Juges 17 - Ma Zhiklè

Mica a ndo Lévi

¹ Ndo ngiɗè a zhè te za Ephraim, nzlembaɗ na Mica.

² Nengaʼa a ngaɗa na mam na: Suli gozhem 110 sa man ta hela ma ka — i tsena mʼmbèɗè ngaya a géɗ nengaʼa te zlembaɗ ga — iyè i ceda Suli sa a ma a metsar, Suli te ri ga. Mam na a ngaɗa: Ndo nzi pèc pècèk da pshè ka ma, kra ga!

³ A nengaʼa a mva na Suli gozhèm 110 a deɓa a mam na, a mam na a ngaɗa: Suli ga i fedahi a sam Ndo nzi pèc pècèk te va nasa a ri ga, a géɗ kra ga, a ta da gi a skwi mbèh skwai, a ta vidè a vrai. Anai i va ka a deɓa.

⁴ Aman nengaʼa a mva na Suli a deɓa a mam na, a mam na a mhul gozhèm 20, a mva na ndo mviɗè skwai. A ngau skwi mbèh skwi a vri mvidèʼa, a mfeda a gi Mica.

⁵ Mica matsa, gi Zhiklè nengaʼa a zhè, a ngau Ephod a Théraphim, a nfu kra nengaʼa staɗ a ndo mvi skwi a Zhiklè.

⁶ Te ndev nasa bi Israel az di ɓai. Ndo staɗ staɗ tèlèba a gu ara man ndav na a woyaʼa.

⁷ Gol ngiɗè a zhè te Bethléhem, te Juda, te verzi Juda, ndo Lévi, a nʼnza te pa ara mbrok.

⁸ A njèkeda kokwar Bethléhem te Juda, a woya sam ngiɗè man a nzi a pa a mbrok. Civèd nengaʼa a da na ma a za Ephraim, a gi Mica.

⁹ A Mica a ngaɗa na: Ka shkè tema? A nengaʼa a ngaɗa na: I ndo Lévi te Bethléhem te Juda, i sawala a civèɗ, i woy sam man i slaha a i nzi a pa.

¹⁰ Mica a ngaɗa na: Nza a sam ga, nde ngaya a bab ga, a ndo mvi skwi a Zhiklè! I da va ka suli 10.000 a mvi a mvai, a maslaka a skwi nʼndi ngaya.

¹¹ A ndo Lévi a mdo a gai. A nco, a nʼnza a sam na, a nʼnza a pa ara kra na.

¹² Mica a nfu ndo Lévi a ndo mvi skwi a Zhiklè nengaʼa, a gol matsa a nʼnza te gi Mica.

¹³ Mica a ngaɗa: Antanta i suna, Ndo nzi pèc pècèk a woya a gay skwi man amba, a géɗ man ndo Lévi a ngi mizlinè mvi skwi, a Zhiklè ga.