Juges 15 - Ma Zhiklè

Samson a fa na vogwa a dau ndohi Philistie

¹ Te deɓ kètè, a pats man ta tsi dau, Samson a nceda ɓok a rai, a dè a sam medemi na, a ngaɗa: I woy ndè a gi a sam ngwoz ga. Aman bab dam a mva na civèɗ ɓai.

² Bab dam a ngaɗa: I hur te ndav ga, ka ka ndha a shèwa, a i va na slemsak ngaya. Mbegèd dam a zhè, amba te dai a fena nengaʼa. Co nengaʼa te dia mènè!

³ Samson a ngaɗa na: Aman antanta i da ga ta skwi ambaɓiaʼa a ndohi Philistie, mali ga ka ɓai!

⁴ A ndo a mpor barkdadihai 300, a nco mènèf, a nderzla hutor tengaʼa. Te ndev hutor nderzla tengaʼa a

⁵ nʼnüɓa ta vogwa a pa, a mpre ta, a ta hi a gi dau ndohi Philistie, a dau te gi dau tengaʼa tèlèba, vogwa a nʼndedama, a skwi te gi lak ba, a skwi te gi wof nhayaʼa ba.

⁶ Ndohi Philistie ta gaɗa: Ngoko skwi haha wa? Ta gaɗa ta: Samson, baki dem Thimna, a ngau, a géɗ man ta cèma na ngwoz a ta va na slemsak na. A ndohi Philistie to do a ta fa na vogwa a gi bab dam, a vogwa a nʼndeda demaʼa a babaʼa a ma.

⁷ Samson a ngaɗa ta: A géɗ man kin gi skwi ar haha, a vava ndav ga a mènèhi azɓai, sèi kin pelay gèɗ.

⁸ A mbazl ta kumba, a nzede nshèffè ndohi kumba, a mdo a nʼnza te gi za te Etam.

Samson a mbazl ta ndohi Philistie te Léchi

⁹ Ndohi Philistie to do a ta nza na ma a kokwar Juda, te dak, te civèɗ Léchi.

¹⁰ Ndohi Juda ta gaɗa: Kin shkè a nda gi var a nga èhèmè? Ta gaɗa ta: Nga shkè, aman nga dzawa Samson, a nga gi a sam na, ara man a gu a sam nga.

¹¹ A ndohi Juda 3.000 to do a ma gi za a ta gaɗa na Samson: Ndohi Philistie ta kwor nga, ka sun ɓi dè? Ka goko nga ma a gèɗ èheme? A nengaʼa a ngaɗa: I gu ara man ta gakayè, lèmèlèmè arsa.

¹² Ta gaɗa na: Nga shkè aman nga dzaw ka, a nga va ka a ri a ndohi Philistie. Samson a ngaɗa ta: Va-mbaɗayè, kin da keɗyè te ri kinè ɓai!

¹³ A ta mbeɗa na a ma: Aʼai! Nga woy a nga dzaw ka genè, a nga ve ka a ri a tengaʼa, nga keɗe ka azbai. A ta dzawa a teɓa mɓuaʼa cèw, a ta da a géɗ za.

¹⁴ Aman a ndikè ndul ndul a ma kokwar Léchi, ndohi Philistie ta shkè, aman a ta haka na ma a sabi a ma. Aman Mèzhèɓ Ndo nzi pèc pècèk a mshkè a géɗ nengaʼa: A teɓa cèw man ta dzawa a vna, ta nde ta a ndè-fèn vogwa, a skwi ndzawaʼa a mʼwushahai.

¹⁵ Te deɓaʼa a nʼngots mahazau kɗèh tʼhai, a mco a rai, a mbazla ndohi a vna, 1.000.

¹⁶ Te deɓaʼa Samson a ngaɗa: A mahazau kɗèh i nde ta a ma, a mahazau kɗèh i bazl ta ndohi 1.000!

¹⁷ Aman a ngoɗ ma haha, a nkalda mahazau kɗèh aussa, a mbaha na samaʼa Ramath-Léchi.

¹⁸ Te deɓaʼa iyam a ndza na, a ntsu ri a Ndo nzi pèc pècèk, a ngaɗa: Ka gu ɓèl ngaya a ngul ndohi mbiaʼa, aman ani i da metsi ga a mi iyam ɗè? A i da kèlè a ri ndohi man ngwon nʼngel ɓi dè?

¹⁹ A Bi Zhiklè a ncizla za, a iyam a nhakaɗauda, a Samson a msau, a mʼmendoko na nshèffè na a pa, a ngau daraʼa. A géɗ nengaʼa ta baha na nlèlè iyam En-Hakkore. Na zhe te Léchi, ha patsna.

²⁰ Samson a ngau kita te Israel, te va man ndohi Philistie ta zhè, mvi 20.