Juges 19 - Ma Zhiklè

Ndo Lévi a ngwoz kalak na

¹ Te ndev nasa, bi Israel az di ɓai, a ndo Lévi man a nza a der za Ephraim ara mbrok, a nco ngwoz ngiɗè a vaʼa te Bethléhem te Juda.

² A ngwoz matsa a ngu mphömè, a mhu na a gai, a gi bab na, te Bethléhem te Juda, a nʼnza te pa ki fad.

³ A baki nengaʼa a nslambaɗa, a ndzodzora a ndè bidèʼa, aman a shke a deɓa a ngwai. To do a ɓèl na a kdèhi cèw. Aman a ndikè a gi babaʼa, bab ngwoz a nrkaʼa, a mwuffe a nhaka na ma a ta dè zli gèɗ.

⁴ A mèsh na, bab ngwoz, a ngsedahi mʼmèn makar. Ta ndau skwai, ta sau skwai, a mʼmana a pa.

⁵ Te mʼmèn mafaɗaʼa, ta slambaɗa a prèk te gai, a woya man a nde na. Aman bab ngwoz a ngaɗa na baki dem na: Zhor movar dai, man a ka ngècè wuɗai a civèɗ; te deɓaʼa ka dè.

⁶ A ta nzahai a ta ndau skwai, cèw cèw ba, a ta sau skwai. Te deɓaʼa bab ngwoz a ngaɗa na nguraʼa: Kam kam, mana na a va staɗ dai, a ka nga a pa dai.

⁷ Aman a woya a nde na, mèsh na a ntsa na rai kam kam, ha a mʼmènè a va staɗ zaʼa.

⁸ Te mʼmèn mazlamaʼa a nslambaɗa a prèk te gai, a woya a nde na. A bab ngwoz a ngaɗa: Nga a pa dai! Aranta a mpceda na gèɗ a hai, ha dakwaɗ. A ta ndau skwai, cèw ba.

⁹ Te deɓaʼa nguraʼa a nslambaɗa, a woya a nde na, a ngwoz na a ɓèl na. A mèsh na, bab ngwoz, a ngaɗa na: Ani pats a woya a kèl na, vaɗ ma. Va-mana a haha a patsna! Pats nkala. Mana a haha a ka wuffa. Angoslèm a prèk kin de kine mènè, a kin dè a deɓa a gi ngaya.

¹⁰ Aman ndo sa a woya a mʼmènè a pa asaɓai, a nslambaɗa, a nde na. A ndikè a ma Jébus (kokwar Jérusalem), a kdèhi nengaʼa cèw, a ngwoz na.

¹¹ Aman ta zhè ndul ndul a Jébus, a pats a woya a nkèlè, ɓèl na a ngaɗa na babgi na: Ngo-monokoya a kokwar ndohi Jébus haha!

¹² Aman babgi na a ngaɗa na: Nga woy a nga mènè a kokwar ndohi ngiɗè ambali, man Israel ka ɓai, azɓai. Nga dè a ma a kokwar Guibèa.

¹³ Te deɓaʼa a ngaɗa na ɓèl na: Ngo-do! Ngo-dokoy a ma, gar Guibéa, gar Rama, a nga mènè a pa.

¹⁴ A to do a ma ma. Ndul ndul a ma kokwar Guibéa kokwar Benjamin, pats nkala.

¹⁵ A to do a kokwar Guibéa, aman ta mènè a pa. A nzlatsa a ndev ngwai, ndo man a va ta gi aman ta mènè a pa azɓai.

¹⁶ A dakwaɗ, babgi ngiɗè a mshkè te gi dau. Ndoʼa a mshkè te za Ephraim, a nʼnza te Guibéa ara mbrok. Ndohi kokwar, tengaʼa ndohi Benjamin.

¹⁷ A nceda gèɗ a zhiklè, a nrka ndo nshèwèlè a nzlatsa te ndev ngwai. Babgi a ngaɗa: Ka dè ma, ka shkè tema?

¹⁸ A nengaʼa a ngaɗa: Nga shkè te kokwar Bethléhem te Juda, a nga dè a deɓa a za Ephraim; kokwar ga te pa. I do a kokwar Bethléhem te Juda, ani i shkè ga, a i dè ngwi ma. Ndo mfyè a gi na azɓai.

¹⁹ Ksof a skwi nʼndi kdèhi ga a zhè. Movar a barassa aman nga a ngwoz a ɓèl ga nga ndiaʼa, tèlè a zhè.

²⁰ A babgi a ngaɗa na: Susai, susai, washkè! Skwi mèmè man ka woyaʼa, ka ngècè a sam ga. Ka slaha ka mènè a dala ambalai azɓai.

²¹ A nda a gi na, a mpa ta ksof a kdèhihai. A mbrokihai ta pana sak ta, a ta ndau skwai, a ta sau skwai.

²² Ndav ta a gi langlangaʼa. A mphöm ndohai te kokwar, falihai, ta hurtso na ntamagi a gèɗ a babgi sa. Ta gaɗa na ndo sa, man gi a nengaʼa: Vo-ko nga ndo man te gi ngaya sa, a nga sun nengaʼa!

²³ A ndo gi sa a ndo auda a sam ta, a ngaɗa ta: Aʼai, kramamhi ga, aʼai, kam kam kin gu skwa ɓai! Aman ndo sa nte gi ga. Kin slaha kin gi skwi ambaɓi aranta azɓai.

²⁴ Na haha dem ga a zhè, bidalai, a ngwoz ndo mbrok a zhè. I da helka ta auda a sam kinè, a kin mènè a vna, a kin gu a vna ara man kin woyaʼa. Aman ndo haha kin ga na skwi ambaɓiaʼa ɓai!

²⁵ Aman ndohi ta fa na gèɗ a ma nengaʼa ɓai. A ndo mbrok a nco ngwoz nengaʼa, a ndzamda auda te gai a sam ta. A ta mana a vna, a ta mana na va ha ndidèk sam. A ta jèkeda, man pats a nshkè auda ma.

²⁶ Nciɗ sam, ngwoz a mshkè a nkalahi a ntamagi babgi man baki nengaʼa te pa, a mʼmana a pa, ha wushèr tassaʼa.

²⁷ Aman a mshkè auda te gai, a woya a ndè a ma, na haha ngwoz kalak na a woya a ndevda va a magai, a mpeda ri a ntamagai.

²⁸ A nengaʼa a ngaɗa. Slambaɗa, ngo-dokoya! Tètè, a mʼmbeɗa na a ma ɓai. A nengaʼa a nzuɓda a deɓ kɗèh, a ndo ngwai.

²⁹ A ndo a gi na, a nco gwèsh, a nʼngelama na ri a nʼngelama na sak a ngwoz kalak na, a mwotsaʼa 12, a skwi mwotsaʼa staɗ staɗ tèlèba a nzlündo a sam tèlèba te kokwar Israel.

³⁰ Ko wawa man a nrkaʼa, a ngaɗa: Daga mshkè ta ndohi Israel auda te kokwar Egypte, ha patsna, nga rka skwi aranta ɓai. Va-huro, va-tsomma, vo-goɗa!