ta hu ta a hèshèkèɗ, a der za Rimmon, ta parka ta staɗ slawslawaʼa, ta bazl ta 5.000, a ta hu a verzi tengaʼa ha ndè Guideom, a ta bazla te va tengaʼa 2.000.

⁴⁶ Ndohi Benjamin tèlèba man ta bazl ta a pats sa, 25.000, man tsakwal te rai, ndohi var tèlèba.

⁴⁷ Te va tengaʼa man ta hu ta a hèshèkèd, a der za Rimmon, ndohi 600 ta ngheda va ta te za Rimmon, ki fad.

⁴⁸ A ndohi Israel ta shkè a deɓa a sam ndohi Benjamin, a ta bazl ta a tsakwal, ndohi kokwar a skwi kuɗom tèlèba man ta ngotso. A ta fa na vogwa a kokwarhi tèlèba man ta zhè.