Juges 2 - Ma Zhiklè

Gol Zhiklè te Bokim

¹ Gol Ndo nzi pèc pècèk a mshkè te Guilgal, a ndè Bokim, a ngaɗa; I helka kinè auda te kokwar Egypte, a i de kinè a kokwar man i pasla ta ri a babhi kinè a mʼmbèdè. I gaɗa: I gédèshè nderzlè-ma ga a nda kinè azɓai a mèdèp.

² A kinè, kin da derzla ma a nda ndohi kokwar haha ɓai, aman kin mbeɗa sam mvi skwi a zhiklèhi tengaʼa a hai! Aman kin fu gèɗ a ma ga ɓai. Ehèmè?

³ Anai i gaɗa kinè: I da dzam ta a ma kinè azɓai, a ta da ga kinè matakwan, a zhiklèhi tengaʼa ta da slafadama kinè sak.

⁴ Aman gol Ndo nzi pèc pècèk a ngaɗa ta ma haha a ndohi Israel tèlèba ma, ndohi ta hüno a ta kuɗai.

⁵ Ta baha na samaʼa Bokim; a pa ta zla na skwi a Ndo nzi pèc pècèk.

Ndohi ta jèkeda Zhiklè

⁶ Josué a mpre ta ndohai, a ndohi Israel to do, staɗ staɗ tèlèba a sam skwi nʼndi gi na, aman ta kwèr herkeda.

⁷ Aman Josué a ndohi nhalaʼa, man ta rka skwi mbiaʼa man Ndo nzi pèc pècèk a ngu a sam ndohi Israel a di ta, ta zhè dai, ndohi ta dzodzor Ndo nzi pèc pècèk. Te deɓ mʼmetsi Josué, to do a ma ma a vna.

⁸ Te deɓaʼa Josué kra Nun, ɓèl Ndo nzi pèc pècèk, a mʼmets na. Mvi nengaʼa 110.

⁹ A ta rda a dak man a ngots a skwi nʼndi gi na, te Thimnath-Hérès, te za Ephraim, a tsagi za Gaash, te civèɗ man a géɗèʼa.

¹⁰ Tengaʼa ba tèlèba ta bazl ta ma, ara babhi ta. Wud wud tengaʼa ta menkaɗa pa, man ta sun Ndo nzi pèc pècèk ɓai, a ta sun skwi man a gu a sam ndohi Israel ɓai.

¹¹ A ndohi Israel ta gu skwi man ambaha Ndo nzi pèc pècèk ɓai, a ta dzodzor Baalhai.

¹² Ta jèkeda Ndo nzi pèc pècèk, Zhiklè babhi ta, man a helka ta auda te kokwar Egypte, a ta dzodzor zhiklè ngiɗè tsaɗ, zhiklèhi ndohi man ta te va tengaʼa. Ta tsu ri a tengaʼa, a ta poko na gèɗ ndav auda a Ndo nzi pèc pècèk.

¹³ Ta jèkeda Ndo nzi pèc pècèk, a ta dzodzor Baal a Astarté.

¹⁴ A ndza na a ndav a Ndo nzi pèc pècèk a vata a géɗ ndohi Israel, a mpe ta a ri a ndohi metsarhai, a ta helama ta skwi a metsar, a mpre ta ma a ri a mayamhi a tsagi tengaʼa, a ta slaha ta njèl va a sam mayamhi ta ɓai.

¹⁵ Pèc pècèk man ta dè var, ri Ndo nzi pèc pècèk a ngwodka ta va a gèɗ, ara man Ndo nzi pèc pècèk a ɗifa ta ri a dai, a mbaɗa ta pats ngiɗè a ta kala a matakwan mbiaʼa.

Ndohi kita

¹⁶ Te deɓaʼa Ndo nzi pèc pècèk a mpa ta ndohi kita, aman ta da mbeldaka ta auda te ri metsarhai.

¹⁷ Aman ko a ma ndohi kita ba, ta fa na zlembaɗ azɓai, a géɗ man ta dzodzor zhiklèhi ngiɗè tsaɗ, a ta tsu ri a tengaʼa. Tsam-tsam ta jèkeda civèɗ bab ta, man ta dzodzor Ndo nzi pèc pècèk, man ta fu gèɗ a ma nkwèr nengaʼa. Wudahi tengaʼa ta ga lèmèlèmè ara babhi ta ɓai.

¹⁸ Aman Ndo nzi pèc pècèk a mpa ta ndohi kita, Ndo nzi pèc pècèk a ntakaha ndo kita, a pats nshèffè nengaʼa tèlèba, a mʼmbel ta auda te ri ndohi mayamhi ta, a géɗ man ta si Ndo nzi pèc pècèk te va, a géɗ wobau tengaʼa, a sam ndohi nʼnga ta matakwan, a sam ndohi mparaha ta.

¹⁹ Aman ndo kita a mʼmets na ma, ta gu mali holholholaʼa a fena babhi tengaʼa zaʼa. A ta dzodzor zhiklèhi ngiɗè tsaɗ, a ta tsu ri a tengaʼa, a ta gu mizlinè tengaʼa. Ta gi skwi tengaʼa man ambaɓi genè, a ndav tengaʼa nsassaya.

²⁰ A Ndo nzi pèc pècèk a ngu ndav holholaʼa a géɗ ndohi Israel, a ngaɗa: A géɗ man ndohi ta tawaɗaha nderzlè-ma ga, man i njè ta a gèɗ babhi ta, a ta fu gèɗ a ma ga ɓai,

²¹ ndohi herkeda man Josué a njèka ta a pats man a mʼmets na, i ba i da dzam ta a ma tengaʼa asaɓai, ko verzi mèmè.

²² A i jkeda ta ndohi Israel arsa, a i suna: ta woy a ta dè a civèɗ Ndo nzi pèc pècèk ara babhi tengaʼa dè, dè ta dè azɓi dè?

²³ Ndohi herkeda haha, Ndo nzi pèc pècèk a mpe ta a ri a Josué ɓai, a ndzam ta tsam-tsam ɓai, a njèke ta a sam man ta nza a pa.